ގެއްލިގެން ހޯދަމުން ދަނިކޮށް ތިލަފުށީ ކުނިގޮނޑު ސަރަހައްދުގައި މަރުވެފައި އޮއްވާ ފެނުނު ބަންގްލަދޭޝްގެ ރައްޔިތެއް ކަމަށްވާ އަމީން މިއާގެ މަރުގެ މައްސަލައިގައި ސްރީ ލަންކާއަށް ނިސްބަތްވާ މީހަކު ފުލުހުން ހައްޔަރުކޮށްފިއެވެ. އުމުރުން 24 އަހަރުގެ އަމީން މިއާ ގެއްލިގެން ހޯދަން ފަށާފައިވަނީ މިދިޔަ މަހުގެ 26 ވަނަ ދުވަހުއެވެ. އޭނާގެ ހަށިގަނޑު ފެނިފައިވަނީ އޭގެ ދެ ދުވަސް ފަހުން، އެ މަހުގެ 28 ވަނަ ދުވަހުއެވެ.
ފުލުހުންގެ ތަހުގީގަށް ހޯދާފައިވާ ސީސީޓީވީ ފުޓޭޖުތަކުން ފެންނަ ގޮތުގައި، އަމީން ގެއްލުނު ސަރަހައްދުގައި މަސައްކަތް ކުރަމުންދިޔަ އެކްސްކެވޭޓަރެއްގެ ދަތްގަނޑުން އޭނާގެ ގައިގައި ޖެހިފައިވެއެވެ. ނަމަވެސް، އެ ހާދިސާއަށް ފަހުވެސް އެއްވެސް މެދުކެނޑުމެއް ނެތި އެކްސްކެވޭޓަރުގެ މަސައްކަތް ކުރިއަށް ގެންގޮސްފައިވާކަން ފުޓޭޖުން ފާހަގަކުރެވޭ ކަމަށް ފުލުހުން މައުލޫމާތު ދީފައިވެއެވެ.
މި މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފައިވަނީ އެކްސްކެވޭޓަރު އޮޕަރޭޓް ކުރަން އިން 32 އަހަރުގެ ލަންކާ ފިރިހެނެކެވެ.
ފުލުހުން އިތުރަށް ބުނެފައިވަނީ މި މަރުގެ މައްސަލައިގެ ތަހުގީގު ވަރަށް ބާރަށް ކުރިއަށްދާ ކަމަށެވެ. އަދި ތަހުގީގަށް އިތުރު ކުރިއެރުންތައް ލިބެމުންދާ މިންވަރަކުން، އާންމުންނަށް ހާމަކުރެވެން ހުރި މައުލޫމާތުތައް ހިއްސާކުރަމުންދާނެ ކަމަށްވެސް ފުލުހުންގެ އިދާރާއިން ވަނީ ބުނެފައެވެ.