ޕާކިސްތާނުގެ ކަރާޗީގައި ހުންނަ ބޮޑު ޝޮޕިންގް ޕްލާޒާއެއްގައި ހިނގި ނުރައްކާތެރި އަލިފާނުގެ ހާދިސާގައި މަރުވި މީހުންގެ އަދަދު 23 އަށް އަރައިފި ކަމަށް އެ ގައުމުގެ ފުލުހުން ހާމަކޮށްފިއެވެ. މި ހާދިސާގައި އަދިވެސް ގިނަ ބަޔަކު ގެއްލިފައިވާ ކަމަށް ރިޕޯޓުތައް ބުނެއެވެ.
މަލްޓި-ސްޓޯރީ މި ޕްލާޒާގައި ރޯވި އަލިފާންގަނޑު ނިއްވާލެވުނީ ގާތްގަނޑަކަށް 24 ގަޑިއިރުގެ މަސައްކަތަށްފަހު އާދީއްތަ ދުވަހުގެ ރޭގަނޑުގެ ވަގުތެއްގައެވެ. ކަރާޗީގެ ޕޮލިސް ޗީފް އަސަދު ރަޒާ ވިދާޅުވި ގޮތުގައި، އަދިވެސް 46 މީހަކު ނުފެނިގެން ހޯދަމުންދާތީ، މަރުވި މީހުންގެ އަދަދު މިއަށްވުރެ އިތުރުވުން އެކަށީގެންވެއެވެ.
ފުލުހުންގެ ސާޖަން ޑރ. ސުމައްޔާ ސައިއި ވިދާޅުވި ގޮތުގައި، މިހާތަނަށް ދެނެގަނެވިފައިވަނީ ހަ މީހެއްގެ ހަށިގަނޑެވެ. ބާކީ ތިބި މީހުންގެ ހަށިގަނޑުތައް ވަނީ ވަކިކުރަން ނޭނގޭ ވަރަށް އަނދާފައި ކަމުން، އެ މީހުން ދެނެގަތުމަށް ޑީއެންއޭ ޓެސްޓު ހަދަން ޖެހޭނެ ކަމަށް އޭނާ ވިދާޅުވިއެވެ.
ސިންދު ޕްރޮވިންސްގެ ޗީފް މިނިސްޓަރު މުރާދު އަލީ ޝާހް ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، މަރުވި މީހުންގެ ތެރޭގައި ފަޔަރ ފައިޓަރަކު ވެސް ހިމެނޭ ކަމަށެވެ. އަދި މަރުވި ކޮންމެ މީހެއްގެ އާއިލާއަށް ބަދަލުގެ ގޮތުގައި 10 މިލިއަން ރުޕީސް (36,000 ޑޮލަރު) ދިނުމަށް ސަރުކާރުން ވަނީ ނިންމާފައެވެ.
މި އަލިފާނުގެ ހާދިސާ ހިނގި ‘ގުލް ޕްލާޒާ’ އަކީ 1,200 އަށްވުރެ ގިނަ ފިހާރަ ހިމެނޭ ބޮޑު ކޮމްޕްލެކްސްއެކެވެ. ކަރާޗީގެ ޗީފް ރެސްކިއު އޮފިސަރު ޑރ. އާބިދު ޖަލާލް ޝެއިޚް ވިދާޅުވި ގޮތުގައި، ކޮސްމެޓިކްސް އާއި އަންނައުނު އަދި ޕްލާސްޓިކް ސާމާނު ހުރި ފިހާރަތަކުގެ ސަބަބުން އަލިފާންގަނޑު ވަރަށް ހަލުވިކަމާއެކު މުޅި އިމާރާތަށް ފެތުރިގެން ދިޔައެވެ.
އަލިފާން ރޯވާން މެދުވެރިވި ސަބަބު އަދި ދެނެގަނެވިފައި ނުވާއިރު، ފުލުހުން ދަނީ އެކަން ތަހުގީގު ކުރަމުންނެވެ. ކަރާޗީއަކީ މީގެ ކުރިން ވެސް މިފަދަ ނުރައްކާތެރި އަލިފާނުގެ ހާދިސާތައް ހިނގާފައިވާ ސިޓީއެކެވެ. މިގޮތުން 2012 ވަނަ އަހަރު ގާމެންޓް ފެކްޓްރީއެއްގައި ހިނގި އަލިފާނުގެ ހާދިސާއެއްގައި 260 މީހުން މަރުވެފައިވެއެވެ.