ހޮންގްކޮންގްގެ މީހުން ދިރިއުޅޭ ބޮޑެތި އިމާރާތްތަކެއްގައި އިއްޔެ ރޯވި އަލިފާނުގެ ހާދިސާގައި މަދުވެގެން 44 މީހުން މަރުވެ، 270 އަށް ވުރެ ގިނަ މީހުން ގެއްލިއްޖެއެވެ. މި ހާދިސާ އާއި ގުޅިގެން މީހުން މަރާލުމުގެ ތުހުމަތުގައި ތިން ކޮންސްޓްރަކްޝަން އޮފިޝަލުން މިހާތަނަށް ވަނީ ހައްޔަރުކޮށްފިއެވެ.
ބުދަ ދުވަހުގެ މެންދުރު ފަހުން ފެށިގެން މިއަދު ހެނދުނާއި ހަމައަށް ވެސް އަލިފާންގަނޑު ނިއްވައިނުލެވި ހުރި މި ހާދިސާގެ އަސްލު ސަބަބު އަދި ހާމައެއް ނުވެއެވެ. ނަމަވެސް، އިމާރާތްތަކުގެ ބޭރުގައި ބޭނުންކުރި ބިނާކުރުމުގެ މެޓީރިއަލްތައް އަލިފާނުން ރައްކާތެރިކުރުމުގެ މިންގަނޑުތަކަށް ނުފެތޭ ކަމަށް ޝައްކުކުރެވޭ ކަމަށް ކަމާބެހޭ ފަރާތްތަކުން ބުނެފައި ވެއެވެ. އަދި މިއީ އަލިފާންގަނޑު އަވަހަށް ފެތުރިގެން ދިއުމަށް މެދުވެރިވި ސަބަބެއް ކަމަށް ބެލެވެއެވެ. ފުލުހުން ބުނި ގޮތުގައި ހައްޔަރުކުރި ތިން މީހުންގެ ތެރޭގައި ކޮންސްޓްރަކްޝަން ކުންފުންޏެއްގެ ދެ ޑިރެކްޓަރުންނާއި، ކޮންސަލްޓެންޓެއް ހިމެނެއެވެ.
ފުލުހުންގެ ސީނިއަރ ސުޕަރިންޓެންޑެންޓް ލައި ޔީ ޗުންގް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، އިމާރާތްތަކުގެ ތެރެއިން އެއް އިމާރާތެއްގެ ކޮންމެ ފަންގިފިލާއެއްގެ އެލިވޭޓަރު ލޮބީގެ ކުޑަދޮރުތަކުގެ ބޭރުގައި އަލިފާނަށް ފަސޭހައިން ހުށަހެޅޭ ފޯމް ބޯޑުތައް ހަރުކޮށްފައި ހުރި ކަމަށެވެ. ކަމާބެހޭ ފަރާތްތަކުން ބެލެނީ، މި ހާދިސާ އާއި، އަލިފާންގަނޑު އަވަހަށް ފެތުރި، މިހާ ގިނަ ބަޔަކަށް ގެއްލުންވުމުގައި، އިމާރާތްކުރުމުގެ މަސައްކަތާ ހަވާލުވެ ތިބި ފަރާތްތަކުގެ ބޮޑު އިހުމާލެއް އޮތް ކަމަށެވެ.
އަލިފާންގަނޑު ފެށިފައި ވަނީ ހޮންކޮންގްގެ ގަޑިން 2:50 ގައި، ތައި ޕޯ ޑިސްޓްރިކްޓްގެ އެއް އިމާރާތަކުން ކަމަށް ބެލެވެއެވެ. އަދި އެއަށްފަހު އަވަހަށް އެތައް ބުރީގެ އިމާރާތްތަކަކަށް ފެތުރި، ސިޓީގެ އުތުރުގެ ނިއު ޓެރިޓަރީސްގެ އެކި ހިސާބުތަކަށް ދުން އަރާފައި ވެއެވެ. ބުރާސްފަތި ދުވަހުގެ ހެނދުނާ ހަމައަށް، އަލިފާން ނިއްވުމުގެ މަސައްކަތް ކުރިއަށް ގެންދެވުނު ކަމަށް ފަޔަރ ފައިޓަރުން ބުނެއެވެ. ނަމަވެސް، އިމާރާތްތަކުގެ ތެރޭގައި އަދިވެސް ހާލުގައި ޖެހިފައިވާ ކިތައް ރައްޔިތުން އެބަތިބިކަން ސާފުނުވާކަމަށް އޮފިޝަލުން ވިދާޅުވިއެވެ.
މި އިމާރާތްތައް ހިމެނޭ ކޮމްޕްލެކްސް އަކީ ވޮންގް ފުކް ކޯޓްގެ ނަމުން މަޝްހޫރު، ގާތްގަނޑަކަށް 2،000 އެޕާޓްމަންޓް ހިމެނޭ ތަނެކެވެ. 1980 ގެ އަހަރުތަކުގެ ކުރީކޮޅު ހެދި މި އިމާރާތްތަކުގައި، އަލިފާން ރޯވި އިރު، ހޮންގްކޮންގްގައި އިމާރާތްކުރުމާއި މަރާމާތުކުރުމަށް އާންމުކޮށް ބޭނުންކުރާ ބެންބޫ ސްކެފޯލްޑިންގް (ހިކި ދަނޑި) ވަނީ ހަރުކޮށްފައެވެ. ބާންބޫ ސްކެފޯލްޑިންގް (ހިކި ދަނޑި) އަކީ ހޮންގްކޮންގްގައި، ގިނަ ބަޔަކު ދިރިއުޅޭ، ބޯޑު އިމާރާތްތައް މަރާމާތުކުރުމަށް އާންމުކޮށް ބޭނުންކުރާ އެއްޗެކެވެ.
ފުލުހުންނާއި ފަޔަރ ސާރވިސްގެ އޮފިޝަލުން ވިދާޅުވީ، އިމާރާތްތަކުގެ ތެރޭގައި ތާށިވެފައިވާ ރައްޔިތުންގެ އެތައް ފޯނުކޯލެއް އެމީހުންނަށް ލިބިފައިވާ ކަމަށެވެ.
އަލިފާން ނިއްވުމުގެ މަސައްކަތަށް ހޮންގްކޮންގް ފަޔަރ ސާރވިސް ޑިޕާޓްމަންޓުން 1،200 އަށް ވުރެ ގިނަ ފަޔަރ އަދި އެމްބިއުލާންސް މުވައްޒަފުން ހަރަކާތްތެރިވެފައި ވެއެވެ. ސަލާމަތްކުރުމުގެ މަސައްކަތް ކުރިއަށް ދިޔައިރު، 900 އަށް ވުރެ ގިނަ މީހުން ވަގުތީ ހިޔާވަހިކަމަށް ވަނީ ބަދަލުކޮށްފައެވެ.



