މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ޕްރިމިއަމް އުފެއްދުންތަކަށް ޚާއްސަކޮށްގެން ތައްޔާރުކުރި “ރަންވަރު” ބްރޭންޑް ރޭ ރަސްމީކޮށް އިފްތިތާހުކޮށްފިއެވެ. މިފްކޯ މަސްފިހާރައިގައި ބޭއްވި ޚާއްސަ ރަސްމިއްޔާތެއްގައި މި ބްރޭންޑް ތަޢާރަފުކޮށްދެއްވީ އެ ކުންފުނީގެ އެކްޓިންގ ޗެއަރމަން ޝިމާޒެވެ.
މި ރަސްމިއްޔާތުގައި މިފްކޯގެ ސީއީއޯ ބްރިގޭޑިއަރ ޖެނެރަލް (ރޓޑ) ފަރުޙަތު ޝަހީރާއި، ސްޓްރެޓެޖިކް ކޮންސަލްޓެންޓް އާޠިފް ޝަކޫރުގެ އިތުރުން ކުންފުނީގެ އިސްވެރިން ބައިވެރިވެވަޑައިގެންނެވިއެވެ. “ރަންވަރު” އަކީ މިފްކޯގެ މަޝްހޫރު “ފަސްމީރު” ބްރޭންޑުގެ ދަށުން ނެރުނު ޕްރިމިއަމް އުފެއްދުންތަކަށް ޚާއްސަ ނަމެކެވެ. މިއީ މިފަދަ ޕްރިމިއަމް އުފެއްދުންތަކަކަށް ވަކި ބްރޭންޑެއް އެ ކުންފުނިން ތަޢާރަފުކުރި ފުރަތަމަ ފަހަރެވެ.
މި ބްރޭންޑުގެ ދަށުން ރޭ ވަނީ ޖުމުލަ 5 އުފެއްދުމެއް ބާޒާރަށް ނެރެފައެވެ. އޭގެ ތެރޭގައި ހިމެނެނީ:
- ކަންނެލި ސްޓޭކް މަސްދަޅު
- ކަންނެލި ބަނޑައިދޫ މަސްދަޅު
- ރިހާކުރު (މެއި، ބިސް، ލަގޮނޑިއާ އެކު)
- ރިހާކުރު (ހިމުން މުގުރިމަހާ އެކު)
- ތެލުލި ރިހާކުރު (ހިމުން މުގުރިމަހާ އެކު)
މި އުފެއްދުންތަކާ ގުޅޭގޮތުން މިފްކޯގެ ލޯކަލް ސޭލްސް އެންޑް މާކެޓިންގ ޖެނެރަލް މެނޭޖަރ ޙަސަން ޒާހިދު މުޙައްމަދު ވިދާޅުވީ، މިފްކޯގެ އަމާޒަކީ ރައްޔިތުން ބަލައިގަންނާނެ ފަދަ އުފެއްދުންތަކެއް ބާޒާރަށް ނެރުން ކަމަށެވެ. އެގޮތުން ރޭ ބާޒާރަށް ނެރުނު އުފެއްދުންތަކުގެ އިތުރަށް ކުރިއަށް އޮތް ތަނުގައިވެސް ރަންވަރު ބްރޭންޑުގެ ދަށުން ތަފާތު އުފެއްދުންތައް ތައާރަފް ކުރާނެ ކަމަށެވެ.
ޒާހިދު އިތުރަށް ފާހަގަކުރެއްވި ގޮތުގައި ރަންވަރަކީ ރާއްޖޭގެ ބާޒާރަށް ޚާއްސަކޮށްގެން ތަޢާރަފުކުރި ބްރޭންޑެކެވެ. އަދި ބޭރުގެ ބާޒާރުތަކަށް މިފްކޯއިން ތައްޔާރުކުރާ އުފެއްދުންތަކެކޭ އެއްފަދައިން، މި އުފެއްދުންތަކަށް ވެސް ބޮޑު ތަރުހީބެއް ލިބޭނެ ކަމަށް އުންމީދުކުރައްވާ ކަމަށް އޭނާ ވިދާޅުވިއެވެ. މީގެ އިތުރުން ކުރިއަށް އޮތް ތަނުގައި އިކޮނޮމީ ޕެކްތަކެއް ތަޢާރަފުކުރުމަށް ވެސް ވަނީ ރޭވިފައެވެ.
މި އުފެއްދުންތައް މިއަދުން ފެށިގެން މާލެ ސަރަހައްދުގެ މިފްކޯ ފިހާރަތަކުން ލިބެން ހުންނާނެއެވެ. އަދި ކުރިއަށް އޮތް ތިން ދުވަހު މިފްކޯ މަސްފިހާރައިގައި މި އުފެއްދުންތަކުގެ ރަހަ ބަލައިލުމުގެ ފުރުސަތު އާންމުންނަށް ވަނީ ހުޅުވާލާފައެވެ..