ގަތަރުގެ މައި ލިކުއިފައިޑް ނެޗުރަލް ގޭސް (އެލްއެންޖީ) ޕްރޮސެސިން ފެސިލިޓީގައި ހިނގި ބާރުގަދަ ގޮވުމެއްގައި 54 މީހުން ޒަޚަމްވެ، އިތުރު 18 މީހަކު ގެއްލިފައިވާ ކަމަށް އެ ގައުމުގެ ކަމާބެހޭ ފަރާތްތަކުން ހާމަކޮށްފިއެވެ. މި ހާދިސާ ހިނގާފައިވަނީ ގަތަރުގެ ރައުސް ލައްފާން އިންޑަސްޓްރިއަލް ސިޓީގައެވެ.
ގަތަރުގެ މިނިސްޓްރީ އޮފް އިންޓީރިއާއިން ހޯމަ ދުވަހު ބުނި ގޮތުގައި، މި “އެތެރޭގެ ގޮވުން” ހިނގާފައިވަނީ ޓެކްނިކަލް މައްސަލައެއްގެ ސަބަބުންނެވެ. ގެއްލިފައިވާ މީހުން ހޯދުމުގެ މަސައްކަތް ކުރުމަށް ގަތަރުގެ އިންޓަނޭޝަނަލް ސާޗް އެންޑް ރެސްކިއު ގްރޫޕް މިހާރު ވަނީ އެ ސަރަހައްދުގައި ހަރަކާތްތެރިވާން ފަށާފައެވެ.
މި ހާދިސާގައި ޒަޚަމްވި މީހުންގެ ހާލަތާ ގުޅޭ އިތުރު ތަފްސީލެއް މިނިސްޓްރީން ހާމަކޮށްފައެއް ނުވެއެވެ. ނަމަވެސް، މި ހާދިސާގެ ސަބަބުން އާންމުންގެ ސަލާމަތަށް ނުރައްކާވާ ފަދަ އެއްވެސް ގޭހެއް ލީކުވެފައި ނުވާ ކަމަށް މިނިސްޓްރީން ކަށަވަރުކޮށްދެއެވެ.
އެ ސަރަހައްދު ބަލަހައްޓާ ގަތަރު އެނާޖީން ބުނި ގޮތުގައި، ބަރްޒާން ފެކްޓްރީގައި މި ގޮވުން ހިނގުމާއެކު ކުއްލި ހާލަތްތަކުގައި ހަރަކާތްތެރިވާ ޓީމުތައް ވަނީ އެ ސަރަހައްދަށް ގޮސްފައެވެ. އަދި ފެސިލިޓީގައި ރޯވި އަލިފާންގަނޑު މިހާރު ވަނީ ކޮންޓްރޯލް ކުރެވިފައެވެ.
ދޯހާގެ އުތުރުން ގާތްގަނޑަކަށް 80 ކިލޯމީޓަރު ދުރުގައި އޮންނަ ރައުސް ލައްފާން އިންޑަސްޓްރިއަލް ސިޓީއަކީ ދުނިޔޭގެ އެންމެ ބޮޑު އެލްއެންޖީ އެކްސްޕޯޓް ފެސިލިޓީއެވެ. މިއީ މުޅި ދުނިޔެއަށް ބޭނުންވާ ގޭހުގެ ފަސްބައިކުޅަ އެއްބައި އުފައްދާ މުހިންމު މަރުކަޒެކެވެ.
މިދިޔަ މާރިޗު މަހުވެސް އީރާނުން ދިން މިސައިލް އަދި ޑްރޯން ހަމަލާތަކެއްގައި މި ސަރަހައްދަށް ބޮޑެތި ގެއްލުންތަކެއް ލިބިފައިވާ ކަމަށް ގަތަރު ސަރުކާރުން ކުރިން ހާމަކޮށްފައިވެއެވެ. އެ ހަމަލާތަކާ ގުޅިގެން އިޓަލީ، ދެކުނު ކޮރެއާ އަދި ޗައިނާ ފަދަ ގައުމުތަކަށް ގޭސް ފޯރުކޮށްދިނުމުގައި ދަތިތަކެއް ކުރިމަތިވިއެވެ.