ޑިމޮކްރެޓިކް ރިޕަބްލިކް އޮފް ދަ ކޮންގޯ (ޑީއާރުސީ) ގެ އިރުމަތީ ސަރަހައްދުގައި ފެތުރެމުންދާ އިބޯލާ ބަލި ޖެހުނު މީހުންގެ އަދަދު 1,000 އަށްވުރެ މައްޗަށް އަރާފައިވާ ކަމަށް އެ ގައުމުގެ ސިއްހީ އޮފިޝަލުން ހާމަކޮށްފިއެވެ. މި ބަލި ކޮންޓްރޯލް ކުރުމަށް ކުރަމުންދާ މަސައްކަތްތަކަށް އެ ސަރަހައްދުގައި ހިނގަމުންދާ ހަމަނުޖެހުންތަކާއި މީހުން ގެދޮރު ދޫކޮށް ދިއުމުގެ ސަބަބުން ބޮޑެތި ހުރަސްތަކެއް ވަނީ ކުރިމަތިވެފައެވެ.
ޑީއާރުސީގެ މިނިސްޓްރީ އޮފް ހެލްތުން އާދީއްތަ ދުވަހު ހާމަކުރި ގޮތުގައި، މިދިޔަ މެއި މަހުގެ 15 ވަނަ ދުވަހު އިޓޫރީ ޕްރޮވިންސްގައި މި ބަލި ފެތުރެން ފެށި ފަހުން މިހާތަނަށް 1,003 މީހުންނަށް ވަނީ ބަލި ޖެހިފައެވެ. އަދި މި ބަލީގައި 254 މީހުން މަރުވެފައިވާއިރު، 100 މީހުން ވަނީ ބަލިން ފަސޭހަވެފައެވެ. މިހާރުވެސް 365 މީހަކަށް ހޮސްޕިޓަލްތަކުގައާއި އެކަހެރިކޮށްގެން ފަރުވާ ދެމުންދާ ކަމަށް ރިޕޯޓްތައް ބުނެއެވެ.
މިފަހަރު ފެތުރެމުންދަނީ އިބޯލާގެ ނާދިރު ބާވަތެއް ކަމަށްވާ ‘ބުންޑިބުގްޔޯ’ ސްޓްރެއިން އެވެ. މި ބާވަތަށް ހާއްސަ ވެކްސިނެއް ނުވަތަ ފަރުވާއެއް އަދި ހޯދިފައެއް ނުވެއެވެ. އޮފިޝަލުން ގަބޫލުކުރާ ގޮތުގައި ބަލި ޖެހިފައިވާ ގިނަ ބަޔަކު އަދިވެސް ދެނެގަނެވިފައި ނުވާއިރު، ބަލި ފެތުރުން އެންމެ މައްޗަށް ދާނެ ދުވަސްތައް އަދި އޮތީ ކުރިއަށެވެ.
ބަލި ޖެހިފައިވާ މީހުންނާ ބައްދަލުވި މީހުން ދެނެގަތުމުގެ މަސައްކަތް (ކޮންޓެކްޓް ޓްރޭސިންގް) ކުރިއަށްދަނީ އެކަށީގެންވާ މިންވަރަށްވުރެ ލަހުންނެވެ. މިނިސްޓްރީން ބުނި ގޮތުގައި ބަލިމީހުންނާ ބައްދަލުވި ކަމަށް ބެލެވޭ މީހުންގެ ތެރެއިން ހޯދިފައިވަނީ އެންމެ 55 އިންސައްތަ މީހުންނެވެ. އެފްރިކާ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަންގެ ޑައިރެކްޓަރ ޖެނެރަލް ޑރ. ޖީން ކަސޭޔާ ވިދާޅުވީ، އިބޯލާ ފަދަ ބައްޔެއް ކޮންޓްރޯލް ކުރަން ބޭނުންނަމަ އެންމެ ފުރަތަމަ ބަލި ޖެހުނު މީހާ އެނގެންޖެހޭނެ ކަމަށާއި، ނަމަވެސް މި ބަލި ފެށުނު ގޮތާ މެދު އަދި ޔަގީންކަމެއް ނެތް ކަމަށެވެ.
އިޓޫރީ ސަރަހައްދުގައި ހަރަކާތްތެރިވާ ހަތިޔާރު އެޅި ޖަމާއަތްތަކުގެ ހަމަލާތަކުގެ ސަބަބުން ސިއްހީ އެހީތެރިންނަށް އަވަށްތަކަށް ދިއުމަށް ވަނީ ދަތިވެފައެވެ. މި ހަމަލާތަކުގެ ސަބަބުން އެތައް ހާސް ބަޔަކު ވަނީ ރައްކާތެރިކަން ހޯދުމަށް ކޭމްޕްތަކަށް ހިޖުރަކޮށްފައެވެ. ބޫނިއާ ކައިރީގައި ހުންނަ ކިގޮންޒޭ ކޭމްޕްގައި 20,000 އަށްވުރެ ގިނަ މީހުން ދިރިއުޅެމުންދާއިރު، އެތަނުގައި ސަބަބު ނޭނގޭ ގޮތަށް 10 މީހަކު މަރުވުމާ ގުޅިގެން ތަހުގީގެއް ހިންގުމަށް ވަނީ ގޮވާލާފައެވެ.
މިކަމާ ގުޅިގެން އިޓޫރީގެ މަދަނީ ޖަމިއްޔާއެއްގެ ލީޑަރެއް ކަމަށްވާ ޝަރީތޭ ބަންޒާ ވިދާޅުވީ، “މިހާރުވެސް ދިރިއުޅުމުގެ ހާލަތު ނާޒުކުކޮށް އޮތް މިފަދަ ތަނެއްގައި ބަލިމަޑުކަމެއް ފެތުރިއްޖެނަމަ، އެއީ ވަރަށް ބޮޑު ކާރިސާއަކަށް ވެގެންދާނެ” ކަމަށެވެ.