ކޮލަމްބިއާގައި 13 ފަސިންޖަރުންނާއި ދެ ފަޅުވެރިންނާއެކު ދަތުރުކުރި މަތިންދާބޯޓެއް ބުދަ ދުވަހު ވެއްޓި، އޭގައި ތިބި އެންމެން މަރުވެފައިވާކަމަށް އެ ގައުމުގެ ސިވިލް އެއިރޮނޮޓިކްސް އޮތޯރިޓީން ކަށަވަރުކޮށްދީފިއެވެ. މި ހާދިސާގައި މަރުވި މީހުންގެ ތެރޭގައި ކޮލަމްބިއާގެ ގާނޫނު ހަދާ މަޖިލީހުގެ މެންބަރެއް ކަމަށްވާ ޑިއޯޖެނިސް ކުއިންޓޭރޯ ވެސް ހިމެނިވަޑައިގަންނަވައެވެ.
ދައުލަތުގެ އެއާލައިން ކަމަށްވާ ސަޓޭނާ އިން އޮޕަރޭޓްކުރި މި ބޯޓު ދަތުރުކުރަމުން ދިޔައީ ކޫކޫޓާ އިން އޮކާނާ އަށެވެ. ޓްރާންސްޕޯޓް މިނިސްޓަރު މާރިއާ ފެނާންޑާ ރޯހަސް ވިދާޅުވި ގޮތުގައި، ބޯޓު ނައްޓާލިތާ ކުޑަވަގުތުކޮޅެއްގެ ތެރޭގައި އެއާ ޓްރެފިކް ކޮންޓްރޯލާ އޮތް ގުޅުން ވަނީ ކެނޑިފައެވެ. ފްލައިޓް އެވެއާގެ ތަފާސްހިސާބުތަކުން ދައްކާގޮތުގައި، ބޯޓު ނައްޓާލިތާ ނުވަ މިނެޓު ތެރޭގައި ބޯޓުގެ ސިގްނަލް ވަނީ ގެއްލިފައެވެ.
މި ހާދިސާގައި މަރުވި ކުއިންޓޭރޯ އަކީ 2022 ވަނަ އަހަރުން ފެށިގެން ގައުމީ މަޖިލީހުގެ މެންބަރެކެވެ. އޭނާއަކީ 2016 ވަނަ އަހަރު ފާކް (FARC) ހަނގުރާމަވެރިންނާއެކު ވެވުނު ސުލްހައިގެ އެއްބަސްވުމުގެ ދަށުން، އަނިޔާ ލިބުނު މީހުން ތަމްސީލުކުރުމަށް މަޖިލީހުން ހާއްސަކުރި 16 ގޮނޑީގެ ތެރެއިން ގޮނޑިއެއް ފުރުއްވަމުން ގެންދެވި މެންބަރެކެވެ. އޭނާ ނިސްބަތްވާ ޔޫ ޕާޓީން ވަނީ އޭނާއަކީ ސަރަހައްދީ ތަރައްގީއަށް މަސައްކަތްކުރެއްވި، އިހުލާސްތެރި ލީޑަރެއްގެ ގޮތުގައި ސިފަކޮށްފައެވެ.
ކުއިންޓޭރޯގެ މުވާސަލާތީ ޓީމުން ބުނި ގޮތުގައި، ބޯޓު ގެއްލުމުގެ ކުރިން އޭނާ އާއި އޭނާގެ އެސިސްޓަންޓާ އެންމެ ފަހުން ގުޅުނުއިރު ތިއްބެވީ ކޫކޫޓާގެ ކަމީލޯ ދާޒާ އެއާޕޯޓުގައެވެ. ބޯޓު ވެއްޓިފައި އޮއްވާ ފެނިފައިވަނީ ލަ ޕްލާޔާ ޑި ބެލެންގެ ރޫރަލް ސަރަހައްދަކުންނެވެ. މި ހާދިސާއާ ގުޅިގެން ނޯޓޭ ޑި ސަންޓަންޑާގެ ގަވަރުނަރުގެ އޮފީހުން ވަނީ މަރުވި މީހުންގެ އާއިލާތަކަށް ތައުޒިޔާ ފޮނުވާފައެވެ.