ޒަރީހާ މޫސާ (ޒައްރަ) އަކީ މާފަންނު އުތުރު ދާއިރާގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއު.ޑީ.ސީ) އަށް ޕީ.އެން.ސީގެ ފަރާތުން ލޯކަލް ކައުންސިލް އިންތިހާބުގައި ވާދަކުރައްވާ، އިޖުތިމާޢީ ޚިދުމަތްތެރިއެއްގެ ގޮތުގައި ފާހަގަކޮށްލެވޭ އުންމީދީ ސިޔާސީ ފަރާތެކެވެ. އޭނާގެ މި ދަތުރަކީ ތަޢުލީމީ ކާމިޔާބީއާއި، މަސައްކަތުގެ ތަޖުރިބާ އަދި އިޖުތިމާޢީ ޚިދުމަތަށް އޮތް ނުގުޑާފަދަ ޝައުޤުވެރިކަމުގެ ފުރިހަމަ މިސާލެކެވެ.
ތަޢުލީމީ ކާމިޔާބީއާއި ހުނަރުވެރިކަން
ޒައްރަގެ ތަޢުލީމީ ޙަޔާތަކީ ފާހަގަކޮށްލެވޭ ކާމިޔާބީތަކެއް ހާސިލުކޮށްފައިވާ ދަތުރެކެވެ. ސާނަވީ އަދި މަތީ ސާނަވީ ތަޢުލީމު ނިންމެވުމަށްފަހު، ބިޒްނަސް އެޑްމިނިސްޓްރޭޝަންގެ އެސޯސިއޭޓް ޑިގްރީއިން އެންމެ މޮޅު ނަތީޖާ ހޯދައިގެން “ޓޮޕް އެޗީވާސް އެވޯޑް” އޭނާ ވަނީ ހާސިލުކުރައްވާފައެވެ. އޭގެ ފަހުން ބިޒްނަސް އެޑްމިނިސްޓްރޭޝަންގެ ދާއިރާއިން ބެޗްލާސް ޑިގްރީ އަދި މާސްޓާސް ޑިގްރީ ފުރިހަމަކުރައްވައި، ލީޑަރޝިޕާއި އާންމު ޚިދުމަތަށް ބޭނުންވާ ހުނަރާއި ޢިލްމު ވަނީ މުއްސަނދިކުރައްވާފައެވެ.
ޒައްރަގެ މަސައްކަތުގެ ދާއިރާ ފެށުނީ ސީ.އެޗް.އެސް.އީ ނިންމެވުމަށްފަހު އަމިއްލަ ކުންފުންޏަކުންނެވެ. އެތަނުގައި ފަސް އަހަރު ދުވަހު މަސައްކަތްކުރައްވައި ކޯޕަރޭޓް ދާއިރާގެ ތަޖުރިބާ ހޯއްދެވިއެވެ. އޭގެ ފަހުން މަތީ ތަޢުލީމު ފުރިހަމަކުރައްވައި، މެޖިސްޓްރޭޓް ކޯޓެއްގެ އިދާރީ ދާއިރާގައި ފަސް އަހަރު ދުވަހު ޚިދުމަތްކުރެއްވިއެވެ. އަދި ވިލާ ކޮލެޖުގެ އެސިސްޓަންޓް މެނޭޖަރެއްގެ މަޤާމުގައި ހަތަރު އަހަރު ދުވަހު މަސައްކަތްކުރެއްވިއެވެ. މި ތަފާތު ދާއިރާތަކުން ލިބުނު ތަޖުރިބާގެ ސަބަބުން، އިދާރީ ހިންގުމާއި، މެނޭޖްމަންޓް އަދި މީހުންނާ މުޢާމަލާތްކުރުމުގެ ހުނަރު އިތުރަށް ވަރުގަދަވެ، މުޖުތަމަޢުގެ ލީޑަރެއްގެ ގޮތުގައި މަސައްކަތްކުރުމަށް އޭނާ ވަނީ ފުރިހަމައަށް ތައްޔާރުވެފައެވެ.
ސިޔާސީ ދާއިރާއަށް ވަދެވަޑައިގަތުމާއި އިޖުތިމާޢީ މަސައްކަތްތައް
ޒައްރަގެ ސިޔާސީ ދަތުރު ފެށުނީ 2019 ވަނަ އަހަރުގެ ރައްޔިތުންގެ މަޖިލީހުގެ އިންތިޚާބުގެ ތެރެއިންނެވެ. އެ ދުވަސްވަރު އޭނާގެ ސިޔާސީ ފިކުރު ކަނޑައަޅައި، އެކި ފެންވަރުގައި އަމަލީގޮތުން މަސައްކަތް ކުރަން ފެށިއެވެ. ފާއިތުވި އަހަރުތަކުގައި، އޭނާއަކީ ހަމައެކަނި ސިޔާސީ ހަރަކާތްތަކުގައި ބައިވެރިވާ މީހެއްގެ އިތުރުން، އިޖުތިމާޢީ އެކި ކަންކަމުގައި ފާހަގަކޮށްލެވޭ ފަދަ ހަރަކާތްތެރި ދައުރެއް އަދާކުރާ ފަރާތެއްގެ ގޮތުގައި ވަނީ މަގުބޫލުކަން ހޯދާފައެވެ.
ސޯޝަލް މީޑިއާގެ ނުފޫޒު ގަދަ މި ޒަމާނުގައި، ޒައްރަ އަންނަނީ އާންމުންނާ ގުޅުން ބަދަހިކުރުމަށް ޑިޖިޓަލް ވަސީލަތްތައް ވަރަށް ފުރިހަމައަށް ބޭނުންކުރަމުންނެވެ. އޭނާ އޮންލައިންކޮށް އަދި އަމަލީ މައިދާނުގައި ކުރަމުންދާ އިޖުތިމާޢީ މަސައްކަތްތަކަށް ތާއީދުކުރާ ފަރާތްތަކުން ވަރަށް ބޮޑަށް ތައުރީފުކުރެއެވެ. މީގެ ސަބަބުން އާންމު ރައްޔިތުންނާ ގާތް ގުޅުމެއް އުފެދި، އޭނާއަކީ ފަސޭހައިން ބައްދަލުކޮށް ވާހަކަދެއްކޭނެ ފަރާތެއްގެ ގޮތުގައި ވަނީ މަޝްހޫރުވެފައެވެ.
ކީއްވެ މާފަންނު އުތުރު؟
މާފަންނު އުތުރު ދާއިރާއަށް ކުރިމަތިލުމަށް ޒައްރަ ނިންމި ނިންމުމަކީ އަމަލީ ތަޖުރިބާގެ މައްޗަށް ބިނާވެފައިވާ ނިންމުމެކެވެ. މީގެ ކުރިން ބޭއްވުނު އިންތިޚާބުތަކުގައި މާފަންނުގެ އެކި ސަރަހައްދުތަކުގައި ފުޅާދާއިރާއެއްގައި މަސައްކަތްކޮށްފައިވާތީ، މާފަންނު އުތުރަކީ އެކި ދާއިރާތަކުން އަންހެނުން ބާރުވެރިކުރުވުމަށް ބޮޑު ފުރުސަތެއް އޮތް ދާއިރާއެއް ކަމަށް އޭނާ ގަބޫލުކުރެއެވެ. ޒައްރަ ދެކޭގޮތުގައި، މި ދާއިރާއަކީ އެދެވޭ ބަދަލަކަށް ތައްޔާރަށް އޮތް ދާއިރާއެކެވެ. އަދި އޭނާގެ އަމާޒަކީ އަންހެނުންގެ ފުރިހަމަ ގާބިލިއްޔަތު ހާމަކޮށްދިނުމަށް އެހީތެރިވެދިނުމެވެ.
މީގެއިތުރުން އިޖުތިމާޢީ ގޮތުން ޒައްރާ ފާހަގަކުރެވެނީ އިޖުތިމާޢީ މައްސަލަތަކަށް ވަކާލާތުކުރާ ވަރުގަދަ ޝަޚުޞިއްޔަތެއްގެ ގޮތުގައެވެ. ޚާއްޞަކޮށް އަސާސީ ޚިދުމަތްތައް ހޯދުމުގައި ދިމާވާ ގޮންޖެހުންތަކުން އަރައިގަތުމަށް އާންމުންނަށް އެހީތެރިކަން ފޯރުކޮށްދޭ ފަރާތެއްގެ ގޮތުގައި މުޖުތަމަޢުގެ ގިނަ ބަޔަކު އޭނާ ބަލައިގަނެއެވެ. އޭނާގެ ހިތްހެޔޮކަމާއި އެހީތެރިވުމުގެ ރޫޙުގެ ސަބަބުން، ރައްޔިތުންގެ މެދުގައި އޭނާއަކީ އިތުބާރު ކުރެވޭ ފަރާތަކަށް ވަނީ ވެފައެވެ.
ޒައްރަގެ ތަޞައްވުރާއި ލަނޑުދަނޑިތައް
ޒައްރަގެ މައިގަނޑު މަޤްޞަދުތައް ބިނާވެފައިވަނީ އަންހެނުން ބާރުވެރިކުރުވުމާއި އެކަނބަލުންގެ ލާބައާއި މަންފާއަށެވެ. އޭނާގެ ތަޞައްވުރުގެ ތެރޭގައި ހިމެނެނީ:
ތަފާތު އެކި ދާއިރާތަކާއި އިޖުތިމާޢީ މައިދާންތަކުގައި އަންހެނުން ބާރުވެރިކުރުވުމަށް ބާރުއެޅުން
ނަފްސާނީ އަދި ޖިސްމާނީ ދުޅަހެޔޮކަން އިތުރުކުރުމަށް ހިންގޭ ހަރަކާތްތަކަށް އެއްބާރުލުން ދިނުން
އިޤްތިޞާދީ ފުރުޞަތުތައް މަދު އަންހެނުންނަށް މާލީ މިނިވަންކަން ހޯދައިދިނުމަށް ހިތްވަރުދިނުން
އަންހެނުންނަށް ކުރާ ކޮންމެ ބާވަތެއްގެ އަނިޔާއަކާ ދެކޮޅަށް ސާބިތުކަމާއެކު ތެދުވުން
މުޖުތަމަޢުގެ ހާލަތު މެދުނުކެނޑި ބަލަމުންދާ، އިޚްލާޞްތެރި އަދި ރައްޔިތުންނާ ގާތުންދޭ ޚިދުމަތެއް ފޯރުކޮށްދިނުން
ޒައްރަ ގަބޫލުކުރާ ގޮތުގައި ކުރިއެރުމަކީ ހަމައެކަނި އެކުލަވައިލެވޭ ސިޔާސަތުތަކެއް ނޫނެވެ. އެއީ މެދުނުކެނޑި ރައްޔިތުންނާ އެކުވުމާއި، ދެވޭ އިޚްލާޞްތެރި އަޅާލުމެވެ.
ސިޔާސީ ގަބޫލުކުރުންތަކާއި ޕާޓީގެ ފިކުރު
ޒައްރަ ގަބޫލުކުރާ ގޮތުގައި ސަރުކާރުގެ ޚިދުމަތްތައް އެންމެ ފުރިހަމަ އަދި އަވަސް ގޮތެއްގައި ރައްޔިތުންނަށް ފޯރުކޮށްދެވޭނީ، މަންދޫބުން ސަރުކާރާ ގުޅިގެން މަސައްކަތް ކޮށްގެންނެވެ. އޭނާ ސަރުކާރު ހިންގާ މައި ޕާޓީ ކަމަށްވާ ޕީއެންސީގެ ފުރިހަމަ ތާއީދާއެކު އިންތިޚާބުގައި ވާދަކުރާ އެއް ސަބަބަކީ ވެސް މިއީއެވެ. ޚާއްޞަކޮށް، އޭނާ ނިސްބަތްވާ ޕީއެންސީން ގެންގުޅޭ އެންމެން ބައިވެރިކުރުމުގެ ސިޔާސަތާއި، “ސިޔާސީ ފިކުރަށް ބެލުމެއްނެތި އެއްވެސް މީހަކު ބާކީނުކުރުމުގެ” އުސޫލަށް އޭނާ ވަރަށް ބޮޑަށް ތާއީދުކުރެއެވެ. ޒައްރަ ފާހަގަކުރާ ގޮތުގައި މި އުސޫލަކީ ގިނަ އަދަދެއްގެ ސަޕޯޓަރުންނަށް ހިތްހަމަޖެހުމާއި އިތުބާރު ލިބިގެންދާ ކަމެކެވެ.
ޒައްރަ ވޯޓުލާ މީހުންނަށް ދޭ މެސެޖަކީ ޖަޒުބާތީ އަދި އެހާމެ ވަރުގަދަ އަޒުމެއް އެކުލެވިގެންވާ މެސެޖެކެވެ. އޭނާ އަމިއްލަ ނަފްސު ހުށަހަޅަނީ ހަމައެކަނި ކެންޑިޑޭޓެއްގެ ގޮތުގައެއް ނޫނެވެ؛ އެއީ ތަރައްގީގެ މަގުގައި ރައްޔިތުންނާ އެކުގައިވާ ބައިވެރިއެއްގެ ގޮތުގައެވެ.
“އަޅުގަނޑު އިންތިޚާބްކޮށްފިނަމަ ޔަގީންކަން މިއަރުވަނީ ތިޔަ ކަނބަލުންގެ އަތުގައި ހިފައިގެން ފުރަތަމަ ސަފަށް ނިކުންނާނެ ފަރާތަކީ އަޅުގަނޑުކަމުގައިވާނެ! އަޅުގަނޑާއި ތިޔަ ކަނބަލުންނާއި ދެމެދުގައި އެއްވެސް ހުރަހެއް ނުވާނެ! އަދިއަޅުގަނޑުގެ ޚިދުމަތަކީ ހަމަ ތިޔަކަނބަލުންނަށްޓަކައި 24 ގަޑިއިރުގެ ޔަގީން ޚިދުމަތެއް!! ޝައްކުނުކުރައްވާ!! ޔަގީންކުރައްވާ!! އަޅުގަނޑަކީ ކެންޑިޑޭޓް ނަންބަރު 5 ޒައްރަ” — ޒައްރަ
ތައުލީމީ ގާބިލުކަމާއި، މަސައްކަތުގެ އަޚުލާގާއި، އިޚުލާޞްތެރި އިޖުތިމާއީ ޚިދުމަތުގެ މައްޗަށް ބިނާވެފައިވާ ބަހީ ފެށުމަކާއެކު، ޒަރީހާ މޫސާ (ޒައްރަ) ކުރިމަތިލައްވަނީ ތަޖުރިބާއާއި ހަމްދަރުދީ، އަދި އުންމީދާއި ޒިންމާދާރުކަން އެކުލެވިގެންވާ ކެންޑިޑޭޓެއްގެ ގޮތުގައެވެ. އޭނާގެ އަމާޒަކީ މާފަންނު އުތުރަކީ އަންހެނުންނާއި އާއިލާތަކަށް ވެސް ބާރުވެރި، ވަރުގަދަ މުޖުތަމައަކަށް ހެދުމެވެ.