ދެކުނު އިރުމަތީ އޭޝިއާގެ ގައުމުތަކަށް ދާދިފަހުން ކުރިމަތިވި މޫސުމީ ކާރިސާތަކުގެ ސަބަބުން، މޫސުމަށް އަންނަ ބަދަލުތަކުގެ ނުރައްކާ ބޮޑުވަމުންދާ މިންވަރު ހާމަވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ އެކްސްގައި ކުރެއްވި ޕޯސްޓެއްގަ އެވެ. ރައީސް ވިދާޅުވީ ތައިލެންޑް، އިންޑޮނޭޝިއާ އަދި ވިއެޓްނާމް ފަދަ ގައުމުތަކަށް ކުރިމަތިވި ކާރިސާތަކަކީ، މި ބޮޑު ނުރައްކަލުގެ ހަނދާން އާކޮށްދޭ ކަމެއް ކަމަށެވެ.
މި ކާރިސާތަކުގައި ލިބުނު ގެއްލުންތަކާ މެދު ރައީސް ވަނީ ހިތާމަ ފާޅުކުރައްވާފަ އެވެ. އަދި މި ހާދިސާތަކުގައި މަރުވި ފަރާތްތަކުގެ އާއިލާތަކަށް ތައުޒިޔާ ވިދާޅުވެ، އެމަނިކުފާނުގެ ހަމްދަރުދީ ފޮނުއްވާފައިވެ އެވެ. މީގެ އިތުރުން، ހޮންގްކޮންގައި ހިނގި އަލިފާނުގެ ހާދިސާގައި ގިނަ ބަޔަކު މަރުވުމަކީ ވެސް ވަރަށް ބޮޑު ހިތާމައެއް ކަމަށް ރައީސް ވިދާޅުވި އެވެ.
ހޮންގްކޮންގެ އަލިފާނުގެ ހާދިސާއާ ގުޅިގެން، ރައީސް މުއިއްޒު ވަނީ ދިވެހި ރައްޔިތުންގެ ނަމުގައި، ޗައިނާގެ ރައީސް ޝީ ޖިންޕިން އަށާއި، އެ ގައުމުގެ ސަރުކާރަށާއި، އަދި ހާދިސާގައި ގެއްލުންވި ފަރާތްތަކުގެ އާއިލާތަކަށް ވަރަށް އިޚްލާސްތެރިކަމާއެކު ތައުޒިޔާ ފޮނުއްވާފަ އެވެ. މި ހާދިސާތަކުގެ ސަބަބުން ލިބުނު ގެއްލުންތަކާ މެދު ރާއްޖެއިން ކަންބޮޑުވާ ކަމަށާއި، އަދި އެކަމުގެ ހިތާމައިގައި ބައިވެރިވާ ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވީ މި ހާދިސާތަކުގެ އަސަރުކުރި ހުރިހާ ފަރާތްތަކަކާއެކު ރާއްޖެ ސާބިތުކަމާއެކު އޮންނާނެ ކަމަށެވެ. އަދި ހާދިސާތަކުގައި އެހީތެރިކަން ފޯރުކޮށްދިނުމުގައި ހަރަކާތްތެރިވި ސަލާމަތީ ޓީމުތަކުގެ ހިތްވަރަށް ރައީސް ވަނީ ޚާއްސަ ގޮތެއްގައި ތައުރީފު ކުރައްވާފަ އެވެ. އެމަނިކުފާނު ވިދާޅުވީ މިފަދަ ދަނޑިވަޅުތަކުގައި އެއްބައިވަންތަކަން ދައްކާލުމަކީ މުހިންމު ކަމެއް ކަމަށެވެ.