މޯލްޑިވްސް ފުޓްބޯލް އެސޯސިއޭޝަން (އެފްއޭއެމް) އިން އަލަށް ފެށުމަށް ތައްޔާރުވަމުންދާ އަތޮޅު ފުޓްބޯޅަ މުބާރާތަށް، ދުނިޔޭގެ ފުޓްބޯޅަ ޖަމިއްޔާ (ފީފާ) އިން 266،000 ޑޮލަރު (ގާތްގަނޑަކަށް 4 މިލިއަން ރުފިޔާ) ގެ ފައިނޭންޝަލް އެހީ ދިނުމަށް ނިންމައިފި އެވެ.
މި އެހީގެ އިތުރުން ދިވެހިރާއްޖޭގައި އަންހެން ފުޓްބޯޅަ ކުރިއެރުވުމަށް ބާއްވާ މުބާރާތްތަކަށް ވެސް އެހީތެރިކަން ފޯރުކޮށްދޭނެ ކަމުގެ ޔަގީންކަން ފީފާއިން ވަނީ ދީފަ އެވެ. މިކަން ރަސްމީކޮށް އިއުލާނު ކުރެއްވީ ފީފާގެ ރައީސް ޖިއާނީ އިންފަންޓީނޯ، ރާއްޖެ އަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު އެނބުރި ވަޑައިގެން ފީފާގެ ވެބްސައިޓުގައި ޝާއިއުކުރެއްވި ބަޔާނެއްގަ އެވެ.
އެފްއޭއެމްގެ މި އާ ޕްރޮގްރާމަކީ އަތޮޅު ތެރޭގެ ފުޓްބޯޅަ ކުރިއެރުވުމަށް އެކުލަވައިލާފައިވާ މަޝްރޫއެކެވެ. މި މުބާރާތުގައި ޖުމްލަ 49 ޖަމިއްޔާއަކުން ވާދަކުރާނެ ކަމަށް ވަނީ ހަމަޖެހިފަ އެވެ. މުބާރާތް ފަށާނީ އަތޮޅު ބުރުންނެވެ. އޭގެ ފަހުން ޒޯން ބުރު ކުޅެ، އެންމެ ފަހުން ޗެމްޕިއަން ޓީމުތައް ކަނޑައަޅާނެ އެވެ. މި މުބާރާތަށް ފަހު، އެންމެ ފައިނަލް ސްޓޭޖަށް ދާ ދެ ޓީމަށް އަންނަ އަހަރުގެ ދިވެހި ޕްރެމިއާރ ލީގަށް ކޮލިފައިވުމުގެ ފުރުސަތު ލިބިގެންދާނެ އެވެ.
މީގެ އިތުރުން ދިވެހިރާއްޖޭގައި ގިނަ ދުވަސްތަކެއް ވަންދެން މެދުކަނޑާލާފައިވާ އަންހެން ފުޓްބޯޅަ މުބާރާތް އަލުން ފެށުމަށް އެފްއޭއެމް އިން މިހާރު ވަނީ ނިންމާފަ އެވެ. މި މަސައްކަތަށް އެހީތެރިވުމުގެ ގޮތުން ފީފާގެ ފޯވަޑް ޕްރޮޖެކްޓްގެ ދަށުން އަންހެން ފުޓްބޯޅަ މުބާރާތްތައް ބޭއްވުމަށް ވެސް ފައިނޭންޝަލް އެހީތެރިކަން ފޯރުކޮށްދޭނެ ކަމުގެ ޔަގީންކަން ފީފާއިން ވަނީ ދީފަ އެވެ. މިއީ ރާއްޖޭގެ ކުޅިވަރަށް މުހިންމު ކުރިއެރުމެކެވެ.
ފީފާގެ ރައީސް ޖިއާނީ އިންފަންޓީނޯ ރާއްޖެ އަށް ކުރެއްވި ދަތުރުފުޅުގައި ވަނީ ދިވެހިރާއްޖޭގެ ރައީސުލްޖުމްހޫރިއްޔާއާ ވެސް ބައްދަލުކުރައްވާފަ އެވެ. މި ބައްދަލުވުމުގައި ދިވެހި ފުޓްބޯޅަ އިތުރަށް ކުރިއަރާނެ ގޮތްތަކާއި، ފީފާ އާއި ރާއްޖެ ގުޅިގެން ކުރެވޭނެ މަސައްކަތްތަކާ ގުޅޭގޮތުން ދެ ބޭފުޅުން ވަނީ ބަސް ބަދަލުކުރައްވައި މަޝްވަރާ ކުރައްވާފަ އެވެ.