ވޭތުވެދިޔަ ތިން ދުވަހު އަފްޣާނިސްތާނަށް ކުރިމަތިވި ގަދަ ސްނޯއާއި ބޯކޮށް ވާރޭވެހުމުގެ ހާދިސާތަކުގައި 61 މީހުން މަރުވެ، 110 މީހުންނަށް އަނިޔާވެފައިވާ ކަމަށް އެ ގައުމުގެ ކާރިސާތަކާ ބެހޭ އިދާރާއިން ހޮނިހިރު ދުވަހު ހާމަކޮށްފިއެވެ. މި ގަދަ ފިނީގެ ސަބަބުން ބައެއް އަވަށްތަކަށް ދާން އޮންނަ މަގުތައް ބަންދުވެފައިވާއިރު، އެ ތަންތަނަށް އެހީ ފޯރުކޮށްދިނުމަށް ކަމާބެހޭ ފަރާތްތަކުން ދަނީ މަސައްކަތް ކުރަމުންނެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ތަރުޖަމާނު ޔޫސުފް ހައްމާދު ވިދާޅުވި ގޮތުގައި، އަފްޣާނިސްތާނުގެ 34 ޕްރޮވިންސްގެ ތެރެއިން 15 ޕްރޮވިންސަކަށް މި ކާރިސާގެ އަސަރު ވަނީ ކޮށްފައެވެ. މި ހާދިސާތަކުގައި 458 ގެއެއް މުޅިން ނުވަތަ ބައެއް ގޮތްގޮތުން ހަލާކުވެފައިވާއިރު، އެތައް ސަތޭކަ ޖަނަވާރެއް ވަނީ މަރުވެފައެވެ. އަދި ޕްރޮވިންސްތަކުން އިތުރު މައުލޫމާތު ލިބެމުންދާ ވަރަކަށް މަރުވި މީހުންގެ އަދަދު އިތުރުވުން އެކަށީގެންވާ ކަމަށްވެސް އޭނާ ވިދާޅުވިއެވެ.
އަފްޣާނިސްތާނަކީ މޫސުމީ ނުރައްކާތަކަށް ނާޒުކު ގައުމެކެވެ. ބޯކޮށް ސްނޯ ފޭބުމާއި ފެންބޮޑުވުމުގެ ހާދިސާތަކުގައި ކޮންމެ އަހަރަކުވެސް އެތައް ސަތޭކަ ބަޔަކު މަރުވެއެވެ. އެގޮތުން 2024 ވަނަ އަހަރުގެ ބަހާރު މޫސުމުގައި ހިނގި ފެންބޮޑުވުމުގެ ހާދިސާތަކުގައިވެސް 300 އަށްވުރެ ގިނަ މީހުން ވަނީ މަރުވެފައެވެ. ގިނަ ދުވަސްވީ ދާޚިލީ ހަނގުރާމަތަކާއި، އުމްރާނީ ވަސީލަތްތައް ދަށްވުމާއި، އަދި މޫސުމަށް އަންނަ ބަދަލުތަކުގެ ސަބަބުން މިފަދަ ކާރިސާތަކުގެ ނުރައްކާ އެ ގައުމަށް ވަނީ ބޮޑުވެފައެވެ.
ޚާއްޞަކޮށް އެ ގައުމުގެ އިރުމަތީ ޕްރޮވިންސްތަކަށް މިދިޔަ އަހަރު ކުރިމަތިވި ބާރުގަދަ ބިންހެލުންތަކުން އަދިވެސް އަރައިގަނެވިފައެއް ނުވެއެވެ. އެ ބިންހެލުންތަކުގައި 2,200 އަށްވުރެ ގިނަ މީހުން މަރުވެ، ގިނަ އަދަދެއްގެ ބަޔަކު ވަނީ ގެދޮރު ގެއްލިފައެވެ. މިގޮތަށް ގެދޮރު ގެއްލިފައިވާ މީހުންނަށް މިހާރު ކުރިމަތިވެފައިވާ ގަދަ ފިނީގެ ސަބަބުން ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.
ޔުނިސެފުން ހާމަކޮށްފައިވާ ގޮތުގައި ބިންހެލުން ކުރިމަތިވި ސަރަހައްދުތަކުގައި ތިބި ގާތްގަނޑަކަށް 270,000 ކުޑަކުދިން ތިބީ ފިނީގެ ސަބަބުން ޖެހޭ ނުރައްކާތެރި ބަލިތަކުގެ ބިރުވެރިކަމެއްގެ ތެރޭގައެވެ. އދ. އިން ލަފާކުރާ ގޮތުގައި 2026 ވަނަ އަހަރާ ހަމައަށްވެސް އަފްޣާނިސްތާނު އޮންނާނީ ދުނިޔޭގެ އެންމެ ބޮޑު އިންސާނީ އެހީތެރިކަމަށް ބޭނުންވެފައިވާ ގައުމުތަކުގެ ތެރޭގައެވެ. މިކަމަށްޓަކައި އދ. އިން ވަނީ 18 މިލިއަން މީހުންނަށް އެހީވުމަށް 1.7 ބިލިއަން ޑޮލަރުގެ އެހީއަކަށް އެދިފައެވެ.