މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މުވައްޒަފުންނަށް އަމާޒުކޮށްގެން ކުންފުނީގެ ހެލްތް އެންޑް ސޭފްޓީ ޑިޕާޓްމަންޓާއި ލާނިންގ އެންޑް ޑިވެލޮޕްމަންޓް ޑިޕާޓްމަންޓް ގުޅިގެން ކުރިއަށް ގެންދިޔަ އަލިފާނުން ރައްކާތެރިވުމުގެ އަސާސީ ތަމްރީން ޕްރޮގްރާމް ނިންމާލައިފިއެވެ.
މިމަހު 15 އިން 17 އަށް ކުރިއަށް ގެންދިޔަ މި ތަމްރީން ޕްރޮގްރާމްގައި އެމްޕީއެލްގެ އެކި ޑިޕާޓްމަންޓްތަކުން ޖުމްލަ 130 މުވައްޒަފުން ބައިވެރިވެފައިވެއެވެ. މި ތަމްރީން ޕްރޮގްރާމް ކުރިއަށް ގެންގޮސްފައިވަނީ ތިން ބެޗަކަށް ބަހާލައިގެންނެވެ.
މި ތަމްރީން ޕްރޮގްރާމްގެ މައިގަނޑު މަޤްޞަދަކީ މުވައްޒަފުންގެ މެދުގައި އަލިފާނުގެ ރައްކާތެރިކަމާ ގުޅޭ ހޭލުންތެރިކަން އިތުރުކޮށް، ކުއްލި ހާލަތްތަކުގައި އަމަލުކުރާނެ ގޮތުގެ ޤާބިލްކަން އިތުރުކުރުން ކަމަށް އެމްޕީޢެލުން ބުނެފައިވެއެވެ. މި ތަމްރީން ޕްރޮގްރާމަކީ އެމްޕީއެލްއިން މުވައްޒަފުންގެ ރައްކާތެރިކަމަށް އިސްކަންދީ، މަސައްކަތުގެ މާހައުލު އިތުރަށް ރައްކާތެރިކުރުމަށް ކުރަމުންދާ މަސައްކަތްތަކުގެ ތެރެއިން ބައެކެވެ.
މިފަދަ ތަމްރީން ޕްރޮގްރާމްތައް ގަވާއިދުން ކުރިއަށް ގެންދިއުމަކީ ކުންފުނީގެ އިސް އަމާޒުތަކުގެ ތެރޭގައި ހިމެނޭ ކަމެއް ކަމަށް އެމްޕީއެލްއިން ފާހަގަކޮށްފައިވެއެވެ.



