ސާފްގެ ފަރާތުން ފުރަތަމަ ފަހަރަށް އިންތިޒާމުކޮށްގެން ބޭއްވި “ސާފް ފުޓްސަލް ޗެމްޕިއަންޝިޕް 2026” ގެ ޗެމްޕިއަންކަން ދިވެހިރާއްޖެއިން ހޯދައިފިއެވެ. ތައިލެންޑުގައި ކުރިއަށްދާ މި މުބާރާތުގެ ޗެމްޕިއަންކަން ރާއްޖެއިން ކަށަވަރުކުރީ މިއަދު ކުޅުނު ފަސްވަނަ މެޗުގައި ބޫޓާންގެ މައްޗަށް ކުރިހޯދައިގެންނެވެ.
ބެންކޮކްގެ ނޮންތަބުރީ ސްޓޭޑިއަމްގައި ކުޅުނު މި މެޗު ރާއްޖެއިން ކާމިޔާބުކުރީ 3-1 ގެ ނަތީޖާއަކުންނެވެ. މި މޮޅާއެކު، މުބާރާތުގައި ރާއްޖެ ކުޅުނު ފަސް މެޗުންވެސް މޮޅުވެ 15 ޕޮއިންޓް ހޯދައިގެން، ބާކީ އެއް މެޗު އޮއްވާ ރާއްޖެއިން ވަނީ މުބާރާތުގެ ތަށި ކަށަވަރުކޮށްފައެވެ.
މެޗުގެ ފުރަތަމަ ހާފުގައި ބޫޓާނުން ވަނީ ޑިފެންސިވް ކުޅުމެއް ދައްކައި، ކައުންޓަރ އެޓޭކެއްގައި ލަނޑެއް ޖަހައި މެޗުގެ ލީޑު ނަގާފައެވެ. ނަމަވެސް، ފުރަތަމަ ހާފު ނިމެން ދެ މިނެޓަށް ވެފައިވަނިކޮށް ހުސެއިން ޝަރީފް (އޮންލީ) ދިން ފުރުސަތަކުން އަބްދުﷲ ޖުނެއިދު (ޖެންނެ) ވަނީ ރާއްޖެއަށް ނަތީޖާ ހަމަހަމަކޮށްދީފައެވެ.
ދެވަނަ ހާފު ފަށައިގެން ތިންވަނަ މިނެޓުގައި އަހުމަދު ހަމީދު ޖަހައިދިން ލަނޑުން ރާއްޖެއިން ފުރަތަމަ ފަހަރަށް މެޗުގެ ލީޑު ނެގިއެވެ. އަދި މެޗު ނިމެން ފަސް މިނެޓަށް ވެފައިވަނިކޮށް ކެޕްޓަން މުހައްމަދު އިމްރާން (އިންމި) ވަނީ ރާއްޖޭގެ ތިންވަނަ ލަނޑު ޖަހައިދީ، ކާމިޔާބީ ކަށަވަރުކޮށްދީފައެވެ.
މި ތާރީޚީ ކާމިޔާބީއާ ގުޅިގެން ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، ކުޅިވަރުގެ މައިދާނުގައި ދިވެހި ހިތްވަރުގަދަ ދަރީން ހޯދަމުންދާ ރަންވަނަތައް އިތުރުވުމަކީ، ޤައުމުގެ މުސްތަޤްބަލަށް އުޖާލާ ކަމެއް ކަމަށެވެ. އަދި ކުޅުނު ކޮންމެ މެޗަކުން މޮޅުވެ، ބައިނަލްއަޤްވާމީ މުބާރާތެއްގެ އެއްވަނަ ހޯދުމަކީ ތާރީޚީ ފަޚުރެއްކަން އެމަނިކުފާނު ފާހަގަކުރެއްވިއެވެ.
މުބާރާތުގެ ޗެމްޕިއަންކަން މިހާރު ކަށަވަރުވެފައިވީ ނަމަވެސް، ރާއްޖެއިން ކުޅޭ ފަހު މެޗުގައި މި މަހުގެ 26 ވަނަ ދުވަހު ނުކުންނާނީ ސްރީލަންކާއާ ދެކޮޅަށެވެ.