ގެދޮރުވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްގީކުރަމުންދާ 4000 ހައުސިން ޔުނިޓްގެ ހުރިހާ ޓަވަރަކަށް އަންނަ އަހަރުގެ ޖެނުއަރީ 25 ގެ ކުރިން މީހުންނަށް ވަދެވޭނެ ކަމުގެ ޔަގީންކަން ލިބިފައިވާކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
ރޭ މައްޗަށް ގޯޅި ރައްޔިތުންނާއި ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ، މި ޓާގެޓް ހާސިލްކުރުމަށްޓަކައި އެފްޑީސީއާ ގުޅިގެން މަސައްކަތްތައް ވަރަށް ބާރަށް ކުރިއަށްދާނެ ކަމަށެވެ. އަދި 2026 ވަނަ އަހަރުގެ ޖެނުއަރީ 25 ގެ ކުރިން ހުރިހާ ޓަވަރެއްގެ މަސައްކަތް ނިމި، އެޕާޓްމަންޓްތައް ދިރިއުޅުމަށް ތައްޔާރުކުރެވޭނެކަން އެމަނިކުފާނު ފާހަގަކުރެއްވިއެވެ.
މީގެއިތުރުން ރޭގެ ބައްދަލުވުމުގައި ގިނަ ބަޔަކު ވަނީ ގޯއްޗާއި ފްލެޓާއި ގުޅޭގޮތުން ސުވާލުކޮށްފައެވެ. އަދި، އެ ސުވާލުތަކަށް ޖަވާބުދެއްވަމުން ރައީސް ވިދާޅުވީ ނިމުނު ވެރިކަމުގައި ގޯއްޗާއި ފްލެޓްތައް ދޭން ނިންމާފައިވާ ގޮތަށް އެކަންކަން ކުރައްވަމުންގެންދަވާ ކަމަށެވެ.
ގޯތިތައް ދީފައިވާ ގިނަ ތަންތަނަކީ ނުހިއްކާ ހުރި ތަންތަންކަން ރައީސް ފާހަގަކުރެއްވިއެވެ. އެގޮތުން، ހުޅުމާލޭގެ ތިންވަނަ ފިޔަވަހީގެ މަސައްކަތް ނުނިމި އޮތްއިރު ގިރާފަޅު އަދި ގުޅިފަޅު ވެސް ހިއްކާ ނިންމާފައިނުވާކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ އޭރު ހިއްކާފައި އޮތް ތަންތަނުން ލިބިފައިވާ ގޯތިތައް ދިނުމުގެ މަސައްކަތް ކޮށްފައިވާ ކަމަށެވެ. އެކަމަކު ނުހިއްކާ އޮތް ތަންތަން ހިއްކުމަށްފަހު ކުރިން ގޯތި ލިބިފައި ތިބި އެންމެންނަށް ގޯތި ޙަވާލުކޮށްދެއްވާނެކަމުގެ ޔަޤީންކަން ރައީސް ދެއްވިއެވެ.
ލިބިފައިވާ ގޯތިތަކުގައި އިމާރާތް ނުކުރެވޭ މައްސަލައާ ގުޅޭގޮތުން ކުރި ސުވާލުގައި ރައީސް ވިދާޅުވީ، އެކަމާ ގުޅޭ އިދާރާތަކާއެކު މަޝްވަރާކުރައްވައި އެމައްސަލައަށް ޙައްލު ގެނެސްދެއްވާނެ ކަމަށެވެ.