އިސްރާއީލުގެ އަސްކަރިއްޔާއިން ޣައްޒާގެ އެކި ސަރަޙައްދުތަކަށް އަދިވެސް ދަނީ ހުއްޓުމެއްނެތި ހަމަލާދެމުންނެވެ. މިގޮތުން އަލް-ޒައިތޫން އަދި ޝެއިޚް ރަދްވާން ފަދަ ސަރަޙައްދުތަކަށް ދެމުންދާ ހަމަލާތަކުގައި އިއްޔެ ފަތިހުން ފެށިގެން މިހާތަނަށް 76 ފަލަސްތީނު ރައްޔިތުން ޝަހީދުވެ، އެތައް ބަޔަކު ޒަޚަމްކޮށްލާފައިވެއެވެ.
މެޑިކަލް ވަސީލަތްތަކުން ހާމަކުރި ގޮތުގައި، އަލް-ޝިފާ މެޑިކަލް ކޮމްޕްލެކްސްއަށް 38 ހަށިގަނޑު ގެންގޮސްފައިވެއެވެ. މީގެ އިތުރުން ޝެއިޚް ރަދްވާން ކްލިނިކަށް 2 ހަށިގަނޑު، އަލް-އަހްލީ އަރަބް ހޮސްޕިޓަލަށް 7 ހަށިގަނޑު، އަލް-އައުދާ ހޮސްޕިޓަލަށް 9 ހަށިގަނޑު، ދެއިރް އަލް-ބަލަޙްގެ އަލް-އަޤްޞާ ޝަހީދުންގެ ހޮސްޕިޓަލަށް 5 ހަށިގަނޑު، އަދި ޚާން ޔޫނިސްގެ ނާސިރު ހޮސްޕިޓަލަށް 15 ހަށިގަނޑު ގެންދިޔައެވެ.
އެންމެ ފަހުން ހިނގި އަނިޔާވެރި ހަމަލާތަކުގެ ތެރޭގައި، އުތުރު ޣައްޒާގެ އަލް-ސުދާނިއްޔާ ސަރަޙައްދުގައި އެހީ ހޯދުމަށް މަޑުކޮށްގެން ތިބި މީހުންނަށް ދިން ހަމަލާއެއްގައި 4 މީހުން ޝަހީދުވިއެވެ. މި ހަމަލާގައި ޝަހީދުވި ފަރާތްތަކުގެ ހަށިގަނޑުތައް ވަނީ އަލް-ޝިފާ މެޑިކަލް ކޮމްޕްލެކްސްއަށް ގެންދެވިފައި ކަމަށް ސިއްޙީ ވަސީލަތްތަކުން ބުންޏެވެ.
އޮކްޓޯބަރު 2023 އިން ފެށިގެން މިހާތަނަށް އިސްރާއީލުން ޣައްޒާއަށް ދެމުންދާ ހަމަލާތަކުގައި މަދުވެގެން 63,371 ފަލަސްތީނު ރައްޔިތުން ޝަހީދުވެފައިވާ ކަމަށް ލިޔެކިޔުންތަކުން ދައްކައެވެ. އަދި 159,835 އަށްވުރެ ގިނަ މީހުން ވަނީ ޒަޚަމްވެފައެވެ.