ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ތަކުގެ އިންތިޚާބުގައި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން ވާދަކުރާ ކެންޑިޑޭޓުންނަށް ތާއީދު ހޯއްދެވުމަށް ރައީސުލްޖުމްހޫރިއްޔާ މުޙައްމަދު މުޢިއްޒު މާލޭގައި ކުރިއަށްގެންދަވާ ކެމްޕޭން ހަރަކާތްތައް މިއަދުވެސް ކުރިއަށް ގެންދަވައިފިއެވެ.
މި ކެމްޕޭން ހިނގާލުމުގެ އެންމެ ފަހުގެ ބުރުގައި ރައީސް ވަނީ މާފަންނު ހުޅަނގު ދާއިރާގެ ސަރަހައްދުތަކަށް ޒިޔާރަތްކުރައްވައި، ދޮރުން ދޮރަށް ހިންގަވައި އާއިލާތަކާ ބައްދަލުކުރައްވައި، އެ ސަރަހައްދުތަކުގެ ރައްޔިތުންނަށް ދިމާވެފައިވާ މައްސަލަތަކާ ގުޅޭގޮތުން އެމީހުންގެ ޚިޔާލު ހޯއްދަވާފައެވެ. ރައީސްގެ މި ހިނގާލެއްވުޟާއެކު ޕީއެންސީ ކެމްޕެއިން ހަރަކާތްވަނީ އިތުރަށް ފޯރިގަދަވެގެން ގޮސްފައެވެ.
ރައީސް ގޭގެއަށް ޒިޔާރަތްކުރައްވައި އަވަށްޓެރިންނާ ވާހަކަދައްކަވަމުން ގެންދެވިއިރު، ރައްޔިތުން ވަނީ އެމަނިކުފާނަށް ވަރަށް ހޫނު މަރުޙަބާއެއް ދަންނަވާފައެވެ. މި ބައްދަލުވުންތަކަކީ ރައްޔިތުންގެ ހުރި ކަންބޮޑުވުންތައް ހިއްސާކުރުމަށާއި، މުޖުތަމައަށް ބޭނުންވާ ކަންކަމާ ގުޅޭގޮތުން ދައުލަތުގެ އެންމެ މަތީ ވެރިޔާއާ ސީދާ މަޝްވަރާކުރުމަށް ލިބުނު ފުރުސަތެކެވެ.
ރައްޔިތުންނާ ވާހަކަދައްކަވަމުން ރައީސް މުޢިއްޒު ވަނީ ލޯކަލް ކައުންސިލްތަކަށާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް އިޚްލާޞްތެރި އަދި ޤާބިލު މަންދޫބުން އިންތިޚާބު ކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އެމަނިކުފާނު ވިދާޅުވި ގޮތުގައި، ލާމަރުކަޒީ ނިޒާމުގެ ފައިދާ މުޅި ރާއްޖޭގެ ރަށްތަކަށް ލިބޭނެކަން ކަށަވަރުކުރުމަށްޓަކައި މި މުއައްސަސާތައް ވަރުގަދަކުރުމަކީ ކޮންމެހެން ބޭނުންތެރި ކަމެކެވެ.
މީގެ އިތުރުން، ކުރިއަށް އޮތް އިންތިޚާބަކީ މާލޭގެ އަވަށްތައް އިތުރަށް ތަރައްޤީކުރުމަށާއި، މުނިސިޕަލް ޚިދުމަތްތައް ރަނގަޅުކުރުމަށާއި، އަންހެނުން ބާރުވެރިކުރުވުމަށް ކުރެވޭ މަސައްކަތްތައް ފުޅާކުރުމަށް ލިބޭ މުހިންމު ފުރުސަތެއްކަން ރައީސް ފާހަގަކުރެއްވިއެވެ. އަދި އިންތިޚާބުގައި ވާދަކުރާ ޕީއެންސީގެ ކެންޑިޑޭޓުންނަކީ ރައްޔިތުންނާ ގާތް ގުޅުމެއް ބާއްވާ، ރައްޔިތުންގެ ޚިދުމަތުގައި މަސައްކަތްކުރުމަށް ތައްޔާރަށް ތިބި ބައެއް ކަމުގެ ފުރިހަމަ އިތުބާރު އެބައޮތް ކަމަށްވެސް އެމަނިކުފާނު ވިދާޅުވިއެވެ.
މާފަންނު ހުޅަނގުގެ ގިނަ ރައްޔިތުން ވަނީ ރައީސް ސީދާ ގޭގެއަށް ޒިޔާރަތްކުރައްވައި ރައްޔިތުންނާ ބައްދަލުކުރައްވާ ގޮތަށް ތައުރީފުކޮށްފައެވެ. އަދި މިފަދަ ހަރަކާތްތަކުގެ ސަބަބުން ވެރިންނާއި ރައްޔިތުންނާ ދެމެދު އޮންނަ ގުޅުން ބަދަހިވެގެންދާކަން އެފަރާތްތަކުން ފާހަގަކުރިއެވެ.