ދ. ކުޑަހުވަދޫގައި ކޮމާޝަލް ނުވަތަ ވިޔަފާރި ބަނދަރެއް ގާއިމުކުރުމުގެ މަސައްކަތް މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަވާލުކޮށްފިއެވެ.
މި މަސައްކަތް ހަވާލުކުރުމުގެ އެއްބަސްވުމުގައި ސޮއިކުރެއްވީ އިޤްތިޞާދީ ތަރައްޤީއާ ވިޔަފާރިއާބެހޭ ވަޒީރު މުޙައްމަދު ސައީދުއާއި އެމްޕީއެލްގެ ސީއީއޯ މުހައްމަދު ރިޝްވާންއެވެ.
މި ޕޯޓުގެ މައިގަނޑު މަސައްކަތަކަށް ވާނީ ޕޯޓް-ޓު-ޕޯޓް ލޮޖިސްޓިކްސްއެވެ. އެމްޕީއެލުން މި ޕޯޓް ތަރައްގީކުރާއިރު، އެކި ބާވަތުގެ ވިޔަފާރި ޚިދުމަތްތައް ލިބޭނެ ގޮތަށް ތަރައްގީކުރުމަށް ވަނީ ނިންމާފައެވެ. މީގެ އިތުރުން، ކުރިއަށް އޮތް ތަނުގައި ކުޑަހުވަދޫގައި ބޮންޑަޑް ވެއަރހައުސްއެއް ގާއިމުކޮށް އިތުރު ޚިދުމަތްތައް ތަޢާރަފުކުރުމަކީވެސް އެމްޕީއެލްގެ ވިސްނުމެއް ކަމަށް އެ ކުންފުނިން ބުނެފައިވެއެވެ.
ކުޑަހުވަދޫއަކީ ރައީސް ޑރ. މުޙައްމަދު މުއިއްޒު އާބަން ސެންޓަރުތައް ތަރައްގީކުރުމަށް ކަނޑައަޅުއްވާފައިވާ ހަތް ރަށުގެ ތެރޭގައި ހިމެނޭ ރަށެކެވެ.
ކުޑަހުވަދޫ ވިޔަފާރި ބަނދަރު ތަރައްޤީކުރުމާއި ގުޅޭގޮތުން ވާހަކަދައްކަވަމުން ރައީސް ވިދާޅުވީ އެރަށުގައި ވިޔަފާރި ބަނދަރެއް ތަރައްޤީކުުރުމުގެ ވާހަކައަކީ އަބަދުވެސް ދެކެވޭ ވާހަކައެއްކަމަށާއި ނަމަވެސް މިހާތަނަށްވެސް އެ މަޝްރޫޢު ޙަޤީގަތަކަށް ހެދުމަށް އެއްވެސް ސަރުކާރަކުން މަސައްކަތްކޮށްފައި ނެތްކަމަށެވެ.
އެ މަނިކުފާނު ވިދާޅުވީ އެ ރަށުގެ ރައްޔިތުންނަށް ވެފައިވާ ވަޢުދުތަކުގެ އިތުރުން، އެ ރަށް އާބަން ސެންޓަރަކަށް ހެދުމަށްޓަކައި ކުރަންޖެހޭ ހުރިހާ ކަމެއް މި ދައުރުގައި ކުރައްވާނެ ކަމަށެވެ. ރައީސް މުޢިއްޒު ފާހަގަކުރެއްވި ގޮތުގައި މި ޕޯޓް ތަރައްގީވެގެން ދިޔުމުން އޭގެ ނަފާއާއި އިގްތިސާދީ ކުރިއެރުން ރައްޔިތުންނަށް ލިބިގެންދާނެއެވެ. އަދި އާބާދީ އެއްފަސްކުރުމުގެ ސިޔާސަތުގެ ދަށުން އެ ރަށަށް ހިޖުރަކުރަން ބޭނުންވާ ފަރާތްތަކަށް އެ ފުރުސަތު ދީ، ރަށުގައި އިތުރު ހައުސިންގ މަޝްރޫޢުތައް ހިންގާނެ ކަމުގެ ޔަގީންކަންވެސް ރައްޔިތުންނަށް ދެއްވާފައިވެއެވެ.