މަހަކު 60،000 ރުފިޔާއަށް ވުރެ މަތިން އާމްދަނީ ލިބޭ މީހުން ސަރުކާރުގެ ޞިއްޙީ އިންޝުއަރެންސް ސްކީމް، އާސަންދައިގެ ހިދުމަތަކަށް އަމިއްލައަށް ޙަރަދު ކުރަންޖެހޭ ނިޒާމެއް ތަޢާރަފުކުރުމަށް ރާވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.
ރައީސް އޮފީހުގައި ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، މި ބަދަލުތަކުގެ ބޭނުމަކީ ދައުލަތުގެ ޞިއްޙީ ނިޒާމަކީ ދެމެހެއްޓެނިވި ނިޒާމަކަށް ހެދުމާއި، ސަރުކާރުގެ އެހީތެރިކަން އެންމެ ބޮޑަށް ބޭނުންވާ ފަރާތްތަކަށް އެ އެހީތެރިކަން ފޯރުކޮށްދިނުން ކަމަށެވެ.
ކޯ-ޕޭމަންޓް ނުވަތަ ޕްރީ-ޕޭމަންޓް ދައްކަންޖެހޭ ގޮތަށް ހަމަޖެއްސުން
ސަރުކާރުން ގެންނަން ހުށަހަޅާފައިވާ ނިޒާމުގެ ދަށުން، މަހަކު 60،000 ރުފިޔާއަށް ވުރެ މަތިން އާމްދަނީ ލިބޭ ފަރާތްތަކަށް އާސަންދައިގެ ފުރިހަމަ ކަވަރޭޖް ހިލޭ ނުލިބޭނެއެވެ. އޭގެ ބަދަލުގައި، އެފަދަ ފަރާތްތަކުން ޞިއްޙީ ޚިދުމަތްތަކަށް ކޯ-ޕޭމަންޓް ނުވަތަ ޕްރީ-ޕޭމަންޓްގެ ގޮތުގައި ފައިސާ ދައްކަން ޖެހޭނެއެވެ.
ރައީސް ވިދާޅުވި ގޮތުގައި މި ބަދަލުގެ ސަބަބުން އަހަރަކު ގާތްގަނޑަކަށް 280 މިލިއަން ރުފިޔާ ސަލާމަތް ކުރެވޭނެ ކަމަށާއި، މި ފައިސާ އެހެނިހެން ޢާންމު ބޭނުންތަކަށް ބޭނުންކުރެވިދާނެ ކަމަށެވެ. އަދި ބޮޑު އާމްދަނީއެއް ލިބޭ މީހުންނަށް ސަރުކާރުގެ ޚަރަދުގައި ފުރިހަމަ ޞިއްޙީ ޚިދުމަތް ހިލޭ ފޯރުކޮށްދިނުމަކީ ރައްޔިތުންގެ ފައިސާ ބޭނުންކުރުމުގައި އެންމެ އެކަށީގެންވާ ގޮތް ނޫން ކަމަށްވެސް އެމަނިކުފާނު ފާހަގަކުރެއްވިއެވެ.
މި އައު ނިޒާމަށް އަންނަ މަހުން ފެށިގެން ޢަމަލުކުރަން ފެށޭނެ ކަމަށް ލަފާކުރެވެއެވެ. ރައީސް މުޢިއްޒު ވިދާޅުވީ، މިކަމުގެ ތައްޔާރީތައް ކުރިއަށްދާ ވަރަކަށް މި ބަދަލުތަކުގެ އިތުރު ތަފްޞީލުތައް ސަރުކާރުން ހާމަކުރާނެ ކަމަށާއި، މި އިޞްލާޙުގެ ސަބަބުން މިއަހަރުގެ ތެރޭގައި ވެސް އާސަންދައިގެ ޚަރަދުތައް ކުޑަކުރެވިގެންދާނެ ކަމަށް އުންމީދު ކުރައްވާ ކަމަށެވެ.