ޗައިނާގެ ޓިއަންޖިންގައި މިއަދު ބޭއްވުނު “އެސް.ސީ.އޯ ޕްލަސް” ބައްދަލުވުމުގައި، ފަލަސްތީނުގެ ރައްޔިތުންނަށް ތާއީދުކުރުމުގައި ދިވެހިން ދެމިތިބޭނެކަން އަލުން ތަކުރާރުކޮށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
މި ބައްދަލުވުމުގައި ރައީސް މުޢިއްޒު އެމަނިކުފާނުގެ ބަޔާނުގައި، ދިވެހިރާއްޖެއާއި ޗައިނާއާ ދެމެދު އޮތް ޒަމާންވީ ގުޅުން ފާހަގަކުރައްވައި، ދިވެހިރާއްޖެއަކީ ވިލުންތެރި، ޢަޒުމުވަރުގަދަ ޤައުމެއްކަން ފާހަގަކުރެއްވިއެވެ. އަދި ދިވެހިރާއްޖޭގެ މޫސުމީ ލަނޑުދަނޑިތަކާއި، މޯލްޑިވްސް 2.0 ޑިޖިޓަލައިޒޭޝަން މަސައްކަތުގެ މައްޗަށް އަލިއަޅުއްވާލެއްވިއެވެ.
ބައިނަލްއަޤުވާމީ މުޖުތަމަޢުގައި ކުދި ޖަޒީރާ ޤައުމުތަކުގެ ދައުރު ފުޅާކުރުމަށް ގޮވާލައްވައި، ގްލޯބަލް ގަވަރނަންސް އިނީޝިއެޓިވަށް ދިވެހިރާއްޖެއިން ތާއީދުކުރާކަން ރައީސް މުޢިއްޒު ހާމަކުރެއްވިއެވެ. އަދި ފަލަސްތީނުގެ ރައްޔިތުންނަށް ތާއީދުކުރުމުގައި ދިވެހިން ދެމިތިބޭނެކަން އަލުން ތަކުރާރުކޮށް ވިދާޅުވިއެވެ.
އެސް.ސީ.އޯ ޕްލަސް ބައްދަލުވުމަކީ، މެންބަރު އަދި ޕާޓްނަރ ޤައުމުތަކާއި، ބައިނަލްއަޤުވާމީ ޖަމުޢިއްޔާތަކުން ހިއްސާކުރާ ގޮންޖެހުންތަކާއި، އިޤްތިޞާދީ އިންޓެގްރޭޝަނާއި ގްލޯބަލް ގަވަނަންސްއާ ގުޅޭ މައުޟޫޢުތަކުގެ މައްޗަށް މަޝްވަރާކުރުމަށް ބޭއްވޭ މުހިންމު މަންސައެކެވެ.



