އިންޑިއާގެ ސްޓޭޓެއްގައި ނުރައްކާތެރި ނިޕާ ވައިރަސް ފެތުރެން ފެށުމާ ގުޅިގެން، އޭޝިއާގެ ބައެއް ގައުމުތަކުގެ އެއާޕޯޓުތަކުގައި ސިއްހީ ފާރަވެރިކަމާއި ދަތުރުވެރިން ސްކްރީން ކުރުމުގެ މަސައްކަތް ވަރުގަދަކުރަން ފަށައިފިއެވެ.
އިންޑިއާގެ ވެސްޓް ބެންގާލް އިން ނިޕާ ވައިރަހުގެ ފަސް ކޭސްއެއް ފެނިފައިވާކަން ކަށަވަރުވުމާ ގުޅިގެން، ތައިލެންޑް، ނޭޕާލް އަދި ތައިވާން ފަދަ ގައުމުތަކުން ވަނީ ރައްކާތެރިކަމުގެ ފިޔަވަޅުތައް އިތުރަށް ވަރުގަދަކޮށްފައެވެ. ނިޕާ ވައިރަހަކީ ޖަނަވާރުންގެ ފަރާތުން، ހާއްސަކޮށް ބަލިޖެހިފައިވާ އޫރާއި ވާލުގެ ފަރާތުން އިންސާނުންނަށް ފެތުރޭ ބައްޔެކެވެ. މީގެ އިތުރުން ބަލިޖެހިފައިވާ މީހަކާ ގާތުން ކޮންޓެކްޓްވުމުން ވެސް މި ބަލި ފެތުރެއެވެ.
ވެސްޓް ބެންގާލްގެ ހޮސްޕިޓަލަކުން މި ވައިރަސް ފެނުމާ ގުޅިގެން، ގާތްގަނޑަކަށް 100 އެއްހާ މީހުން މިހާރު ތިބީ ކަރަންޓީނުގައެވެ. އެންމެ ފުރަތަމަ މި ބަލި ފެނުނު ދެ ނަރުހުންނަށް ފަހު، އެ ހޮސްޕިޓަލުގެ ޑޮކްޓަރަކާއި ނަރުހެއްގެ އިތުރުން އެހެން މުވައްޒަފަކު ވެސް ވަނީ މި ބައްޔަށް ޕޮޒިޓިވް ވެފައެވެ.
ތައިލެންޑްގެ މިނިސްޓްރީ އޮފް ޕަބްލިކް ހެލްތުން ވަނީ ވެސްޓް ބެންގާލުން އަންނަ ފަސިންޖަރުން ސްކްރީން ކުރުމުގެ މަސައްކަތް އެ ގައުމުގެ ބޮޑެތި އެއާޕޯޓުތަކުގައި ފަށާފައެވެ. މިގޮތުން ސުވަރުނަބޫމީ، ފުކެޓް އަދި ދޮން މުއެންގް އެއާޕޯޓުގައި ފަސިންޖަރުންގެ ހުން ހުރިތޯ ބަލައި، ބަލީގެ އަލާމާތްތަކަށް ފާރަވެރިވުމަށް ކޮވިޑް-19 ގެ ދުވަސްވަރު ބޭނުންކުރި އުސޫލުތައް އަންނަނީ ބޭނުންކުރަމުންނެވެ.
މީގެ އިތުރުން، ފުކެޓް އިންޓަނޭޝަނަލް އެއާޕޯޓުގައި ސާފުތާހިރުކަމާއި ބަލި ކޮންޓްރޯލް ކުރުމުގެ ތައްޔާރީތައް ވަނީ އިތުރުކޮށްފައެވެ. އިންޑިއާގެ އިންޑިގޯ އެއާލައިނުން ކޮންމެ ދުވަހަކު ވެސް ވެސްޓް ބެންގާލްގެ ކަލްކަތާއާއި ފުކެޓާ ދެމެދު ސީދާ ދަތުރުތައް ބާއްވައެވެ. ދަތުރުވެރިން ބަލިވެއްޖެ ހާލަތެއްގައި އަމަލުކުރަންވީ ގޮތުގެ އިރުޝާދު ދިނުމަށް ހާއްސަ “ހެލްތު ކާޑު” ތަކެއް ވެސް މިހާރު އަންނަނީ ދޫކުރަމުންނެވެ.
މިކަމާ ގުޅިގެން އާންމުންގެ މެދުގައި އޮތް ކަންބޮޑުވުންތަކަށް ޖަވާބު ދެއްވަމުން ތައިލެންޑްގެ ބޮޑުވަޒީރު އަނޫޓިން ޗާންވިރަކުލް ވިދާޅުވީ، މިހާތަނަށް ތައިލެންޑުން މި ބަލީގެ އެއްވެސް ކޭސްއެއް ފެނިފައިނުވާ ކަމަށެވެ. ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން ފާރަވެރިވުމުގެ މިންގަނޑުތައް މަތީ ދަރަޖައެއްގައި ހިފަހައްޓާނެ ކަމަށް އޭނާ ވިދާޅުވިއެވެ.