ކްރިއޭޓިވް ނެޓްވޯކް ސްޓޫޑިއޯ އިން އުފައްދާ ފުރަތަމަ ފީޗާ ފިލްމުގެ ފުރަތަމަ ފެނިލުން ދައްކާލައިފި އެވެ.
މި ވީޑީއޯގައި މި ފިލްމުގެ ނަން ހާމަކޮށްފައެއް ނުވެ އެވެ.
10 ސިކުންތުގެ މި ވީޑިއޯ ފަށަނީ އުސް ފައިވާނަކަށް އަރައިގެން ހުރި އަންހެނެއްގެ ފައި ބިންމައްޗަށް އަޅާ މަންޒަރުންނެވެ. އެއާއކު ބިންމަތީގައިވާ ފަތްތައް ބުރައިގެން ދެ އެވެ. މި ވަގުތުކޮޅުގެ ފަހަތުން ދެން ފެންނަނީ ބޮތްކެކެވެ. އޭގެ މައްޗަށް ލޭގެ ދެތިކި ވެއްޓިގެން ދެ އެވެ. މިމަންޒަރުތަކުުގެ ތެރެއިން އިވެނީ “ބަލަ މަ މީ މުޅި ހިންނަވަރަށް މަޝްހޫރު…” މިހެންނެވެ. އެއާއެކު ޖުމްލަ ފުރިހަމަ ނުވަނީސް އަޑު ކެނޑެ އެވެ.
މި ޓީޒާ ކުރު ނަމަވެސް، އޭގެ ފަންނުވެރިކަމުގެ ކުލަވަރާއި ސިއްރު ރަމްޒީ ކަންތައްތަކުގެ ސަބަބުން މަޝްވަރާތައް ފެށޭނެ އެވެ. މި ވީޑިއޯގައި އިވޭ އަޑަކީ ރާއްޖޭގެ މަޝްހޫރު ބަތަލާ އައިޝާ އަލީގެ އަޑު ކަމަށް ގަބޫލު ކުރެވެ އެވެ. އެހެންކަމުން ފިލްމުގެ ލީޑް ރޯލުން އޭނާ ފެނިދާނެ ކަމަށް އިޝާރާތް ކުރެވެ އެވެ. ނަމަވެސް ކްރިއޭޓިވް ނެޓްވޯކް ސްޓޫޑިއޯ އިން އަދި އެ ފިލްމްގެ ތަރިން ކަށަވަރުކޮށްދީފައި ނުވާއިރު، އެހެން ކާސްޓުންވެސް ހާމަކޮށްފައެއް ނުވެ އެވެ.
ޓީޒާ ނިންމާލަނީ މި އަހަރުގެ ކޮންމެވެސް ދުވަހަކުން ފިލްމު ސިނަމާތަކުގައި ރިލީޒްކުރާނެ ކަމުގެ މެސެޖަކުންނެވެ. ސީދާ ރިލީޒްކުރާނެ ތާރީހެއް ހާމަކޮށްފައި ނުވި ނަމަވެސް، ޓީޒާއިން ވަނީ ގިނަ ބައެއްގެ ޝައުގުވެރިކަން ކާމިޔާބުކަމާއެކު ހޯދައިފަ އެވެ.
