ރާއްޖޭގެ މައި ދޮރާށި، ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން މިދިޔަ އަހަރުގެ ތެރޭގައި ޖުމްލަ 8.2 މިލިއަން ފަސިންޖަރުންނަށް ހިދުމަތް ދީފައިވާ ކަމަށް އެ އެއާޕޯޓް ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ. މިއީ އެ އެއާޕޯޓުގެ ތާރީހުގައިވެސް ފާހަގަކޮށްލެވޭ ބޮޑު އަދަދެކެވެ.
އެމްއޭސީއެލްގެ ތަފާސްހިސާބުތަކަށް ބަލާއިރު، އެންމެ ގިނަ ފަސިންޖަރުންނަށް ހިދުމަތް ދީފައިވަނީ އިންޓަނޭޝަނަލް ޓާމިނަލުންނެވެ. އެގޮތުން ބައިނަލްއަގުވާމީ ދަތުރުތަކުގައި 5.3 މިލިއަން ފަސިންޖަރުން ބައިވެރިވެފައިވެއެވެ.
މީގެ އިތުރުން ސީޕްލޭން ޓާމިނަލުން 1.7 މިލިއަން ފަސިންޖަރުން އަދި ޑޮމެސްޓިކް ޓާމިނަލުން 1.1 މިލިއަން ފަސިންޖަރުންނަށް ހިދުމަތް ދީފައިވާކަމަށް އެ ކުންފުނިން ބުނެއެވެ.
ވައިގެ ދަތުރުފަތުރުގެ ހަރަކާތްތަކަށް ބަލާއިރު، މިދިޔަ އަހަރު ވީއައިއޭގައި 249,214 އެއާ ޓްރެފިކް މޫވްމެންޓް ވަނީ ރެކޯޑްކޮށްފައެވެ. މިއީ 2024 ވަނަ އަހަރާ އަޅާބަލާއިރު 8 އިންސައްތައިގެ ކުރިއެރުމެކެވެ. މީގެ ތެރޭގައި ހިމެނެނީ 34,868 އިންޓަނޭޝަނަލް މޫވްމެންޓާއި، 185,998 ސީޕްލޭން މޫވްމެންޓްގެ އިތުރުން 28,348 ޑޮމެސްޓިކް މޫވްމެންޓެވެ.
އެއާޕޯޓުގެ ހިދުމަތްތައް ފުޅާކޮށް ފެންވަރު ރަނގަޅު ކުރުމަށް ކުރަމުންދާ މަސައްކަތުގެ ދަށުން، މިދިޔަ އަހަރުގެ ޖުލައި 26 ވަނަ ދުވަހުން ފެށިގެން ޒަމާނީ އާ ޓާމިނަލުން ވެސް ވަނީ ހިދުމަތް ދޭން ފަށާފައެވެ.