އިސްލާމީ ދާއިރާގެ 15 މަޝްރޫއެއް އަންނަ ރޯދަމަހުގެ ކުރިން ނިންމާލެވޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
މިނިސްޓަރ މިހެން ވިދާޅުވީ މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ކެންދޫ ދާއިރާގެ މެންބަރު މައުރޫފު ޒާކިރު ކުރެއްވި ސުވާލަކަށް ޖަވާބު ދެއްވަމުންނެވެ. މިސްކިތްތަކާއި އިސްލާމީ މަރުކަޒުތައް ހިމެނޭ މި މަޝްރޫއުތަކަށް ރައީސް ޑރ. މުހައްމަދު މުއިއްޒު ވަރަށް ބޮޑު އިސްކަމެއް ދެއްވާ ކަމަށް ވެސް މިނިސްޓަރުގެ ވާހަކަފުޅުގައި ފާހަގަކުރެއްވި އެވެ.
މިނިސްޓަރު ޝަހީމްގެ ވާހަކަފުޅުގައި، މަޝްރޫއުތައް ނިންމުމަށް މިދިޔަ ދެ އަހަރު ތެރޭގައި ޕްރައިވެޓް ސެކްޓަރގެ ކުންފުނިތަކަށް 170 މިލިއަން ރުފިޔާއަށް ވުރެ ގިނަ ފައިސާ ދޫކޮށްފައިވާ ކަމަށް ވިދާޅުވި އެވެ. ނިމިގެންދާނެ މަޝްރޫއުތަކުގެ ތެރޭގައި 500 އަދި 700 މީހުންގެ ޖާގައިގެ މިސްކިތްތަކާއި އިސްލާމީ މަރުކަޒުތައް ހިމެނޭ ކަމަށް އޭނާ ހާމަކުރެއްވި އެވެ.
މީގެ އިތުރުން، ރައީސްގެ ހާއްސަ ސިޔާސަތެއްގެ ދަށުން ގުރުއާނާ ބެހޭ މަރުކަޒުގެ ގޮފިތައް ރާއްޖޭގެ އެކި ކަންކޮޅުތަކުގައި ގާއިމްކުރުމުގެ މަސައްކަތް ވެސް ކުރިއަށްދާ ކަމަށް މިނިސްޓަރު ވިދާޅުވި އެވެ. މިހާރު ވެސް ގިނަ ރަށްރަށުގައި މި މަސައްކަތް ފަށާފައިވާ ކަމަށް އޭނާ ފާހަގަކުރެއްވި އެވެ.
އަދި ގުރުއާނުގެ އިލްމު ކިޔަވައިދޭނެ ފެންވަރުހުރި ޓީޗަރުން ނެތް ރަށްރަށަށް، ބޭރު ޤައުމުތަކުން ޓީޗަރުން ގެނައުމުގެ މަސައްކަތް ވެސް ކުރިއަށް ގެންދާނެ ކަމަށް މިނިސްޓަރު ޝަހީމް ވިދާޅުވި އެވެ.