ފުވައްމުލަކު ސިޓީގެ ބަނދަރު ބޮޑުކޮށް އެއަރޕޯޓު ތަރައްގީކޮށްދޭން އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވައުދުވެވަޑައިގެންފިއެވެ.
ރިޔާސީ އިންތިހާބުގެ ކެމްޕެއިނަށް ފުވައްމުލަކު ސިޓީ އަށް ވަޑައިގެން ބޭއްވި ޖަލްސާގައި މުއިއްޒު ވިދާޅުވީ މިހާރު ފުވައްމުލަކުގެ ބަނދަރު ބޮޑުނުކޮށް، މަސްވެރިކަމާއި ފަތުރުވެރިކަން ކުރި ނާރާނެއެވެ.
އެހެންކަމުން، ފުވައްމުލަކު ބަނދަރު ބޮޑުކޮށް، ޒަމާނަށް ފެތޭ ގޮތަށް އެ ބަނދަރު ތަރައްގީކޮށް ދެއްވާނެ ކަމުގެ ޔަގީންކަން މުއިއްޒު ދެއްވިއެވެ.
އަދި ފުވައްމުލަކު އެއާޕޯޓުގައި އިތުރު އިމާރާތްތައް އަޅައި ވައިގެ ބަނދަރު ތަރައްގީ ކުރުމަކީ މިހާރުއްސުރެ، ފެށޭނެ ކަމެއް ކަމަށާއި ޕީޕީއެމް/ޕީއެންސީ ވެރިކަމެއްގައި އެކަން ކުރައްވާނެ ކަމަށް މުއިއްޒު ވިދާޅުވިއެވެ.
ފުވައްމުލަކު އެއާޕޯޓްގެ ތަރައްޤީއަށް ކުރަންޖެހޭ ކަންކަމަކީވެސް ރައްޔިތުންނާއި މަޝްވަރާކުރެވިގެން ކުރަންޖެހޭކަންކަން ކަމަށާއި މިހާރު ހުރި ވައިގެ ބަނދަރުގައި ހުރި ވަސީލަތްތައްވެސް އިތުރަށް ތަރައްޤީކުރަންޖެހޭ ކަމަށް މުއިއްޒު ވިދާޅުވިއެވެ.
“ އެހެންކަމުން ތަރުތީބު ކުރެވިގެންގެންދެވޭ މަޝްރޫޢެއްގެ ގޮތުގައި ވައިގެ ބަނދަރު ތަރައްޤީ ކުރުމުގެ މަޝްރޫއު ކުރިއަށް ގެންގޮސްދޭނަން” މުއިއްޒު ވިދާޅުވިއެވެ.
އަދި ފުވައްމުލަކުގައި ސިޓީ ހޮޓަލެއް އެޅުމަށް ވެސް މުއިއްޒު ވައުދުވެވަޑައިގެންނެވިއެވެ.
“ ހޮސްޕިޓަލުން ހިދުމަތް ނުލިބިގެން މާލެ ދާން ޖެހުމަކީ މައްސަލައެއް. އެހެންވެ، ހޮސްޕިޓަލްގައި ގާއިމު ކުރަން ޖެހޭ ހުރިހާ ހިދުމަތްތަކެއް ގާއިމުކޮށް، ތަރައްގީ ކުރެވިފައިވާ ޒަމާނީ ހޮސްޕިޓަލަކަށް ހަދައިދޭނަން “ މުއިއްޒު ވިދާޅުވިއެވެ.
ކުޑަކުދިންނާއި މާބަނޑު މީހުންނަށް ހާއްސަ ހޮސްޕިޓަލެއް ފުވައްމުލަކު ސިޓީގައި ގާއިމު ކުރެއްވުމަށް ވެސް މުއިއްޒު ވައުދުވެވަޑައިގެންނެވިއެވެ.
އުނގެނުމަށް، ރިސަރޗް ހެދުމަށް، ޢިލްމީ ގޮތުން ކުރިއަށް ދިއުމަށް ، ތަޢުލީމީ ޖީލެއް ބިނާކުރުމަށް، ފުވައްމުލައް ސިޓީގައި ޒަމާނީ ފެންވަރުގެ ލައިބްރަރީއެއް ޤާއިމްކޮށްދޭނެ ކަމަށާއި ތަޢުލީމާއި ޢިލްމުގެ މައްޗަށް ބިނާވެފައިވާ މުސްތަޤުބަލަކަށް ހެދިއްޖެނަމަ، އެއީ ކުރެވޭ ބޮޑު އިންވެސްޓްމެންޓެއް ކަމަށް ޑރ މުއިއްޒު ވިދާޅުވިއެވެ.