މިހާރު ކުރިމަތިވެފައިވާ ހާލަތްތަކާ ގުޅިގެން ދަތުރުފަތުރު ނުކުރެވި އަބޫދާބީގައި ތާށިވެފައި ތިބި ފަތުރުވެރިން ތިބި ހޮޓާތަކުގެ ހުރުމުގެ ޚަރަދު އަބޫދާބީ ސަރުކާރުން ހަމަޖައްސައިދޭން ނިންމައިފިއެވެ. އަބޫދާބީގެ ޑިޕާޓްމަންޓް އޮފް ކަލްޗަރ އެންޑް ޓޫރިޒަމް (ޑީސީޓީ) އިން ވަނީ އެ އެމިރޭޓްގެ ހުރިހާ ހޮޓާތަކަށް މިކަމާ ގުޅޭ ސާކިއުލާއެއް ފޮނުވާފައެވެ.
ޑީސީޓީން ފޮނުވި ސާކިއުލާގައި ބުނެފައިވަނީ، ބައެއް ފަތުރުވެރިން ހޮޓާތަކުން ޗެކްއައުޓްވާން ޖެހޭ ތާރީޚު ހަމަވެފައިވީ ނަމަވެސް، އެމީހުންގެ ބާރުގެ ދަށުގައި ނުވާ ސަބަބުތަކާ ހުރެ ދަތުރު ނުކުރެވިފައިވާ ކަމަށެވެ. އެހެންކަމުން، އެ ފަތުރުވެރިންނަށް ފުރެންދެން އެމީހުން ތިބި ހޮޓާތަކުގައި މަޑުކުރެވޭނެ އިންތިޒާމު ހަމަޖައްސައިދިނުމަށް ހޮޓާތަކަށް ވަނީ އަންގާފައެވެ.
މިގޮތަށް އިތުރުކުރެވޭ މުއްދަތުގެ ޚަރަދުތައް އުފުލާނީ ސަރުކާރުން ކަމަށް ޑީސީޓީން ވަނީ ކަށަވަރުކޮށްދީފައެވެ. އިތުރުކުރެވޭ މުއްދަތުގެ ހުރުމުގެ ޚަރަދު ހަމަޖައްސާނީ ޑީސީޓީ އަބޫދާބީން ކަމަށް ސާކިއުލާގައި ބުނެފައިވެއެވެ. މީގެ ސަބަބުން ފަތުރުވެރިންނަށާއި ހޮޓާ ހިންގާ ފަރާތްތަކަށް މާލީ ގޮތުން ކުރިމަތިވެދާނެ ތަކުލީފުތަކަށް ހައްލެއް ލިބިގެންދާނެއެވެ.
މި ނިންމުމަކީ 2018 ވަނަ އަހަރުގެ ޤާނޫނު ނަންބަރު 8 ގެ ދަށުން ޑީސީޓީ އަބޫދާބީއަށް ލިބިދީފައިވާ ބާރުގެ ދަށުން ނިންމާފައިވާ ނިންމުމެކެވެ. މި ފިޔަވަޅުގެ ސަބަބުން ދަތުރުފަތުރުގެ ކަންކަން ނުޔަގީންވެފައިވާ މި ދަނޑިވަޅުގައި، ފަތުރުވެރިންނަށް ބޮޑެތި ޚަރަދުތަކެއް ކުރަން ނުޖެހި ރައްކާތެރިކަމާއެކު ތިބެވޭނެކަން ކަށަވަރުވެގެންދެއެވެ.
މި ނިންމުމުގެ މައިގަނޑު މަގްސަދަކީ އަބޫދާބީއަކީ ބައިނަލްއަގުވާމީ ފަތުރުވެރިންނަށް ރައްކާތެރި އަދި އިތުބާރު ހުރި މަންޒިލެއްގެ ގޮތުގައި ދެމެހެއްޓުމެވެ.