ޕޯޓްސް ލިމިޓެޑްގެ 15 އަންހެން އޮފިޝަލުން އިންޑިއާގެ ޖަވާހަރުލާލް ނެހުރޫ ޕޯޓް އޮތޯރިޓީ (ޖޭއެންޕީއޭ) އަށް ތަމްރީން ޕްރޮގްރާމެއްގައި ބައިވެރިވުމަށް ފުރައިފިއެވެ.
އިންޑިއާ ހައިކޮމިޝަނުން ބުނިގޮތުގައި ޕޯޓްސް އަންހެން އޮފިޝަލުންގެ މި ޒިޔާރަތަކީ ދިވެހިރާއްޖެ އާއި އިންޑިއާ ގުޅިގެން އެކުލަވާލާފައިވާ ވިޝަން ޑޮކިއުމަންޓްގައި ހިމެނޭ އަންހެނުންގެ ތަރައްޤީއަށް މަގުފަހިކުރުމުގެ އަމާޒަށް އިތުރު ކުރިއެރުމެއް ގެނެސްދޭނެ ކަމެއް ކަމަށެވެ. މި ޒިޔާރަތް ކުރިއަށްދާނީ މި މަހުގެ 20 އިން 26 އަށް ކަމަށް ވެސް އެފަރާތުން ބުނެފައިވެއެވެ.
ޕޯޓްސް ލިމިޓެޑުން ބުނިގޮތުގައި މި ޒިޔާރަތުގައި އަންހެނުންގެ ލީޑަރޝިޕް ތަމްރީނާއި ޕޯޓް ޒިޔާރަތް ހިމެނޭ ކަމަށެވެ. އަދި މެރިޓައިމް ދާއިރާގައި އަންހެނުންގެ ދައުރު ފުޅާކުރުމަށް މަސައްކަތްކުރަމުންދާ ކަމަށާއި މިއީ ފަޚުރުވެރި ވަގުތެއް ކަމަށް ވެސް ބުނެފައިވެއެވެ.
މި ޒިޔާރަތަކީ ދެ ގައުމުގެ ގުޅުން އިތުރަށް ބަދަހިކޮށް، ޚާއްސަކޮށް މެރިޓައިމް ދާއިރާގައި އަންހެނުންގެ ބައިވެރިވުން އިތުރުކުރުމަށް މުހިންމު ފިޔަވަޅެއް ކަމަށް ބެލެވެއެވެ.



