ރައްޔިތުންގެ ފެންނަ ނުފެންނަ ވޯޓު ނެގުމުގެ ބިލު ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މިއަދު ފާސްކޮށްފިއެވެ. ސަރުކާރުގެ ފަރާތުން އިނގުރައިދޫ ދާއިރާގެ މެންބަރު އިބްރާހީމް ފަލާހް ހުށަހެޅުއްވި މި ބިލަށް، ކޮމިޓީން ވަނީ މުހިންމު ބަދަލުތަކެއް ގެނެސްފައެވެ. މި ބަދަލުތަކުގެ ތެރޭގައި ރާއްޖޭގެ ވަކި ސަރަހައްދަކަށް އަމާޒުކޮށްގެން ފެންނަ ނުފެންނަ ވޯޓެއް ނެގޭނެ ގޮތް ހިމެނެއެވެ.
ކޮމިޓީން ގެނައި އިތުރު ބަދަލުތަކުގެ ތެރޭގައި، ރެފަރެންޑަމަކަށް ހިނގާނެ ކަމަށް އަންދާޒާކުރާ ޚަރަދުތަކަށް ފައިސާ ދޫކުރުމަށް ފިނޭންސް މިނިސްޓްރީއަށް ދެވިފައިވާ މުއްދަތު 14 ދުވަހުން 10 ދުވަހަށް ކުރުކުރުން ހިމެނެއެވެ. އަދި ވޯޓު ނެގުމަށް ނިންމާ ތާރީޚާއި ވޯޓު ނަގާ ދުވަހާ ދެމެދު އޮންނަންޖެހޭ މުއްދަތުތަކަށްވެސް ބަދަލު ގެނެވިފައިވެއެވެ.
މި ބިލު ފާސްކުރެވިފައިވަނީ މިއަދު ބޭއްވުނު ކޮމިޓީގެ ބައްދަލުވުމުގައި ބައިވެރިވި ހުރިހާ މެންބަރުންގެ އިއްތިފާޤުންނެވެ. ނަމަވެސް، ވަކި ސަރަހައްދެއްގައި ނަގާ ވޯޓުތަކަށް މި އުސޫލުތަކުން އިސްތިސްނާ ލިބިގެންދާނެއެވެ.