ނޯޓް: މިއީ ސައިންސް އެލާޓް ނޫހުގައިވާ ލިޔުމެއްގައި ހިމެނޭ މައުލޫމާތުތަކެއްގެ މައްޗަށް ބިނާކޮށް ލިޔެފައިވާ ލިޔުމެކެވެ.
އަލްޒައިމާސް ބައްޔާ ގުޅިފައިވާ ޕްރޮޓީންތައް ސިކުނޑީގައި ޖަމާވުމާއި ކޮގްނިޓިވް ދަށްވުން ލަސްކުރުމަށްޓަކައި، ކޮންމެ ދުވަހަކު ހިނގާލުމަކީ އެހީއެއް ކަމަށް އާ ދިރާސާއަކުން ހާމަވެއްޖެއެވެ. އެމެރިކާގެ މޭސް ޖެނެރަލް ބްރިގަމް އިން އިސްކޮށް ހިންގި މި ދިރާސާގައި ބުނާ ގޮތުން، ހަށިގަނޑު ހަރަކާތްތެރިކުރުމުގެ ކުޑަ މިންވަރެއް ވެސް މި ބަލީގެ ކުރިއެރުން ހުއްޓުވުމަށް އެކަށީގެންވެއެވެ. މީގެ މާނައަކީ، ހަރަކާތްތެރި ނޫން ލައިފްސްޓައިލަކީ އަލްޒައިމާސް ދަށްވުމުގައި މުހިންމު ދައުރެއް އަދާކުރާ ކަމެއް ނަމަވެސް، އެއީ ފަސޭހައިން ބަދަލުކުރެވިދާނެ އާދައެކެވެ.
އަލްޒައިމާސް ބައްޔަކީ، ކުރު މުއްދަތުގެ ހަނދާން ދަށްވުމާއި، ސިކުނޑީގެ މަސައްކަތްތައް ދަށްވަމުންދާ ބައްޔެކެވެ. މި ބައްޔަށް އަދި ފަރުވާއެއް ހޯދިފައި ނުވި ނަމަވެސް، ބަލި ކުރިއަރާ ގޮތް ދެނެގަތުމަކީ ފަރުވާގެ ސްޓްރެޓެޖީތައް އެކުލަވާލުމަށް އެހީތެރިވެދޭ ކަމެކެވެ. އެގޮތުން ހަރަކާތްތެރިކަމުގެ އަސަރު ބަލި ކުރިއެރުމަށް ކުރާ ގޮތް ދެނެގަތުމަށް، ނިއުރޮލޮޖިސްޓް ޑރ. ވައި-ޔިން ވެންޑީ ޔާއޫ އިސްކޮށް ހިންގެވި ޓީމުން ވަނީ ހާވަޑް އޭޖިން ބްރެއިން ސްޓަޑީ (އެޗްއޭބީއެސް) ގައި ބައިވެރިވި 296 މީހުން ބޭނުންކޮށްގެން ދިރާސާކޮށްފައެވެ.
އުމުރުން 50 އާއި 90 އަހަރާ ދެމެދުގެ މި ބައިވެރިންނަކީ ދިރާސާ ފެށުނު އިރު އެއްވެސް ކޮގްނިޓިވް މައްސަލައެއް ނެތް ބައެކެވެ. 14 އަހަރާއި ޖެހެންދެން މި މީހުންގެ ހަރަކާތްތައް ވެއަރަބަލް ޕެޑޯމީޓަރުތައް ބޭނުންކޮށްގެން ބަލަހައްޓާފައިވެއެވެ. އަދި އަލްޒައިމާސް ބައްޔާއި ގުޅުންހުރި އެމައިލޮއިޑް އަދި ޓައު ޕްރޮޓީންތައް ޖަމާވާ މިންވަރު ސިކުނޑީގެ ސްކޭންތަކުން ބަލައި، ކޮގްނިޓިވް ޓެސްޓުތައް ވެސް ހެދިއެވެ.
ނަތީޖާއިން ދައްކާ ގޮތުގައި، ހަށިގަނޑު ހަރަކާތްތެރިކުރުމާއި އެމައިލޮއިޑް ޖަމާވުމާ ދެމެދު ގުޅުމެއް ނެތް ނަމަވެސް، ޓައު ޕްރޮޓީން ޖަމާވުމާއި ކޮގްނިޓިވް ދަށްވުމާ ދެމެދު ވަރަށް ސާފު ގުޅުމެއް ފެނިފައިވެއެވެ. ދުވާލަކު 5,000 އާއި 7,500 ފިޔަވަޅާ ދެމެދުގެ މެދުމިނުގެ ހަރަކާތްތެރިކަމެއް ބެހެއްޓި މީހުންނަށް، ޓައު ޖަމާވާ ރޭޓާއި ކޮގްނިޓިވް ދަށްވުން ވަރަށް ބޮޑަށް ލަސްކުރެވުނެވެ. ހައިރާންވާ ފަދަ ގޮތަކަށް، 7,500 ފިޔަވަޅަށް ވުރެ ގިނައިން ހިނގާލުމުން ވެސް މި ނަތީޖާ އިތުރަށް ރަނގަޅުވެފައި ނުވެއެވެ. އަދި ދުވާލަކު 3,000 އާއި 5,000 ފިޔަވަޅާ ދެމެދުގެ ކުޑަ ހަރަކާތްތެރިކަމެއް ވެސް ބަލި ލަސްކުރުމަށް އެހީވެފައިވެއެވެ.
ދިރާސާގެ އަހުލުވެރިން ފާހަގަ ކުރައްވާ ގޮތުގައި، ހަށިގަނޑު ހަރަކާތްތެރިކުރުމަކީ އަލްޒައިމާސް ބަލި ދިފާޢުކުރުމަށް ފަސޭހައިން އަމަލުކުރެވިދާނެ ފަރުވާއެއްގެ މަގު ދައްކައިދޭ ކަމެކެވެ. އަދި “ވެއަރަބަލް އެކްޓިވިޓީ ޓްރެކަރު”ތަކަކީ މި ފައިދާތައް މޮނިޓަރކޮށް، ހިތްވަރު ދިނުމަށް ބޭނުންކުރެވިދާނެ ވަސީލަތެއް ކަމަށް ވެސް އެ ފަރާތްތަކުން ބުނެއެވެ.
މި ދިރާސާ ވަނީ މަޝްހޫރު ‘ނޭޗަރ މެޑިސިން’ ޖާނަލްގައި ޝާއިއުކޮށްފައެވެ.