ކާބޯތަކެތީގެ ޚިދުމަތްދޭ ތަންތަން ރަޖިސްޓްރީ ކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ނަގަމުން އަންނަ ރަޖިސްޓްރޭޝަން ފީ އާއި ކެޓަގަރީ ފީ މިއަދުން ފެށިގެން ދެ އަހަރު ދުވަހުގެ މުއްދަތަކަށް %50 ކުޑަކުރުމަށް އެ އޮތޯރިޓީން ނިންމައިފިއެވެ. މިއީ އެ ދާއިރާގައި މަސައްކަތްކުރާ ފަރާތްތަކަށް ލުޔެއް ދިނުމުގެ ގޮތުން ގެނައި ބަދަލެއް ކަމަށް އެމްއެފްޑީއޭ އިން މަޢުލޫމާތު ދެއެވެ.
ކާބޯތަކެތީގެ ޚިދުމަތް ދޭ ތަންތަނަށް ލައިސަންސް ދޫކުރުމުގެ އިންތިޤާލީ އުޞޫލުގެ ދަށުން، މިހާތަނަށް ރަޖިސްޓްރޭޝަން ފީގެ ގޮތުގައި ނަގަމުން އައީ 500 ރުފިޔާއެވެ. ނަމަވެސް، އަލަށް ގެނައި ބަދަލާއެކު މި ފީ ވަނީ 250 ރުފިޔާއަށް ކުޑަކޮށްފައެވެ. މީގެ އިތުރުން، އެކި ކެޓަގަރީތަކުން ނަގާ އަހަރީ ފީތަކަށް ވެސް ވަނީ ބޮޑެތި ބަދަލުތަކެއް ގެނެސްފައެވެ. އެގޮތުން ހޮޓާ، ކެފޭ، ރެސްޓޯރެންޓު ފަދަ ތަންތަނުން ކުރިން ނަގަމުން އައި 2,000 ރުފިޔާގެ ބަދަލުގައި ދެން ދައްކަން ޖެހޭނީ 1,000 ރުފިޔާއެވެ. އަދި ކޭޓަރިން އާއި ބޭކަރީ ފަދަ ތަންތަނުން ނަގާ ފީ 500 ރުފިޔާއަށް ވަނީ ކުޑަކޮށްފައެވެ.
މި އުޞޫލުގެ ދަށުން ކާބޯތަކެތީގެ ޚިދުމަތްދޭ ތަންތަން 14 ކެޓަގަރީއަކަށް ބަހާލާފައިވާއިރު، މަގުމަތީގައި ކާނާ ވިއްކާ ގާޑިޔާ ފަދަ ތަންތަނުން ދެން ދައްކަން ޖެހޭނީ 250 ރުފިޔާއެވެ. އެމްއެފްޑީއޭ އިން ވިދާޅުވި ގޮތުގައި، އިކޮނޮމިކް މިނިސްޓްރީގައި ރަޖިސްޓްރީކޮށްގެން ހިންގާ ތަންތަނުގެ އިތުރުން، ވިޔަފާރި އުޞޫލުން ކާބޯތަކެތި ތައްޔާރުކުރާ ބަދިގެތަކާއި ހެދިކާ ވިއްކާ ތަންތަނުން ވެސް ދެން ދައްކަން ޖެހޭނީ ކުރިން ކަނޑައަޅާފައިވާ އަގުގެ ދެބައިކުޅަ އެއްބައެވެ.
މި ބަދަލުތައް ގެނެސްފައިވަނީ މިދިޔަ އޯގަސްޓް މަހު އަމަލުކުރަން ފެށި ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން އެމްއެފްޑީއޭ އަލުން އެކުލަވާލުމާ ގުޅިގެންނެވެ. މި ޤާނޫނުގެ ދަށުން ކާބޯތަކެތީގެ ޚިދުމަތްދޭ ތަންތަން ދަރަޖަކުރުމާއި، ލައިސަންސް ދޫކުރުމުގެ ފުރިހަމަ ޒިންމާ މިހާރު މަތިކޮށްފައިވަނީ އެމްއެފްޑީއޭއަށެވެ.