މި އަހަރުގެ ސެޕްޓެމްބަރު މަހުގެ 27 ވަނަ ދުވަހާ ހަމައަށް 1.8 މިލިޔަނަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ. މި އަދަދުތަކަކީ މިދިޔަ އަހަރުގެ މި މުއްދަތާ އަޅާބަލާއިރު %9.9 ގެ ކުރިއެރުމެއް ކަމަށް ވެސް އެ ތަފާސްހިސާބުތަކުން ވަނީ ހާމަކޮށްފައެވެ.
މި އަހަރުގެ ޖުމްލަ ފަތުރުވެރިންގެ އަދަދު 1,804,515 އަށް އަރާފައިވާއިރު، މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1,641,937 ފަތުރުވެރިންނެވެ. މިއީ ރާއްޖޭގެ ފަތުރުވެރިކަމުގެ ސިނާއަތް ދުނިޔޭގެ މާކެޓުގައި ބޮޑު ކުރިއެރުމެއް ހޯދަމުންދާކަން ދައްކުވައިދޭ މުހިންމު އަދަދެކެވެ. ފަތުރުވެރިކަމުގެ ވުޒާރާއިން ބުނާގޮތުން 2024 ވަނަ އަހަރަކީ ރާއްޖެއަށް މިހާތަނަށް އެންމެ ގިނަ އަދަދެއްގެ ފަތުރުވެރިން ޒިޔާރަތްކުރި އަހަރުގެ ގޮތުގައި ވެސް ފާހަގަވެގެންދާނެއެވެ.
ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ މާކެޓުތަކަށް ބަލާއިރު، ޗައިނާއިން 291,573 ފަތުރުވެރިންނާއެކު އެއްވަނައިގައި އޮތްއިރު، ރަޝިއާއިން 223,857 ފަތުރުވެރިންނާއެކު ދެވަނައިގައި އޮތެވެ. އަދި އިނގިރޭސިވިލާތުން (159,615)، ޖަރުމަނުވިލާތުން (132,394)، އަދި އިޓަލީވިލާތުން (119,261) ވަނީ އެންމެ ގިނަ ފަތުރުވެރިން އައިސްފައިވާ ފަސް ގައުމުގެ ތެރޭގައި ހިމެނިފައެވެ.
ރާއްޖެއައި ފަތުރުވެރިންގެ ތެރެއިން އެންމެ ގިނަ އަދަދެއްގެ ފަތުރުވެރިން (1,332,533) ޗުއްޓީ ހޭދަކޮށްފައިވަނީ ރިސޯޓްތަކުގައެވެ. ގެސްޓްހައުސްތަކަށް ޒިޔާރަތްކުރި ފަތުރުވެރިންގެ އަދަދު 386,692 އަށް އަރައެވެ. މިހާރު ރާއްޖޭގައި ފަތުރުވެރިންނަށް ޚިދުމަތް ދިނުމަށް 1286 ތަން ހުޅުވާފައިވާއިރު، އެ ތަންތަނުގެ ޖުމްލަ ބެޑް ކެޕޭސިޓީ 64,994 އަށް އަރައެވެ. މިއީ ފަތުރުވެރިންގެ ބޮޑު ޑިމާންޑަކަށް ޖަވާބުދާރީވުމަށް ޤާއިމުކުރެވިފައިވާ ބޮޑު ނިޒާމެކެވެ.
ސަރުކާރުން މި އަހަރަށް އަމާޒު ހިފާފައިވަނީ 2.3 މިލިޔަން ފަތުރުވެރިން ރާއްޖެއަށް ގެނައުމަށެވެ. މި އަމާޒަށް ވާސިލްވުމަށް ދެން ބޭނުންވަނީ ގާތްގަނޑަކަށް 500,000 ފަތުރުވެރިންނެވެ. މިހާރު ރާއްޖެއަށް އެވްރެޖްކޮށް ދުވާލެއްގެ މައްޗަށް 6,200 އަށްވުރެ ގިނަ ފަތުރުވެރިން އަންނަ ކަމަށް ބެލެވޭއިރު، މި އަދަދަށް ބަލާއިރު އަހަރު ނިމުމުގެ ކުރިން ސަރުކާރުގެ އަމާޒު ހާސިލްވުމުގެ ފުރުސަތު ބޮޑުކަމަށް ފެނެއެވެ.