ޕާކިސްތާނުގެ ވެރިރަށް އިސްލާމްއާބާދުގެ ކޯޓެއްގެ ބޭރުގައި އަންގާރަ ދުވަހު ދިން ޖާނުން ފިދާވުމުގެ ހަމަލާގެ ޒިންމާ ޕާކިސްތާނުގެ ތާލިބާނުން (ޓީޓީޕީ) ނަގައިފިއެވެ. މިއާއެކު ޕާކިސްތާނުގެ ދިފާޢީ ވަޒީރު ވަނީ ޓެރަރިސްޓް ހަމަލާތައް އިތުރުވުމުގެ ސަބަބުން ޕާކިސްތާނު މިހާރު އޮތީ ހަނގުރާމައިގެ ހާލަތެއްގައި ކަމަށް ވިދާޅުވެފައެވެ.
މި ހަމަލާ، ސަރުކާރުގެ އެތައް ވަޒީރުންނެއްގެ ފަރާތުން ޖާނުން ފިދާވުމުގެ ހަމަލާއެއްގެ ގޮތުގައި ކަށަވަރުކޮށްދީފައިވާއިރު، މި ހަމަލާ ހިނގާފައިވަނީ އަންގާރަ ދުވަހުގެ މެންދުރުފަހު 12:30 ހާއިރު ކޯޓު އިމާރާތްތަކުގެ ބޭރުގައެވެ. މި ސަރަހައްދު އާންމުކޮށް ތޮށްޖެހިފައި އޮންނަނީ ޝަރީޢަތްތަކަށް ހާޒިރުވާ ވަކީލުންނާއި މައްސަލަ ހުށަހަޅާ ފަރާތްތަކުގެ ސަބަބުންނެވެ. އެތެރޭގެ ކަންތައްތަކާ ބެހޭ ވަޒީރު މުޙްސިން ނަޤްވީ ވިދާޅުވީ މި ހަމަލާގައި 12 މީހުން މަރުވެ، 27 މީހުން ޒަޚަމްވެފައިވާ ކަމަށެވެ. ނަޤްވީ ވިދާޅުވީ ބޮން ގޮއްވައިލި މީހާ ކޯޓުގެ އިމާރާތުގެ ތެރެއަށް ވަނުމަށް މަސައްކަތްކުރި ނަމަވެސް، އެކަން ނުވެ، ފުލުހުންގެ އުޅަނދަކަށް އަމާޒުކުރީ ކަމަށެވެ.
މި ހަމަލާގެ ޒިންމާ ނަގައި ޓީޓީޕީން ނެރުނު ބަޔާނެއްގައި ބުނެފައިވަނީ ޕާކިސްތާނުން އިސްލާމީ ނޫން ޤާނޫނުތަކުގެ ދަށުން ޙުކުމްތައް ނެރުނު ފަނޑިޔާރުންނާއި، ވަކީލުންނާއި، އޮފިޝަލުންނަށް މި ހަމަލާ އަމާޒުކުރީ ކަމަށެވެ. އަދި މުސްލިމުންގެ އާބާދީ ބޮޑު މި ޤައުމުގައި އިސްލާމީ ޝަރީޢާ ޤާނޫނު ތަންފީޒުކުރެވެންދެން އިތުރު ހަމަލާތައް ދޭނެ ކަމުގެ އިންޒާރުވެސް ދީފައިވެއެވެ. ޕާކިސްތާނު މިހާރު ކުރިމަތިލާންޖެހިފައިވަނީ ޓީޓީޕީގެ ހަނގުރާމަވެރިންގެ ހަމަލާތައް އިތުރުވެ، ޤައުމުގެ ސަލާމަތީ ހާލަތު އެންމެ ގޯސްވެފައިވާ ދިހަ އަހަރުގެ ތެރޭގައި އެންމެ ބޮޑު ސަލާމަތީ ކާރިސާއާއެވެ.
މި އަހަރު އެކަނިވެސް ޓީޓީޕީގެ ހަނގުރާމަވެރިން ވަނީ ޕާކިސްތާނުގައި 600 އަށް ވުރެ ގިނަ ހަމަލާ ދީފައެވެ. މީގެ ތެރެއިން ގިނަ ހަމަލާތައް ދީފައިވަނީ އަފްޣާނިސްތާނާ ގުޅިފައިވާ ޚައިބަރު ޕަޚްތޫންޚްވާ ސަރަހައްދުގައެވެ. ނަމަވެސް، އަންގާރަ ދުވަހު ދިން ޖާނުން ފިދާވުމުގެ ހަމަލާއަކީ އިސްލާމްއާބާދަށް އަމާޒުކޮށް ދިން އެންމެ ބޮޑު ހަމަލާއެވެ. މިއާއެކު ޕާކިސްތާނުގެ ސަރުކާރުން ވަނީ އަފްޣާނިސްތާނުގެ ތާލިބާނުން ޓީޓީޕީގެ ހަނގުރާމަވެރިންނަށް ރައްކާތެރި ހިޔާވަހިކަމާއި ހަތިޔާރުގެ އެހީތެރިކަން ދޭ ކަމަށް ތުހުމަތުކޮށްފައެވެ. ނަމަވެސް ކާބުލްއިން ވަނީ މި ތުހުމަތުތައް ދޮގުކޮށްފައެވެ.
މި ތުހުމަތުތަކުގެ ސަބަބުން މިދިޔަ މަހު ޕާކިސްތާނާއި އަފްޣާނިސްތާނުގެ ބޯޑަރު ސަރަހައްދުގައި ވަނީ މާރާމާރީތަކެއް ހިނގައި، އެތައް ބަޔަކު މަރުވެފައެވެ. ދެ ޤައުމުގެ ދެމެދުގައި ހަމަލާ ހުއްޓާލުމުގެ މަޝްވަރާތައް ކުރިއަށްދާއިރު، ބޯޑަރު ހުރަސްކޮށް ހިންގާ ޓެރަރިޒަމްގެ މައްސަލަ ހައްލުކުރުމަށް އަދިވެސް އެއްބަސްވުމަކަށް އާދެވިފައެއް ނުވެއެވެ.