މާލޭ ކޮމާޝަލް ހާބަރުގައި ދިމާވެފައިވާ ޖާގައިގެ ދަތިކަމާއި އިންފްރާސްޓްރަކްޗަރގެ ގޮންޖެހުންތަކަށް ހައްލެއް ހޯދުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ކުރިއަށްގެންދާ ތިލަފުށީ ޕޯޓު ތަރައްޤީކުރުމުގެ މަޝްރޫޢު ކުރިއަށްދަނީ ހަލުވި ދުވެއްޔެއްގައެވެ. މި މަޝްރޫޢުގެ ސަބަބުން 2026 ވަނަ އަހަރާ ހަމައަށް ރާއްޖޭގެ ބަނދަރުތަކުގެ ހިދުމަތުގެ ފެންވަރާއި ޖާގަ އިތުރުވެގެންދާނެ ކަމަށް ބެލެވޭކަމަށް އެމްޕީއެލުން ވަނީ ބުނެފައެވެ.
255 މިލިއަން ޑޮލަރުގެ މި މަޝްރޫޢުގެ ފުރަތަމަ ފިޔަވަހީގެ އަގަކީ 35 މިލިއަން ޑޮލަރެވެ. މި މަޝްރޫޢަށް ސަރުކާރުން ވަނީ ތިލަފުށިން 60 ހެކްޓަރުގެ ބިން ކަނޑައަޅާފައެވެ. މަޝްރޫޢުގެ މަސައްކަތް ކުރިއަށް ގެންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިންނެވެ.
އެމްޕީއެލްގެ ޗީފް ސްޓްރެޓެޖީ އޮފިސަރ މުހައްމަދު އަމީޒް ވިދާޅުވި ގޮތުގައި މިހާރު ކުރިއަށް ދަނީ އެމްޓީސީސީއާ ގުޅިގެން ހުސް ކޮންޓެއިނަރު ޑިޕޯއެއް ޤާއިމްކުރުމުގެ މަސައްކަތެވެ.
“އައު ޕޯޓަށް ބައެއް ކޮންޓެއިނަރ ޓާމިނަލްގެ މަސައްކަތް ބަދަލުކުރެވުމުން މާލޭ ކޮމާޝަލް ހާބަރު ސަރަހައްދުގެ ތޮއްޖެހުން ވަރަށް ބޮޑަށް ކުޑަވެގެންދާނެ.” އަމީޒް ވިދާޅުވި އެވެ.
ފުރަތަމަ ފިޔަވަހީގައި 70 މީޓަރުގެ ކީވޯލްއަކާއި ތިލަފުށީ އިންޓަނޭޝަނަލް ލޮޖިސްޓިކްސް ޓާމިނަލް (އައިއެލްޓީ) ތަރައްޤީކުރެވޭނެއެވެ. މި މަސައްކަތް 2025 ގެ މެދުތެރޭގައި ނިމުމުން، މިހާރު މާލޭ ކޮމާޝަލް ހާބަރާއި ހުޅުމާލޭ އިންޓަނޭޝަނަލް ޓާމިނަލްގައި ރައްކާކުރެވިފައި ހުންނަ ހުސް ކޮންޓެއިނަރުތައް އެތަނަށް ބަދަލުކުރެވޭނެއެވެ.
“މިހާރު މާލޭ ޕޯޓުގައި މުދާ އަޅާފައި ހުންނަ ކޮންޓެއިނަރުތަކާއި ހުސް ކޮންޓެއިނަރުތައް ވެސް ބަލަހައްޓަމުން މިގެންދަނީ. މުދާ ބާލާ ނިމުމަށްފަހު ހުސް ކޮންޓެއިނަރުތައް ގިނަ ދުވަހު ހުންނަނީ ޕޯޓުގައި. މި ކޮންޓެއިނަރުތައް ތިލަފުއްޓަށް ބަދަލުކުރެވުމުން ޖާގައިގެ ދަތިކަން ހައްލުވެ، މުދާ ކްލިއަރކުރުމުގެ މަސައްކަތް އަވަސްވެގެންދާނެ.” އެމްޕީއެލްގެ ޗީފް ޓެކްނިކަލް އޮފިސަރ ހުސެއިން ނަޢީމް ވިދާޅުވި އެވެ.
ދެވަނަ ފިޔަވަހީގައި 375 މީޓަރުގެ އިންޓަނޭޝަނަލް ބަރތަކާއި، 2.3 ކިލޯމީޓަރުގެ ޑޮމެސްޓިކް ކީވޯލްއަކާއި، ކޮންޓެއިނަރ ފްރެއިޓް ސްޓޭޝަނެއް ޤާއިމްކުރެވޭނެއެވެ. މީގެ ސަބަބުން ޕޯޓުގެ ކޮންޓެއިނަރ ރައްކާކުރުމުގެ ޖާގަ 3،000 އިން 10،000 އަށް އިތުރުވެގެންދާނެއެވެ. މި މަޝްރޫޢުގެ ސަބަބުން ލޮޖިސްޓިކްސްގެ ޚަރަދު ކުޑަވެ، އިމްޕޯޓް މުދަލުގެ އަގު ވެސް ތިރިވެގެންދާނެ ކަމަށް އެމްޕީއެލްއިން ލަފާކުރެއެވެ.