އިސްރާއީލުން ޣައްޒާއަށް ދެމުންގެންދާ ހަމަލާތަކުގައި ކޮންމެ ގަޑިއިރަކު އެއް އަންހެނަކު ޝަހީދުވަމުންދާ ކަމަށް އދ. ގެ އަންހެނުންގެ ޙައްޤުތަކާ ބެހޭ އޭޖެންސީ، ޔޫއެން ވިމެން އިން ބުނެފިއެވެ.
މި ހަނގުރާމަ ފެށުނީއްސުރެ މިހާތަނަށް 28،000 އަށްވުރެ ގިނަ އަންހެނުންނާއި އަންހެން ކުދިން ޝަހީދުވެފައިވާ ކަމަށް އެ އޭޖެންސީން ހާމަކޮށްފައިވެއެވެ. މީގެ ތެރޭގައި ހިމެނެނީ ހާސްތަކެއް މައިން ކަމަށާއި، އެ މައިންގެ ދަރިންނާއި، އާއިލާތަކާއި މުޅި މުޖުތަމައު ވަނީ ނިކަމެތި ހާލަތަކަށް ވެއްޓިފައި ކަމަށް އެ އޭޖެންސީން ބުނެފައިވެއެވެ.
މާރޗް މަހު ހުއްޓުނު ހަނގުރާމައިގެ ވަގުތީ ހުއްޓުން ނިމުމަށްފަހު، ޣައްޒާގެ ހާލަތު ވަނީ ވަރަށް ބޮޑަށް ގޯސްވެފައި ކަމަށް އެ އޭޖެންސީން ފާހަގަކޮށްފައިވެއެވެ. މި ހާލަތު އިތުރަށް ގޯސްވެފައިވަނީ އިސްރާއީލުން ގާތްގަނޑަކަށް 9 ހަފްތާއަށް އިންސާނީ އެހީ ވެއްދުން ހުއްޓުވާލުމާ ގުޅިގެންނެވެ.
ޣައްޒާގެ ރައްޔިތުންނަށް ކާބޯތަކެއްޗާއި އަސާސީ ބޭނުންތަކުގެ ތަކެތީގެ ބޮޑު ދަތިކަމެއް ކުރިމަތިވެފައިވާ ކަމަށާއި، ބަނޑުހައިހޫނުކަމުގެ ނުރައްކާ އިތުރުވަމުންދާ ކަމަށް ޔޫއެން ވިމެން އިން ވަނީ އިންޒާރު ދީފައެވެ. މީގެ ސަބަބުން އަންހެނުންނާއި އަންހެން ކުދިންނަށް ކުރިމަތިވެފައިވަނީ ނުރައްކާތެރި މިންވަރަކަށް ބަނޑުހައިހޫނުކަމެވެ.
އޮކްޓޯބަރު 7، 2023 އިން ފެށިގެން އިސްރާއީލުގެ ހަމަލާތަކުގައި ޝަހީދުވި ފަލަސްތީނުގެ ރައްޔިތުންގެ އަދަދު 53،500 އަށްވުރެ އިތުރުވެފައިވާ ކަމަށާއި، 122،000 އަށްވުރެ ގިނަ މީހުން ޒަޚަމްވެފައިވާ ކަމަށް އެންމެ ފަހުގެ ތަފާސްހިސާބުތަކުން ދައްކައެވެ.