މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މާލެ ކޮމާޝަލް ހާބަރުގައި އައު ހެލްތް އެންޑް ސޭފްޓީ ފެސިލިޓީއެއް ހުޅުވައިފިއެވެ.
މި ފެސިލިޓީއަކީ ބަނދަރުގެ ސަލާމަތީ ކަންކަން ހަރުދަނާކޮށް، ކުއްލި ހާލަތްތަކުގައި އަވަސް ޚިދުމަތްތައް ފޯރުކޮށްދިނުމަށް ހުޅުވި ފެސިލިޓީއެއްކަމަށް އެމްޕީއެލް އިން ބުނެފައިިވެއެވެ.
އެމްޕީއެލުން ބުނީ މި އައު ފެސިލިޓީގެ ސަބަބުން ބަނދަރުގެ ކުއްލި ހާލަތްތަކަށް ތައްޔާރުވެ އިޖާބަދިނުމުގެ ޤާބިލްކަން އިތުރުވެ، ފަސްޓް އެއިޑް ޚިދުމަތްތައް ފުޅާވެގެންދާނެކަމަށާއި އަދި މުޅި ބަނދަރުގެ ސިއްހަތާއި ސަލާމަތީ މަސައްކަތްތައް އިތުރަށް ހަރުދަނާވެގެންދާނެ ކަމަށެވެ.
އެމްޕީއެލްގެ މި އިސްނެގުމަކީ ބަނދަރުގެ މުވައްޒަފުންނާއި ޚިދުމަތް ހޯދާ ފަރާތްތަކުގެ ރައްކާތެރިކަމަށް އިސްކަންދީގެން އެޅުނު މުހިންމު ފިޔަވަޅެކެވެ. މި ފެސިލިޓީގައި ޒަމާނީ ވަސީލަތްތަކާއި ތަމްރީނު ލިބިފައިވާ މުވައްޒަފުން މަސައްކަތް ކުރަމުންދާނެއެވެ.
ބަނދަރުގެ މަސައްކަތްތައް އިތުރަށް ރައްކާތެރިކަމާއެކު ކުރިއަށް ގެންދިއުމަށް މި ފެސިލިޓީން މަގުފަހިވެގެންދާނެ ކަމަށް އެމްޕީއެލްއިން ބުނެފައިވެއެވެ. އަދި މިއީ ކުންފުނީގެ ހެލްތް އެންޑް ސޭފްޓީ ސްޓޭންޑަޑްތައް ބައިނަލްއަޤްވާމީ ފެންވަރަށް ގެންދިއުމަށް އެޅޭ މުހިންމު ފިޔަވަޅެއް ކަމުގައިވެސް ފާހަގަކޮށްފައިވެއެވެ.



