ސަރުކާރުން އަމިއްލަ ކުންފުނިތަކަށް ދައްކަންޖެހި ނުދެއްކި ހުރި ބިލްތަކަށް ފައިސާ ދެއްކުމަށް ކުރަމުންދާ މަސައްކަތުގެ ދަށުން، އަންނަ ހަފްތާގެ ތެރޭގައި 200 މިލިއަން ރުފިޔާ ދޫކުރުމަށް ސަރުކާރުން ނިންމައިފިއެވެ. މިކަން ހާމަކުރެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.
ރައީސް ވިދާޅުވި ގޮތުގައި، ކުރީގެ ސަރުކާރުން ފެށިގެން އަމިއްލަ ކުންފުނިތަކަށް ނުދީ ހުރި ފައިސާގެ މައްސަލަ ހައްލުކުރުމަކީ މި ސަރުކާރުން ވަރަށް ބޮޑު އިސްކަމެއް ދޭ ކަމެކެވެ.
“އަންނަ ހަފްތާއަކީ ވެސް އެގޮތުން މުހިންމު މަސައްކަތެއް ކުރެވޭނެ ހަފްތާއެއް. 200 މިލިއަން ރުފިޔާ އަންނަ ހަފްތާ އަމިއްލަ ކުންފުނިތަކަށް ދޫކުރެވޭނެ،” ރައީސް ވިދާޅުވިއެވެ.
ފައިސާ ދޫކުރުމުގެ ތަފްސީލްތަކަށް އަލިއަޅުއްވާލައްވަމުން ރައީސް ވިދާޅުވީ، ސަރުކާރުގެ އަމާޒަކީ ކުދި އަދަދުތަކުން ފައިސާ ދައްކަންޖެހިފައިވާ ކުންފުނިތަކުގެ ބިލްތައް އެއްކޮށް ދައްކާ ހަލާސްކުރުން ކަމަށެވެ. ނަމަވެސް، އަންނަ ހަފްތާގައި ދޫކުރުމަށް ހަމަޖެހިފައިވާ 200 މިލިއަން ރުފިޔާއަކީ އެއް މިލިއަން ރުފިޔާއަށް ވުރެ މަތީގެ ބިލްތަކަށް ހާއްސަކޮށްގެން ދޫކުރާ ފައިސާކަން ރައީސް ފާހަގަކުރެއްވިއެވެ.
ރައީސް އިތުރަށް ވިދާޅުވީ، ސަރުކާރުން މަސައްކަތް ކުރަމުންދަނީ ނުދެއްކި ހުރި ހުރިހާ ފައިސާއެއް އެކީގައި ދައްކާ ނިންމާލެވޭނެ މަގަކަށް ކަންކަން ބައްޓަންކުރުމަށެވެ. މިއީ އަމިއްލަ ވިޔަފާރިތަކަށް ކުރިމަތިވެފައިވާ މާލީ ދަތިތަކުން އަރައިގަތުމަށް ސަރުކާރުން ދޭ އެހީތެރިކަމެއްގެ ގޮތުގައި އެމަނިކުފާނު ސިފަކުރެއްވިއެވެ.