މީހެއްގެ އޮރިޔާން ވީޑިއޯ ހުރި ކަމަށް ބުނެ ބިރުދައްކައި، ވަޅި ދައްކައިގެން ފައިސާ ފޭރުނު ކަމަށް ތުހުމަތުކުރެވޭ ދެ މީހަކު ފުލުހުން ހައްޔަރުކޮށްފިއެވެ.
ފުލުހުން މައުލޫމާތު ދިން ގޮތުގައި ހައްޔަރުކުރެވުނު ދެ މީހުންނަކީ ހއ. ފިއްލަދޫ، ސީރީންމަންޒިލް، މުޙައްމަދު ޒަމީރު (29 އަހަރު) އާއި ލ. ގަން/ ތުނޑި، އަރާއިރު، ޢަލީ ހައިސަލް (37 އަހަރު) އެވެ. މި ދެ މީހުން ހައްޔަރުކޮށްފައިވަނީ މި މަހުގެ 4 ވަނަ ދުވަހުގެ ރޭ ހުޅުމާލެ ފޭސް 1 ގައި އެ މީހުން ދިރިއުޅޭ އެޕާޓްމަންޓަކުން ހިންގި އޮޕަރޭޝަނެއްގައެވެ.
މި މައްސަލައިގައި ފުލުހުންނަށް ހުށަހެޅިފައިވާ މައުލޫމާތުތަކަށް ބަލާއިރު، މި ދެ މީހުން ވަނީ ފޭސްބުކް މެސެންޖަރ މެދުވެރިކޮށް މީހަކާ ގުޅުން ހަދައި، އެ ފަރާތުގެ އޮރިޔާން ވީޑިއޯ ހުރި ކަމަށް ބުނެ ބިރުދައްކައި، ހުޅުމާލެ ފޭސް 1 އަށް ގެންގޮސް ވަޅިން ބިރުދައްކައި، އެ މީހާގެ އެކައުންޓުން ފައިސާ ނަގައިފައެވެ. އަދި އޭގެ އިތުރުން އެ ފަރާތް އޮރިޔާންކޮށް ވީޑިއޯ ނަގައި، އިތުރު ފައިސާ ހޯދުމަށް ޑިމާންޑްކޮށްފައިވާ ކަމަށް ވެސް ތުހުމަތުކުރެވެއެވެ.
އެޕާޓްމަންޓު ބަލައި ފާސްކުރުމުގައި ތިން މޮބައިލް ފޯނާއި، އަތުކުރީ ތިން ގަޑިއާއި، ޑްރޯނަކާއި، ދޮއްޓަކާއި، ދެ އަވިއައިނާއި، ރިހި ފަށަކާއި ރިހި އަނގޮޓިއެއް އަދި ހަ ވަޅި ފެނިފައިވާ ކަމަށް ފުލުހުން ބުނެފައިވެއެވެ. މި ތަކެއްޗަކީ އެކި މީހުންގެ އަތުން ފޭރިގަނެފައިވާ ތަކެތި ކަމަށް ފުލުހުން ބެލެވެއެވެ.
މި މައްސަލައިގައި ކްރިމިނަލް ކޯޓަށް ހާޒިރުކުރުމުން ޢަލީ ހައިސަލްގެ ބަންދަށް 4 ދުވަސް އަދި މުޙައްމަދު ޒަމީރުގެ ބަންދަށް 15 ދުވަސް ނަގާފައިވެއެވެ. އަދި މި ދެ މީހުން އިތުރު މީހުންނަށް ވެސް މިފަދަ އަނިޔާތައް ކޮށްފައިވާ ކަމަށް ބެލެވޭތީ، އެފަދަ މައްސަލައެއް ދިމާވެފައިވާ ފަރާތްތަކުން ފުލުހުންނަށް ރިޕޯޓުކުރުމަށް އެދިފައިވެއެވެ.