އެމެރިކާގެ ރިޔާސީ އިންތިހާބުގައި ވާދަކުރުމަށް މިހާރުގެ ނައިބު ރައީސް ކަމަލާ ހެރިސްއަށް ހުރަސްތައް ފުނޑުފުނޑުވެފައިވާއިރު، އެމެރިކާގެ ރައީސް ޖޯ ބައިޑަން ކުއްލިގޮތަކަށް ރިޔާސީ އިންތިޚާބުގެ ރޭހުން ވަކިވެ، އެކަމަނާ އިންތިހާބުގައި ވާދަކުރުމަށް ވަނީ ތާއީދުކުރައްވާފަ އެވެ.
ބައިޑަން ރިޔާސީ ރޭހުން ފެޔަށް ޖެހުނުކަން އިއުލާން ކުރެއްވީ، ބަހުސްގެ ނާކާމިޔާބީއާ ކުރިމަތިލާން ޖެހި އުމުރުން 81 އަހަރުގެ ބައިޑަން ދެވަނަ ދައުރަކަށް މާ ބޮޑަށް ބަލިކަށިވެދާނެ ކަމުގެ ބިރު ހީވެފައި ވަނިކޮށެވެ.
ހެރިސް އަކީ ދެކުނު އޭޝިއާ ދަރިކޮޅުގެ ފުރަތަމަ އަންހެން، ކަޅު ނަސްލުގެ މީހަކު ނައިބު ރައީސްކަން ކުރެއްވި ބޭފުޅާއެވެ. ޑިމޮކްރެޓިކް ކެނޑިޑޭޓަކަށްވެ، ނޮވެމްބަރު މަހު ރިޕަބްލިކަން ޕާޓީގެ ކެންޑިޑޭޓް ޑޮނަލްޑް ޓްރަމްޕް ބަލިކޮށްފިނަމަ އެކަމަނާ ވެގެންދާނީ އެމެރިކާގެ ރައީސްކަން ކުރައްވާ ފުރަތަމަ އަންހެން ބޭފުޅާއަށެވެ.
ބައިޑަން އާދީއްތަ ދުވަހު ވިދާޅުވީ އޭނާގެ ރަނިންމޭޓަކަށް ހެރިސް ހޮވުމަކީ މިހާތަނަށް ނިންމުން އެންމެ ރަނގަޅު ނިންމުން ކަމަށާއި، ހެރިސް އަށް ތާއީދު ކުރައްވާ ކަމަށެވެ.
“ޑިމޮކްރެޓުން – މިއީ އެންމެން އެކަތިގަނޑަކަށްވެ ޓްރަމްޕް ބަލިކުރަންވީ ވަގުތު،” އެކްސްގައި އޭނާ ލިޔުއްވާފައިވެ އެވެ.
ބައިޑަން ވަކިވެވަޑައިގަންނަވަން ނިންމެވި ނިންމެވުމަކީ އަމިއްލަ އެދުމެއް ނެތް އަދި ގައުމިއްޔަތުގެ އަމަލެއްގެ ގޮތުގައި ސިފަކުރައްވައި ހެރިސް ވިދާޅުވީ އޭނާ ގެންދަވަނީ އެމެރިކާގެ ރައްޔިތުންނާއި ގައުމު އެހެން ހުރިހާ ކަމަކަށް ވުރެ އިސްކުރައްވަމުން ކަމަށެވެ.
“ރައީސްގެ އެންޑޯސްމަންޓް ލިބުމަކީ އަޅުގަނޑަށް ލިބޭ ޝަރަފެއް، އަޅުގަނޑުގެ ވިސްނުމަކީ މި ނޮމިނޭޝަން ހޯއްދަވައި ކާމިޔާބު ކުރުން،” ހެރިސް ވިދާޅުވި އެވެ.
ބައިޑަންގެ އިސްނެންގެވުމާ އެކު މަޝްހޫރު ޑިމޮކްރެޓުން ވަނީ އާދީއްތަ ދުވަހު ހެރިސް އާއި ހަލުވިކަމާއެކު ގުޅިވަޑައިގެންފަ އެވެ. ނަމަވެސް އެކަމަނާގެ ނަން ހުށަހެޅުމަކީ ކުރިން ނިންމި ނިންމުމެއް ނޫން ކަމަށާއި އަންނަ މަހު ޗިކާގޯގައި ބާއްވާ ކޮންވެންޝަންގެ ކުރިން އެހެން ކެނޑިޑޭޓުންނާ މެދު ވިސްނުމަށް އެ ޕާޓީން ވިދުވަރެއްހާ ހަލުވި “މިނީ ޕްރައިމަރީ” އެއް ބާއްވަން ޖެހޭ ކަމަށް ގިނަ ބަޔަކު ދަނީ ބުނަމުންނެވެ.
އޭޕީ-އެންއޯއާރްސީ ސެންޓާ ފޯ ޕަބްލިކް އެފެއާޒް ރިސާޗުން ދާދި ފަހުން ކުރި ސާވޭއަކުން ދައްކާ ގޮތުގައި ޑިމޮކްރެޓުންގެ ތެރެއިން ކޮންމެ 10 މީހަކުން ގާތްގަނޑަކަށް 6 މީހަކު ގަބޫލުކުރާ ގޮތުގައި ހެރިސް އެންމެ މަތީ ސްލޮޓުގައި ރަނގަޅު މަސައްކަތެއް ކުރައްވާނެ އެވެ. ޑިމޮކްރެޓުންގެ ތެރެއިން ކޮންމެ 10 މީހަކުން ގާތްގަނޑަކަށް 2 ބޭފުޅަކު އެކަމަނާ ގަބޫލު ނުކުރައްވާ ކަމަށާއި، 10 އިން އަނެއް ދެ ބޭފުޅަކު ވިދާޅުވަނީ ބުނާނެ އެއްޗެއް ނޭނގޭ ކަމަށެވެ.
ކުރީގެ ޕްރޮސެކިއުޓަރ އަދި ކެލިފޯނިއާގެ އެމެރިކާގެ ސެނެޓަރެއްގެ ގޮތުގައި ހުންނެވި ހެރިސް 2020 ވަނަ އަހަރުގެ ޑިމޮކްރެޓިކް ޕާޓީގެ ރިޔާސީ ކެންޑިޑޭޓަށް ކުރިމަތިލެއްވި ނަމަވެސް އަމިއްލަފުޅަށް ޕްރައިމަރީގެ ވޯޓު ނެގުމުގެ ކުރިން ވަނީ ނަން ނަގާފައެވެ. އޭގެ ފަހުން ބައިޑަންގެ ރަނިންމޭޓަކަށް އެކަމަނާ ވަޑައިގެންނެވި ނަމަވެސް ނައިބު ރައީސްކަމުގެ މަގާމާ ހަވާލުވެވަޑައިގަތުމަށްފަހު ކުރިއަށް ދިއުމުގައި ދަތިތަކެއް ކުރިމަތިވި އެވެ. ސެންޓްރަލް އެމެރިކާއިން ހިޖުރަކުރުމާ ގުޅޭ މައްސަލަތަކުގައި މަސައްކަތް ކުރަން ހަވާލުކުރި އިރު، ގަވައިދާ ހިލާފަށް ބޯޑަރު ހުރަސްކުރުމުގައި ދިމާވާ މައްސަލަތަކުގެ ތުހުމަތު ރިޕަބްލިކަން ޕާޓީން ތަކުރާރުކޮށް ހެރިސްއަށް ކުރެއެވެ.