މީހެއްގެ އަމިއްލަ މީސް މީޑިއާ އެކައުންޓްތަކެއް ހެކްކޮށް، އެ މީހާގެ ހިއްސާ އޮންނަ ކުންފުންޏެއްގެ ބޭންކު އެކައުންޓުން ގިނަ އަދަދެއްގެ ފައިސާ ވަގަށް ނެގި މައްސަލައެއްގައި ތުހުމަތުކުރެވޭ 10 މީހަކު ފުލުހުން ހައްޔަރުކޮށްފިއެވެ. ދިވެހި ފުލުހުންގެ ހިދުމަތުން މައުލޫމާތު ދީފައިވާ ގޮތުގައި، މި މަހުގެ 21 ވަނަ ދުވަހު ފެށި ހާއްސަ އޮޕަރޭޝަނެއްގައި ހައްޔަރުކުރި މި މީހުން ވަނީ އެ ކުންފުނީގެ އެކައުންޓުން 279,600 އަށްވުރެ ގިނަ ރުފިޔާ ނަގާފައެވެ.
މި މައްސަލައިގައި ރާއްޖޭގެ އެކި ސަރަހައްދުތަކުން ހައްޔަރުކުރި މީހުންގެ ތެރޭގައި ހިމެނެނީ މާލެއިން ހައްޔަރުކުރި 6 މީހަކާއި، އައްޑޫ ސިޓީން ހައްޔަރުކުރި 3 މީހެއްގެ އިތުރުން ކ. ހިންމަފުށިން ހައްޔަރުކުރި މީހެކެވެ. ހައްޔަރުކުރި މީހުންގެ ތެރޭގައި 19 އަހަރާއި 59 އަހަރާ ދެމެދުގެ ފިރިހެނުން ހިމެނޭއިރު، މީގެ ތެރޭގައި ރާއްޖޭގެ އެކި ރަށްތަކަށް ނިސްބަތްވާ މީހުން ހިމެނެއެވެ.
ފުލުހުންގެ ތަހުގީގުން ހާމަވެފައިވާ ގޮތުގައި، މި ގްރޫޕުގައި ހިމެނޭ 6 މީހަކީ މަކަރާއި ހީލަތުން ހޯދި ފައިސާ އެމީހުންގެ އަމިއްލަ އެކައުންޓްތަކަށް ޖަމާކޮށް، އެ ފައިސާ ނެގުމުގައި އަމަލީގޮތުން ބައިވެރިވި މީހުންނެވެ. މީގެ އިތުރުން، އެކަކު ވަނީ މި ފައިސާ ބޭނުންކޮށްގެން އެކި ވިޔަފާރިތަކުން މުދާ ގަނެފައެވެ. އަދި ބާކީ ތިބި 3 މީހުންނަކީ އެކި މީހުން އޮޅުވާލައިގެން އޭޓީއެމްތަކަށް ގެންގޮސް ފައިސާ ނެގުވުމަށްފަހު، އެ ފައިސާއާ ހަވާލުވި މީހުންކަމަށް ފުލުހުން ބުނެއެވެ.
މި މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، އެކި މީހުންނަށް 5 ދުވަހާއި 15 ދުވަހާ ދެމެދުގެ ބަންދުގެ މުއްދަތު ވަނީ ދީފައެވެ. ގޭންގު ކްރައިމް ޔުނިޓާއި، ހިންމަފުށި އަދި އައްޑޫ ސިޓީ ފުލުހުން ގުޅިގެން ހިންގި މި އޮޕަރޭޝަންގެ މައްސަލަ މިހާރު އިތުރަށް ތަހުގީގު ކުރަމުންދަނީ ފުލުހުންގެ އެންޓި ސްކޭމް ސެންޓަރުންނެވެ.