ސިވިލް ސަރވިސް ކޮމިޝަނަށް ތިން މެންބަރުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދުއައްޔަންކުރައްވައިފިއެވެ. މިގޮތުން އައްޔަންކުރެއްވި މެންބަރުންގެ ތެރޭގައި ކޮމިޝަނުގެ މިހާރުގެ ރައީސް މުޙައްމަދު ނާސިޙު ވެސް ހިމެނިވަޑައިގަންނަވައެވެ.
ރައީސް އޮފީހުގައި މިއަދު ބޭއްވުނު ޚާއްސަ ރަސްމިއްޔާތެއްގައި އައު މެންބަރުންގެ ގޮތުގައި އައްޔަންކުރެއްވީ މުޙައްމަދު ނާސިޙުގެ އިތުރުން، ޑރ. ޙުސައިން ފާއިޒް އަދި ޑރ. ދީބާ މޫސާއެވެ. ޑރ. ދީބާ މޫސާއަކީ މިހާރުގެ ހެލްތު މިނިސްޓަރު އަބްދުﷲ ނާޒިމްގެ އަނބިކަނބަލުންކަން ފާހަގަކޮށްލެވެއެވެ.
މި ރަސްމިއްޔާތުގައި އައު މެންބަރުން މަޤާމުގެ ހުވާ ކުރެއްވުމުގެ އިތުރުން، މަޤާމާ ގުޅޭ ރަސްމީ ލިޔެކިޔުންތައް ވެސް ރައީސުލްޖުމްހޫރިއްޔާ ވަނީ އެ ބޭފުޅުންނާ ހަވާލުކުރައްވާފައެވެ. މެންބަރުންގެ ހުވާ ލައިދެއްވީ ސުޕްރީމް ކޯޓުގެ ފަނޑިޔާރު އަލްއުސްތާޛު ޢަލީ ރަޝީދު ޙުސައިނެވެ.
ސިވިލް ސަރވިސް ކޮމިޝަނަކީ ދައުލަތުގެ އެންމެ ބޮޑު އެއް މުއައްސަސާ ކަމަށްވާ ސިވިލް ސަރވިސްގެ އެންމެހައި ކަންކަން ބަލަހައްޓާ މިނިވަން މުއައްސަސާއެވެ. މި ކޮމިޝަނުގެ މައިގަނޑު މަސްއޫލިއްޔަތުތަކުގެ ތެރޭގައި ސިވިލް ސަރވިސްގެ މުވައްޒަފުންގެ ވަޒީފާއާ ގުޅޭ އެންމެހައި ކަންކަން ރާވައި ހިންގުން ހިމެނެއެވެ.