ވަކި ކައުންސިލެއްގެ އެއްބާރުލުން ނުލިބުނަސް ރައްޔިތުންނަށްވީ ވަޢުދުތައް ފުއްދެވުމުގައި ސަރުކާރުން ފަހަށް ނުޖެހޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި އއ. ރަސްދޫއާއި އެ ދާއިރާގެ ކޮންގްރެސް ޕާޓީގެ ކެންޑިޑޭޓުން ހޯދި ކާމިޔާބީ ފާހަގަކުރުމަށް ބޭއްވި ޖަލްސާގައި ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާ ވިދާޅުވީ ކޮންމެ ޕާޓީއަކުން މަޤާމަކަށް އިންތިޚާބުވި ނަމަވެސް އިސްކުރައްވާނީ ދީނާއި، ޤައުމުގެ މަސްލަހަތުކަމަށެވެ. މި އިންތިޚާބުގެ ނަތީޖާއަށް ބަލާއިރު، ރާއްޖޭގެ މެޖޯރިޓީ ރައްޔިތުންގެ ވިސްނުންހުރީ ޤައުމާއި ދީން އިސްކުރުމުގެ ވިސްނުމުގައިކަން ހާމަވާކަމަށާއި، ގިނަ ރައްޔިތުން ތިބީ ޕީއެންސީގެ ފިކުރު ކަމުގައިވާ ދީނާއި ޤައުމީ ފިކުރަށް މެޖޯރިޓީދީގެންކަން ފާހަގަކުރައްވައި ރައީސް ވަނީ އެކަމަށް ރައްޔިތުންނަށް ޝުކުރު އަދާކުރައްވާފައެވެ. އަދި ބޮޑެތި ސީޓީތަކުން ކާމިޔާބު ނުލިބުނަސް ރައްޔިތުންގެ ހައްޤުގައި އިޚްލާސްތެރިކަމާއެކު ސަރުކާރުން މަސައްކަތްކުރައްވަމުން ގެންދަވާނެކަމަށް އެމަނިކުފާނު ވިދާޅުވިއެވެ.
އިންތިޚާބު ކާމިޔާބުކޮށް އަދި މަޤާމުތަކާ ހަވާލުނުވެވެނީސް ބައެއް އިންތިޚާބީ ކެނޑިޑޭޓުން މަގުތަކަށް ނިކުމުގެ ހަޑި ހުރުތުބަސްތައް ބޭނުންކޮށް، ދީނީ މިންގަނޑުން ބޭރުން އަޚުލާގީ ފެންވަރުދައް އަމަލުތައް ހިންގައި މަގުމަތި ހަލަބޮލިކުރަމުންދާކަމަށެވެ. ރައީސް ވިދާޅުވީ ރައްޔިތުން ވޯޓުދެނީ މަސައްކަތާ ހަވާލުވާ ހިސާބުން ފެށިގެން ޒިންމާދާރު މަސައްކަތްތަކެއް ކުރުމަށާއި ނަމޫނާ ބަޔަކަށް އެމަންދޫބުން ވާނެކަމުގެ އުންމީދުގައިކަމަށެވެ.
“މިހާރު މިފެންނަ މަންޒަރުން މާލޭ ސިޓީ ކައުންސިލުން މި އެއްބާރުލުން ލިބޭނެތަނެއް ނުފެނޭ. އަދި ނުވޭ ހަފްތާއެއް މިހާރު މަގުމަތީގައި އެއުޅެމުންދާ ގޮތް އެފެންނަނީ.” ރައީސް ޑރ. މުޙައްމަދު މުޢިއްޒު ވިދާޅުވިއެވެ.
ރައީސް ވިދާޅުވީ ކުރިއަށްއޮތް ތަނުގައި އެކަށީގެންވާ ސަބަބެއް ނެތި ކައުންސިލްތަކުން ސަރުކާރަށް އެއްބާރުލުން ނުދޭނަމަ އެކަން ވަރަށް ތަފުޞީލުކޮށް ރައްޔިތުންނަށް ހާމަކުރައްވަމުން ގެންދަވާނެކަމަށެވެ.
ޤައުމުގެ ކަންކަން އެންމެ ރަނގަޅުގޮތުގައި ކުރިއަށްގެންދިއުމަށް ރައްޔިތުންވެސް ޤައުމު އިސްކުރުމަށް އެދިވަޑައިގަންނަވަމުން ރައީސް ވަނީ ކައުންސިލްތަކުން ރައްޔިތުންގެ ހައްޤުގައި ކުރާ ކަންކަމަށް އެއްބާރުލުން ދިނުން މުހިންމުކަން ފާހަގަކުރައްވާފައެވެ.
ނިމިދިޔަ ރައްޔިތުންގެ ޚިޔާލު ހޯދުމުގެ ވޯޓުގައި ލިބުނު ނާކާމިޔާބީއަށް އަލިއަޅުއްވަލައްވަމުން ރައީސް ވިދާޅުވީ އެވޯޓު ނާކާމިޔާބުވުމުގެ ތަފާތު ސަބަބުތައްވާކަމަށާއި، އެކަމުގައި ޕީއެންސީގެ ކެމްޕެއިން ޓީމުތަކުން އެކަށީގެންވާ މަސައްކަތެއް ނުކުރެވުންވެސް ހިމެނޭކަމަށެވެ. ނުހަނު ސާފުކޮށް އޮތް މައްސަލައެއް ރައްޔިތުންނަށް އެކަށީގެންވާ ގޮތެއްގައި ކިޔައިދެވިފައި ނުވާކަމަށެވެ. ރައީސް ވިދާޅުވީ އެ ވޯޓުގައި ރައްޔިތުން ނިންމެވި ނިންމެވުމަށް މިއަދުވެސް ފުރިހަމައަށް އިޙްތިރާމް ކުރައްވާކަމަށެވެ.