ހަތަރު މީހުންނާއެކު ދަތުރުކުރަމުން ދިޔަ މުދާ އުފުލާ ބޯޓެއް ތާޖް އެގްޒޯޓިކާ ރިސޯޓު ކައިރިން ބަންޑުން ޖަހާލައިފިއެވެ. އެމްއެންޑީއެފުން މައުލޫމާތު ދެއްވާފައިވާ ގޮތުގައި މި ހާދިސާގައި ބަންޑުން ޖަހާލާފައިވަނީ “ބަލްމާ-6” ނަމަކަށް ކިޔާ މުދާ އުފުލާ ބޯޓެކެވެ.
މި ހާދިސާ ހިނގި ސަރަހައްދުގައި އެމްއެންޑީއެފް މާލޭ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަންގެ ޑައިވަރުންގެ ޓީމަކުން މިހާރު އަންނަނީ ހަރަކާތްތެރިވަމުންނެވެ. މި ހާދިސާގެ ރިޕޯޓު ލިބުމާއެކު ކޯސްޓްގާޑުން ވަނީ އެހީތެރިކަން ފޯރުކޮށްދިނުމުގެ މަސައްކަތް ފަށާފައެވެ.
ބޯޓު ބަންޑުން ޖަހާލި އިރު އޭގައި ހަތަރު މީހުން ތިބި ކަމަށް އެމްއެންޑީއެފުން ވިދާޅުވިއެވެ. އޭގެ ތެރެއިން ދެ މީހަކު އެ ސަރަހައްދުން ދަތުރުކުރި އެހެން ދޯންޏަކަށް ނަގައި، މިހާރު ވަނީ ސަލާމަތްކޮށްފައެވެ. އަދި ބާކީ ތިބި ދެމީހުން ހޯދުމުގެ މަސައްކަތް އަދިވެސް ކުރަމުން އަންނަކަމަށް އެމްއެންޑީއެފުން ބުނެފައިވެއެވެ.
މި ހާދިސާ ހިނގަން މެދުވެރިވި ސަބަބެއް އެމްއެންޑީއެފުން އަދި ހާމައެއް ނުކުރެއެވެ. ކޯސްޓްގާޑުން ދަނީ ބޯޓު އޮތް ސަރަހައްދުގައި ރައްކާތެރިކަން ކަށަވަރުކުރުމަށާއި، ބޯޓުން ކަނޑަށް އުކިފައިވާ މުދަލާއި އެހެނިހެން ތަކެތީގެ ސަބަބުން ދަތުރުފަތުރަށް ހުރަސް އެޅުނަ ނުދިނުމަށް މަސައްކަތް ކުރަމުންނެވެ.