ދިވެހިރާއްޖޭގެ ތަރައްޤީއާއި އިޤްތިޞާދުގައި ޒަމާންތަކަށް ދެމިހުންނާނެ އަގުހުރި ޚިދުމަތްތަކެއް ޕޯސްޓްގެ ޒަރިއްޔާއިން ފޯރުކޮށްދީފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މޯލްޑިވްސް ޕޯސްޓް ލިމިޓެޑްގެ 119 ވަނަ އަހަރީ ދުވަހާ ގުޅިގެން ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ފާހަގަކުރައްވާފައިވަނީ، މިދިޔަ 119 އަހަރުގެ ތެރޭގައި ޕޯސްޓްގެ ޚިދުމަތް ރާއްޖޭގައި ދެއްވުމަށް އިސްވެ ތިއްބެވި ވެރިންނާއި މުވައްޒަފުންނާމެދު ޤައުމު ފަޚުރުވެރިވާ ކަމަށެވެ. އަދި ޕޯސްޓްގެ ޚިދުމަތުގެ ދިގު ތާރީޚުގައި ޚިދުމަތްކުރެއްވި އެންމެހައި ބޭފުޅުންނަށް ޝުކުރާއި ހެޔޮ އެދުންތައް ވަނީ ރައްދުކުރައްވާފައެވެ.
މީގެއިތުރުން ރައީސް މުޢިއްޒު ވިދާޅުވެފައިވަނީ، ޕޯސްޓްގެ ޚިދުމަތާއެކު ރާއްޖޭގެ ކުރިއެރުމާއި، މުވާސަލާތީ ދާއިރާއިން ޙާސިލުކޮށްފައިވާ ކާމިޔާބީތަކާއި އަދި އިޤްތިޞާދީގޮތުން ކުރިއަރައިދިޔުމުގައިވެސް ޒަމާންތަކަކަށް ދެމިހުންނާނެ އަގުހުރި ޚިދުމަތްތަކެއް ޕޯސްޓްގެ ޒަރިއްޔާއިން ފޯރުކޮށްދީފައިވާ ކަމަށެވެ.