މިއަހަރުގެ ރަމަޟާންމަހު ބާޒާރުގެ އަގުތައް މަތި ނުވެ، އެއްހަމައެއްގައި ވަނީ ހިފެހެއްޓިފައިވާކަމަށް އިޤްތިޞާދީ ވުޒާރާއިން ހާމަކޮށްފިއެވެ. މިކަން ހާސިލްވެފައިވަނީ އަސާސީ ކާބޯތަކެތީގެ އަގުތައް އެއްހަމައެއްގައި ހިފެހެއްޓުމަށް ސަރުކާރުން ކުރަމުންދާ މަސައްކަތްތަކުގެ ސަބަބުން ކަމަށް އެ ވުޒާރާއިން ބުނެފައިވެއެވެ.
ރަމަޟާން މަހުގެ ފުރަތަމަ 10 ދުވަހުގެ ތެރޭގައި ބާޒާރުން އެއްވެސް ބާވަތެއް ލިބުން ދަތިވެފައި ނުވާކަމަށް އެ ވުޒާރާއިން ފާހަގަކޮށްފައިވެއެވެ. އަދި ހުރިހާ ބާވަތެއްގެ މުދާވެސް ފަސޭހަކަމާއެކު ލިބެން ހުރިކަމަށް ބުނެފައިވެއެވެ. ޚާއްޞަކޮށް މަހުގެ ބާވަތްތަކުގެ އަގުތަކަށްވެސް ރަމަޟާން މަސް ފެށުނު ފަހުން އެއްވެސް ބަދަލެއް އައިސްފައި ނުވާކަން ވަނީ ފާހަގަކޮށްފައެވެ.
އިޤްތިޞާދީ ވުޒާރާއިން ދަނީ ރޯދަމަހު އާންމުކޮށް ބޭނުންކުރާ އަސާސީ ކާބޯތަކެތީގެ އަގުތައް މޮނިޓަރކޮށް، މި ތަކެތި ބާޒާރުގައި ލިބެން ހުރިކަން ކަށަވަރު ކުރުމުގެ މަސައްކަތް ކުރަމުންނެވެ. މިގޮތުން މާލެ ސަރަހައްދުގައި މިނިސްޓްރީގެ އިންސްޕެކްޓަރުން ވަނީ އަގުތައް ބަލައި މޮނިޓަރ ކުރުމުގެ މަސައްކަތުގައި ހަރަކާތްތެރިވަމުންނެވެ.
ކޮންމެ އަހަރެއްގެ ރަމަޟާން މަހާ ދިމާކޮށް ބައެއް މުދަލުގެ އަގުތައް މައްޗަށް ދިއުމަކީ އާންމު ކަމަކަށް ވެފައިވާއިރު، މިއަހަރު އެފަދަ ކަމެއް ދިމާވިޔަ ނުދިނުމަށް ސަރުކާރުން އަޅާފައިވާ ފިޔަވަޅުތަކުގެ ސަބަބުން އަގުތައް ވަނީ ހަމަޖެހިފައިވާ މިންގަނޑުގައި ހިފެހެއްޓިފައެވެ.