ލުބުނާނުގެ ދެކުނުގައި އިޒްރޭލުން އިއްޔެ ދިން ހަމަލާއެއްގައި ހިޒްބުاللهގެ އިސް ކޮމާންޑަރަކު ޝަހީދުކޮށްލާފައިވާކަމަށް އެ ޖަމާއަތުންއެ ޖަމާއަތުގެ އޮޕަރޭޝަންތަކާ ބެހޭ މައުލޫމާތު އެނގޭ ފަރާތްތަކުން ބުނެފި އެވެ.
އިޒްރޭލްގެ ހަމަލާގައި ޝަހީދުވި ވިސާމް ތަވީލް އަކީ ހިޒްބުالله ގެ އެލީޓް ރަދުވާން ފޯސްގެ ކޮމާންޑަރެއްގެ އިތުރުން މިހާތަނަށް ހަނގުރާމައިގައި މަރުވި ހިޒްބުاللهގެ އެންމެ ސީނިއާ އޮފިސަރެވެ. އަދި ދެކުނުގައި އެ ޖަމާއަތުގެ އޮޕަރޭޝަންތައް ހިންގުމުގައި އަލްތަވީލް އިސް ދައުރެއް އަދާކުރެއްވި ކަމަށް ލުބްނާނުގެ އިސް އޮފިޝަލަކު ވިދާޅުވި އެވެ.
މިދިޔަ އޮކްޓޯބަރު މަހުގެ ހަތް ވަނަ ދުވަހު ފަލަސްތީނުގެ ހަމާސް ޖަމާއަތުން ޣައްޒާއިން އިސްރާއީލަށް ދިން ހަމަލާއާއި ގުޅިގެން އެ ސަރަހައްދުގައި އުފެދިފައިވާ ހަމަނުޖެހުންތަކުގައި ރަދުވާނުގެ މެމްބަރުން ހިމެނޭ ގޮތަށް ހިޒްބުالله ގެ 130 އަށް ވުރެ ގިނަ ހަނގުރާމަވެރިން ވަނީ މަރުވެފަ އެވެ.
މިއީ 2006 ވަނަ އަހަރު އިޒްރޭލާއި އީރާނަށް ތާއީދުކުރާ ހިޒްބުالله އާ ދެމެދު ހިނގި އެންމެ ނުރައްކާތެރި ކުރިމަތިލުމެވެ.
ލުބްނާނުގެ ތިން މަސްދަރަކުން ބުނި ގޮތުގައި ބޯޑަރާ ގާތްގަނޑަކަށް 6 ކިލޯމީޓަރު ދުރުގައި އޮންނަ މަޖްދާލް ސެލްމް ނަމަކަށް ކިޔާ އަވަށެއްގައި އެ މީހުން ތިބި ކާރަށް ދިން ހަމަލާގައި ތަވީލާއި ހިޒްބުاللهގެ އިތުރު ހަނގުރާމަވެރިއަކު ވަނީ މަރުވެފަ އެވެ.
މިކަމާ ގުޅިގެން އިސްރާއީލުން ވަކި އެއްޗެއް ނުބުނެއެވެ.
އިސް މަސްދަރަކުން ބުނި ގޮތުގައި ސީރިއާ އާއި އިރާގުގައި ހިޒްބުاللهއާ އެކު ހަރަކާތްތެރިވި ތާވީލް އަވަހާރަވުމަކީ ލިބުނު ވަރަށް ބޮޑު ހިތާމައެކެވެ.
ހިޒްބުالله އިން ބުނީ އިސްރާއީލާ ދެކޮޅަށް މިހާރު ހިންގަމުން އަންނަ ކެމްޕެއިންގެ އަމާޒަކީ އޮކްޓޯބަރު މަހުގެ ހަތްވަނަ ދުވަހު ހަމާސް ޖަމާއަތުން ދިން ހަމަލާއަށް ފަހު އިސްރާއީލުން ދިން ހަމަލާއެއްގެ ސަބަބުން ހަލާކުވެފައިވާ ޣައްޒާގައި ތިބި ފަލަސްތީނަށް ތާއީދުކުރުން ކަމަށެވެ. ހިޒްބުالله އާއި އިސްރާއީލާ ދެމެދު ހިނގަމުންދާ ހަމަނުޖެހުންތައް ބޮޑަށް އަމާޒު ކުރެވިފައި ވަނީ ލުބްނާނާއި އިސްރާއީލުގެ ބޯޑަރު ކައިރީގައި ވާ ސަރަހައްދުތަކަށެވެ.
މިދިޔަ ހަފުތާގައި އިޒްރޭލުން ދިން ހަމަލާއެއްގައި ހިޒްބުاللهގެ ބާރުގެ ދަށުގައި އޮންނަ ބެއިރޫތުގެ ދެކުނުގެ އަވަށްތަކުގައި ހަމާސްގެ ޑެޕިއުޓީ ލީޑަރު ސާލިހް އަލް އަރޫރީ ޝަހީދުކޮށްލުމުން ނުތަނަވަސްކަން ވަނީ އިތުރުވެފަ އެވެ. އެ ހަމަލާގެ ޒިންމާ އިޒްރޭލުން ވަނީ ނަގާފައެވެ.
ހިޒްބުالله އިން ހޮނިހިރު ދުވަހު ބުނެފައި ވަނީ އަރޫރީ އަވަހާރަކޮށްލުމާ ގުޅިގެން އިބްތިދާއީ ޖަވާބެއްގެ ގޮތުން އިސްރާއީލުގެ މުހިންމު އޮބްޒަވޭޝަން ޕޯސްޓަކަށް 62 ރޮކެޓުން ހަމަލާދީފައިވާ ކަމަށެވެ.
މި ހަމަނުޖެހުންތަކުގައި މިދިޔަ ނޮވެމްބަރު މަހު އިޒްރޭލުން ދިން ހަމަލާއެއްގައި ޝަހީދުވި ރަދުވާން ފޯސްގެ އެހެން މެމްބަރުންގެ ތެރޭގައި ހިޒްބުاللهގެ މަޝްހޫރު ސިޔާސީ ބޭފުޅެއްގެ ދަރިކަލުން އައްބާސް ރާދު ވެސް ހިމެނެ އެވެ.
އާދީއްތަ ދުވަހު ހިޒްބުاللهގެ ޑެޕިއުޓީ ލީޑަރު ނާއިމް ޤާސިމް ވިދާޅުވީ އެ ޖަމާއަތުން “މުޅިން ހަނގުރާމަ ފަށަން ބޭނުން ނުވާ ކަމަށާއި، ނަމަވެސް އިޒްރޭލުން އެ ޖަމާއަތާއި ދެކޮޅަށް މުޅިން ހަނގުރާމަކުރަން ނިންމައިފިނަމަ، އެކަމަށް ޖަވާބުދޭނީ އެއްވެސް ފަސްޖެހުމެއް ނެތި” ކަމަށެވެ.
ސޫރިޔާގައި ހިނގަމުންދާ ހަމަނުޖެހުންތަކުގައި ވެސް ހިޒްބުاللهގެ 19 ހަނގުރާމަވެރިން ވަނީ މަރުވެފައެވެ.