އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ (ޑަބްލިއުޑީސީ) ބަޖެޓް ދެގުނަ ކުރެއްވުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.
މިކަން އިއުލާނު ކުރައްވަމުން ރައީސް މުއިއްޒު ވިދާޅުވީ، މިހާރު ކައުންސިލްތަކުގެ ބަޖެޓުން ޑަބްލިއުޑީސީތަކަށް ދެމުންދާ 5 އިންސައްތަ، 10 އިންސައްތައަށް އިތުރު ކުރައްވާނެ ކަމަށެވެ. މީގެ އިތުރުން، ޑަބްލިއުޑީސީ މެންބަރުންގެ ރަމަޟާން މަހުގެ އެލަވަންސް ދެއްވުމަށް ހަމަޖައްސަވާފައިވަނީ ކައުންސިލްތަކުގެ ބަޖެޓުން ކަމަށްވެސް ރައީސް ވިދާޅުވިއެވެ.
މި ބަދަލުތައް ގެންނަވަން ނިންމެވީ އަންނަ އަހަރުގެ ބަޖެޓު ހުށަހެޅުއްވުމުގެ ކުރިންނެވެ. މިއީ އަންހެނުންގެ ކޮމެޓީތައް އިތުރަށް ބާރުވެރި ކުރުވުމަށް އަޅުއްވާ ފިޔަވަޅެއްގެ ގޮތުގައި ރައީސް ފާހަގަކުރައްވައިފައިވެއެވެ.
ލާމަރުކަޒީ ގާނޫނުގެ ދަށުން މިހާރު ކައުންސިލްތަކަށް ލިބޭ ހިލޭ އެހީގެ މަދުވެގެން 5 އިންސައްތަ ޑަބްލިއުޑީސީތަކަށް ދޭންޖެހެއެވެ. އަދި މި ފައިސާ ބޭނުންކުރަންވާނީ ކޮމެޓީތަކުގެ މަސްއޫލިއްޔަތުތައް އަދާކުރުމަށާއި އެކި ޕްރޮގްރާމްތައް ހިންގުމަށެވެ.
އަންހެނުންގެ ކޮމެޓީތަކުގެ މެންބަރުންނަށް ރޯދަ މަހުގެ އެލަވަންސް ދިނުމަށް މިއަހަރުގެ ކުރީކޮޅު ވަނީ ލާމަރުކަޒީ ގާނޫނަށް އިސްލާހެއް ގެނެސްފައެވެ. މި އިސްލާހާ ގުޅިގެން، މިހާރު މި އެލަވަންސް ދިނުމަށް ހަމަޖެހިފައިވަނީ ކައުންސިލްތަކުގެ ބަޖެޓުންނެވެ.