ބައުވެ ހަލާކުވެ މާލޭގެ މަގުތަކަށް ދޫކޮށްލާފައިވާ 800އަށް ވުރެ ގިނަ އުޅަނދު ފުލުހުން ނައްތާލައިފިއެވެ.
ރޯޑް ސޭފްޓީ އެވެއާނަސް އެންޑް ޕްރިވެންޝަން ހެޑް، ސުޕްރިންޓެންޑެންޓް އޮފް ޕޮލިސް އަޙްމަދު ފަޞީހް ވިދާޅުވީ މާލޭގެ ޕާކިން މައްސަލައަށް ހައްލެއް ހޯދައިދިނުމަށް ކުރަމުންގެންދާ މަސައްކަތްތަކުގެ ތެރެއިން، ބައުވެ ހަލާކުވެ މާލޭގެ މަގުތަކަށް ދޫކޮށްލާފައިވާ 801 އުޅަނދު މި އަހަރު ތެރޭގައި ނަގައި އިޖުރާއަތްތައް ފުރިހަމަކުރުމަށްފަހު ނައްތާލާފައިވާ ކަމަށެވެ.
މާލޭގެ ހޮސްޕިޓަލުތަކާއި ޚާއްސަ އެހީއަށް ބޭނުންވާ ފަރާތްތަކަށް ޚާއްސަކޮށްފައިވާ ރޭންޕުތަކުގެ މަތީގައި ޕާކުކޮށްފައި ހުންނަ އުޅަނދުތަކާއި މިސްކިތްތަކާއި ދަރިވަރުން ސްކޫލަށް ވަދެ ނުކުތުމަށް ދަތިވާ ގޮތަށް ޕާކުކޮށްފައި ހުންނަ އުޅަދުތަކުގެ އިތުރުން ކަފިހިހުރަސް މަތީގައި ޕާކުކޮށްފައި ހުންނަ އުޅަދުތައް ނެގުމުގެ މަސައްކަތް ކޮންމެ ދުވަހަކު ވެސް ކުރަމުންގެންދާކަން ފަޞީހް ފާހަގަކުރެއްވިއެވެ.
މިގޮތުން މި އަހަރު މިހާތަނަށް 7442 އުޅަނދު ނަގާފައިވާ ކަމަށާއި މީގެ ތެރެއިން، ގާނޫގައި ބަޔާންކޮށްފައިވާ މުއްދަތުގެ ތެރޭގައި ވެރިފަރާތުން ހަވާލުވާން ނައުމުގެ ސަބަބުން، ދެފޮރުޅުލީ 899 އުޅަނދާއި، ހަތަރުފުރޮޅުލީ 106 އުޅަނދު އިޖުރާއަތްތައް ފުރިހަމަކުރުމަށްފަހު ނައްތާލާފައިވާ ކަމަށް ވިދާޅުވިއެވެ.
މީގެ އިތުރަށް ފަޞީހް ވަނީ މަގުމަތީގެ ސަލާމަތާއި ރައްކާތެރިކަން ދަމަހައްޓައި ނަގަހައްޓާނެ އައު ޖީލެއް ބިނާކުުރުމަށް މިނިސްޓްރީ އޮފް އެޑިއުކޭޝަނާ ގުޅިގެން މި އަހަރުގެ މިހާތަނަށް 17 ސްކޫލެއްގައި 549 ދަރިވަރުން ތަމްރީނުކުރެވި މި 17 ސްކޫލްގެ ހުރިހާ ދަރިވަރުންނާއި ބެލެނިވެރިން އަދި މުދައްރިސުން ހިމެނޭ ގޮތަށް، މަގުމަތީގެ ސަލާމަތާއި ރައްކާތެރިކަމާ ގުޅުންހުރި މައުލޫމާތު ހިއްސާކޮށްފައިވާ ކަމަށްވެސް ވާހަކައިގައި ފާހަގަކުރައްވާފައެވެ.
އަދި އާއްމުކޮށް ވެހިކަލް ދުއްވާ ފަރާތްތަކަށް އަމާޒުކޮށްގެން ހިންގުނު 10 ތަމްރީނު ޕްރޮގްރާމްގެ ތެރެއިން މަގުމަތީގެ ސަލާމަތާއި ރައްކާތެރިކަމާ ގުޅުންހުރި ކަންކަމަށް ހޭލުންތެރިކުރުވުމަށް 1070 މީހަކަށް މައުލޫމާތު ދީފައިވާ ކަމަށްވެސް ފުލުހުން ހާމަކުރެއެވެ.
މަގު ބޭނުންކުރާ ފަރާތްތަކަށް ޚާއްސަ މެސެޖުތައް ދިނުމާއި މައުލޫމާތު ފޯރުކޮށް ދިނުމުގެ ހަރަކާތްތައް ވެސް މާލެއާއި އަތޮޅު ތެރޭގައި ކުރިއަށް ގެންގޮސްފައިވާ ކަމަށާއި ރައްކާ ރޯޑް ޝޯވ ށ. އަތޮޅާއި. ގއ. އަތޮޅުގައި ގިނަ ހަރަކާތްތަކަކާއެކު ކުރިއަށް ގެންދެވި ގިނަ ބަޔަކު މަގުމަތީގެ ސަލާމަތާއި ރައްކާތެރިކަމަށް އަހުލުވެރިކުރެވިފައިވާ ކަމަށް ފަޞީހް ވިދާޅުވިއެވެ.