އިންޑިއާ – ގާޒިއާބާދުގެ ކްރޮސިންގ ރިޕަބްލިކް ސޮސައިޓީގައި ދިރިއުޅޭ ޢާއިލާއެއްގައި 8 އަހަރު ވަންދެން މަސައްކަތްކުރި މެއިޑް ކާއެއްޗެއްސަށް ކުޑަކަމުދާ ތަކެތި އެއްކުރާކަން ފަޅާއަރައިފިއެވެ.
މިކަން ހާމަވެފައިވަނީ މަސައްކަތު މީހާ އެ އާއިލާއަށް ތައްޔާރުކުރާ ކާއެއްޗެއްސަށް ނުސާފު ތަކެތި އެއްކުރަމުން ގެންދާ ކަމަށް ތުހުމަތުކުރެވި، ޢާއިލާގެ މެންބަރުންގެ ސަމާލުކަމަށް ހޯދުމާއި ގުޅިގެންނެވެ.
އެގޮތުން އެ ޢާއިލާގެ މެންބަރުންނަށް ތަފާތު ބަލިތައް ޖެހެމުންދިއުމާ ގުޅިގެން، އެމީހުން ވަނީ އެކަން ހިނގާ ގޮތް ބެލުމަށް ބަދިގޭގައި ސިއްރު ކެމެރާއެއް ބެހެއްޓުމަށް ނިންމާފައެވެ. މި ފިޔަވަޅަކީ އެމީހުންގެ ދިރިއުޅުމަށް އައި ބޮޑު ބަދަލެއްގެ ފެށުމަށްވިއެވެ. ކެމެރާގެ ފުޓޭޖުން ދައްކައިދިނީ ހައިރާންކުރުވަނިވި މަންޒަރެކެވެ. ގޭގެ މަސައްކަތު މީހާ، ރީނާ، ކުޑަކަމުދާ ތަކެތި ފުށާ އެއްކޮށް، އެއިން ފުށްމޮޑެ ރޮށި ފިހާ މަންޒަރު ފެނުނެވެ.
މި ހޯދުމާ ގުޅިގެން، ޢާއިލާއިން ވަގުތުން ފުލުހުންނަށް މައްސަލަ ހުށަހެޅިއެވެ. ފުލުހުން މިހާރު ވަނީ މި މައްސަލަ ތަޙުޤީޤުކުރަން ފަށައި، ރީނާ ހައްޔަރުކޮށްފައެވެ.
އަދި ސުވާލުކުރުމުން، މި ހާދިސާއަށް އިޢުތިރާފުވެ، އޭނާގެ ވަޒީފާދޭ ފަރާތުން އޭނާ ކުރާ ކަންކަން ބަލައި، ކުދިކުދި ކުށްތަކަށް އަބަދުވެސް އޭނާއަށް ފާޑުކިޔާތީ، ބަދަލުހިފުމުގެ ގޮތުން މިކަން ކުރި ކަމަށް ބުނެފައިވެއެވެ.
ކުޑަކަމުދާ ތަކެތި ފަދަ ތަކެތި ކެއުމުން، ބަނޑުގެ އިންފެކްޝަނާއި ބޭރަށް ހިންގުން ފަދަ އެކި ޞިއްޙީ މައްސަލަތައް ކުރިމަތިވެދާނެކަން ޑޮކްޓަރުން ފާހަގަކޮށްފައިވެއެވެ.