ގައުމެއްގެ ދެމިއޮތުމަށް އަންހެނުންގެ ދައުރާއި ބައިވެރިވުން ކޮންމެހެން މުހިންމު ކަމަށާއި، އަންހެނުންގެ ފުރިހަމަ ބައިވެރިވުމާއި ވާގިވެރިކަން ނެތި އެއްވެސް ވަޒަނެއް ދެމި ނޯންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ފާހަގަކުރަމުންދާ ބައިނަލްއަގުވާމީ އަންހެނުންގެ ދުވަހާ ގުޅިގެން ރައީސް ދެއްވި ޚާއްސަ ޙިތާބުގައި ވިދާޅުވެފައިވަނީ، މުޖުތަމަޢުގެ ކުރިއެރުމާއި ތަރައްޤީއަށް އަންހެނުންގެ ދައުރު އަދާކުރުން މުހިންމު ކަމަށެވެ. އެގޮތުން ތަޢުލީމީ ދާއިރާއާއި، ޞިއްޙީ ދާއިރާއާއި، އިޖުތިމާޢީ ޚިދުމަތްތަކާއި، ވެރިކަން ހިންގުމާއި، އިޤްތިޞާދީ މަސައްކަތްތަކުގައި އަންހެނުންގެ ބައިވެރިވުން މުހިންމު ކަމަށް ފާހަގަކުރެއްވިއެވެ.
ސަރުކާރުގެ އެންމެ އިސް އަމާޒުތަކުގެ ތެރޭގައި އަންހެނުންނަށް ފުރުޞަތުތައް ފަހިކޮށްދިނުމާއި، ސަރުކާރު ހިންގުމުގައި އަންހެނުންގެ ދައުރު އިތުރުކުރުން ހިމެނޭ ކަމަށް ރައީސް ވިދާޅުވިއެވެ. އަދި އަންހެނުންނަކީ ފުދުންތެރި، ބާރުވެރި ބަޔަކަށް ހެދުމަށް މަސައްކަތްކުރަމުންދާ ކަމަށްވެސް ފާހަގަކުރެއްވިއެވެ.
ދިވެހި އަންހެނުންގެ ހީވާގިކަން
ދިވެހި ތާރީޚުގެ އެންމެ ކުރީ ޒަމާނުއްސުރެ އަންހެނުންގެ ހީވާގިކަމާއި، މުރާލިކަމާއި، ގެވެހިކަމާއި، ސާފުތާހިރުކަމަށް ލޯބިކުރާކަން ފާހަގަކުރެވިފައިވާ ކަމަށް ރައީސް ވިދާޅުވިއެވެ. އަދި ދިވެހި އުއްމަތް ސުލްޙަވެރިކަމާއެކު ދެމެހެއްޓުމުގައި އަންހެނުންގެ ދައުރު މުހިންމު ކަމަށްވެސް ފާހަގަކުރެއްވިއެވެ.
ދިވެހި އާއިލާތަކަށް އޯގާތެރިކަމާއެކު ޚިދުމަތްކުރާ އަންހެނުންނަކީ، ޤައުމުގެ ތަރައްޤީއާއި ތަހުޒީބަށް މުހިންމު ހިއްސާއެއް ކޮށްފައިވާ ބައެއް ކަމަށް ރައީސް ވިދާޅުވިއެވެ. އަދި މިހާތަނަށް ކުރެވުނު ކޮންމެ ކާމިޔާބު މަސައްކަތެއްގައިވެސް އަންހެނުންގެ ފުރިހަމަ އެއްބާރުލުން ލިބިފައިވާ ކަމަށް ފާހަގަކުރެއްވިއެވެ.
މީގެއިތުރުން، ކުޅިވަރުގެ މައިދާނުގައި ދިވެހި އަންހެން ކުޅުންތެރިން ހޯދަމުންދާ ކާމިޔާބީތަކާއި، މުޖުތަމަޢުގެ އެކި ދާއިރާތަކުގައި އަންހެން ޚިދުމަތްތެރިން އަދާކުރަމުންދާ މުހިންމު ދައުރު ރައީސް ފާހަގަކުރެއްވިއެވެ.