ސަޢޫދީ އަރަބިއްޔާގެ ތެޔޮ ކުންފުނި އަރާމްކޯގެ އިދާރީ އިމާރާތަކަށް އަމާޒުކޮށް ދިން ހަމަލާއަކާ ގުޅިގެން އަލިފާނުގެ ހާދިސާއެއް ހިނގައިފިއެވެ. މި ހާދިސާ ހިނގާފައިވަނީ ސަޢޫދީ އަރަބިއްޔާއާއި ޔަމަނުގެ ހޫޘީ ހަނގުރާމަވެރިންނާ ދެމެދު ހަމަލާތައް ވަރުގަދަވަމުންދާ ދަނޑިވަޅެއްގައެވެ.
ޒަހްރާންގައި ހުންނަ އަރާމްކޯގެ އިދާރީ އިމާރާތަށް މި ހަމަލާ އަމާޒުވީ އަންގާރަ ދުވަހުގެ ހަވީރުގެ ވަގުތެއްގައެވެ. ސަޢޫދީގެ އެނާޖީ މިނިސްޓްރީން ބުނީ ކުއްލި ހާލަތްތަކުގައި ހަރަކާތްތެރިވާ އިދާރާތަކުން ވަގުތުން އަޅަންޖެހޭ ފިޔަވަޅުތައް އަޅާފައިވާ ކަމަށާއި، މި ހާދިސާގައި އެއްވެސް މީހަކަށް އަނިޔާއެއް ނުވަތަ ފުރާނައަށް ގެއްލުމެއް ލިބިފައިނުވާ ކަމަށެވެ.
މި ހަމަލާ ދީފައިވަނީ ސަޢޫދީ އަރާމްކޯގެ ވަސީލަތްތަކާ ދުރުހެލިވެ ތިބުމަށް ހޫޘީންގެ އަސްކަރީ ތަރުޖަމާނު ޔަޙްޔާ ސަރީޢު އާންމުންނަށާއި މުވައްޒަފުންނަށް އިންޒާރު ދީފައިވަނިކޮށެވެ. ހޫޘީން ބުނެފައިވަނީ ސަޢޫދީން ޔަމަނަށް ދެމުންދާ ހަމަލާތައް ކުރިއަށްގެންދާނަމަ، އަރާމްކޯގެ ތަންތަނަކީ ހަމަލާދެވިދާނެ ސައްހަ އަމާޒުތަކެއް ކަމަށެވެ.
މި ހާދިސާ ހިނގާފައިވަނީ ސަޢޫދީ އިސްވެ އޮންނަ ކޯލިޝަނުން ޔަމަނުގައި ހޫޘީންގެ ބާރުގެ ދަށުގައިވާ ސަރަހައްދުތަކަށާއި، ވެރިރަށް ސަންޢާ ކައިރީގައިވާ ތެޔޮ ރައްކާކުރާ މަރުކަޒަކަށް ވައިގެ ހަމަލާތަކެއް ދީފައިވަނިކޮށެވެ.
ކޯލިޝަނުން ވަނީ އެ ސަރަހައްދުތަކުން މީހުން ހުސްކުރުމަށް ކުރިން އިންޒާރު ދީފައެވެ. އަދި އެ އޮޕަރޭޝަނަކީ ސަޢޫދީ އަރަބިއްޔާއަށާއި ސަރަހައްދީ ސަލާމަތަށް ހޫޘީން ކުރިމަތިކުރާ ނުރައްކާތައް ކުޑަކުރުމުގެ މަގުސަދުގައި ކުރިއަށްގެންދިޔަ އޮޕަރޭޝަނެއް ކަމަށް ބުނެފައިވެއެވެ.
މީގެ އިތުރުން، ސަޢޫދީ އަސްކަރިއްޔާއިން ވައްޓާލި ހޫޘީ މިސައިލްތަކުގެ ބައިތައް ރިޔާޒަށް ވެއްޓި ހަތަރު މީހަކަށް އަނިޔާވެ، 15 ގެއަކަށް ގެއްލުން ލިބިފައިވާ ކަމަށްވެސް ސަޢޫދީ ކަމާބެހޭ އިދާރާތަކުން ރިޕޯޓުކޮށްފައިވެއެވެ.
ދެފަރާތުގެ ދެމެދުގައި ބަދަލުކުރެވެމުންދާ ހަމަލާތަކާ ގުޅިގެން، ސަޢޫދީގެ ހަކަތައިގެ ވަސީލަތްތަކުގެ ރައްކާތެރިކަމާމެދު އަދި މުޅި ސަރަހައްދުގެ ހަމަޖެހުމަށް ކޮށްފާނެ ނޭދެވޭ އަސަރުތަކާމެދު ކަންބޮޑުވުންތައް ވަނީ ބޮޑުވެފައެވެ.