މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ 200 އަށްވުރެ ގިނަ މުވައްޒަފުން ބައިވެރިވެގެން ކ. ވިލިނގިލީގައި ކުރިއަށްގެންދިޔަ ދެ ދުވަހުގެ ޓްރެއިނިންގ ޕްރޮގްރާމެއް އިއްޔެ ނިންމާލައިފިއެވެ. އެމްޕީއެލުން ހާމަކުރިގޮތުގައި މި ޕްރޮގްރާމަކީ 28 އާއި 29 އޭޕްރިލް 2025 ގައި ދެ ބެޗަކަށް ބަހާލައިގެން ކުރިއަށް ގެންދިޔަ ޕްރޮގްރާމެކެވެ.
ރިއަލްޓީ ކޮންސަލްޓަންސީ މޯލްޑިވްސްއިން އިންތިޒާމްކޮށްގެން ކުރިއަށް ގެންދިޔަ މި ޕްރޮގްރާމުގައި މައިގަނޑު ގޮތެއްގައި އަމާޒުކުރެވިފައިވަނީ މުވައްޒަފުންގެ މެދުގައި މުވާސަލާތުކުރުމުގެ ހުނަރުތައް އިތުރުކުރުމަށާއި، އިތުބާރު ބިނާކުރުމަށާއި، ޓީމް ވަރކް ހަރުދަނާކުރުމަށް ކަމަށް އެމްޕީއެލުން ބުނެފައިވެއެވެ.
މި ޕްރޮގްރާމުގެ ސަބަބުން މައްސަލަތައް ހައްލުކުރުމުގައާއި، ގުޅިގެން ނިންމަންޖެހޭ ނިންމުންތައް ނިންމުމުގައި މުވައްޒަފުންގެ ޤާބިލުކަން އިތުރުވެ، މަސައްކަތުގެ މާހައުލުގައި މުވައްޒަފުންގެ މެދުގައި އޮންނަ ގުޅުން ބަދަހިވެގެންދާނެ ކަމަށް އެމްޕީއެލްއިން ބުނެފައިވެއެވެ.
އެމްޕީއެލްއިން މަޢުލޫމާތު ދިން ގޮތުގައި މިއީ އެ ކުންފުނީގެ މުވައްޒަފުންގެ ތަރައްޤީއަށާއި ހުނަރުވެރި، ފޯރިގަދަ ޓީމްތަކެއް އުފެއްދުމަށް ކުރަމުންދާ މަސައްކަތުގެ ތެރެއިން އެޅުނު އިތުރު ފިޔަވަޅެކެވެ.
އެމްޕީއެލްއިން ވަނީ މުވައްޒަފުންގެ ތަރައްޤީއަށް އަމާޒުކޮށްގެން މިފަދަ އެކި ޕްރޮގްރާމްތައް ކުރިއަށް ގެންދިއުމަށް ރޭވިފައިވާ ކަމަށާއި، ކުރިއަށް އޮތް ތަނުގައިވެސް މިފަދަ ޕްރޮގްރާމްތައް ހިންގުމަށް ރޭވިފައިވާ ކަމަށް ބުނެފައެވެ.